Gálatas 5:1-26
-
Cristota catijcuna mana huatashca shina cashcamanta (1-15)
-
Diospaj espíritu yuyachishca shina causanamanta (16-26)
-
Aichapaj ruraicunamanta (19-21)
-
Diospaj espíritu pꞌucuchishca granomanta (22, 23)
-
5 Cristomi ñucanchijtaca huatashca shina ama causachun Leymanta cacharichirca. Chashna cacharichishcamantaca alli catiraichij. Yugopi huatashca shina sirvijcuna canamanca ama cutin tigraichijchu.
2 Ricuichij, ñucallataj Pablomi caitaca nini. Circuncisionta cancuna rurachijpica Cristo imata rurashcaca yangallami canman.
3 Cutinllatajmi cashna nini. Maijanpish circuncisionta rurachijca Leypi nishcatami tucuipi cazuna can.
4 Maijancunaca leypi nishcata cazushpami cashcata rurajcuna nishca cashun ninguichijmi. Chashna nishpaca Cristomantami caruyashcanguichij. Cancunallatajmi Cristo yallitaj llaquij cashcata ricuchichunca mana saquinguichij.
5 Ashtahuanpish ñucanchijca feta charishcamanta, espíritu santota charishcamantami Diospaj ñaupajpica cashcata rurajcuna nishca canata tucui shunguhuan shuyacunchij.
6 Cristo Jesushuan shuj shinalla causajcunapajca circuncisionta rurachinapish, mana rurachinapish yangallami. Ashtahuanpish cꞌuyaimanta imatapish rurashpa feta charishcata ricuchinami ashtahuan alli can.
7 Cancunaca allimi callpacurcanguichij. Shinapish ¿alli yachaita catichunca pitaj jarcaicunata churarcari?
8 Cancunata cayaj Diosmantaca chashna yuyaicunaca mana shamunchu.
9 Ashalla levadurami tucui masataca pꞌunguillichin.
10 Amito Jesushuan shuj shinalla cashcamanta cancunapish ñuca shinallataj yuyachunmi shuyani. Cancunata llaquichicujca maijan cashpapish llaquichishcami canga.
11 Shinaca huauquicuna, circuncisionmanta yachachicujpica ñucataca mana catirashpa llaquichincunamanchu. Shinallataj llaquichina caspipi* Jesusta huañuchishcata yachachijpipish gentecunaca mana pꞌiñarinmanchu.
12 Cancunata pandachinata munaj runacuna paicuna charishca aichata tucui pꞌitirishpachari* alli canman.
13 Huauquicuna, cancunataca huatashca shinamanta cacharichishca cachunmi Diosca cayarca. Shinapish cacharichishcami canchij nishpa aicha munaillataca ama ruraichijchu. Ashtahuanpish cꞌuyaimanta caishuj chaishuj sirvinacuichij.
14 Tucui Leymi: “Can quiquin cꞌuyarij shinallataj shujtajcunatapish cꞌuyangui” nishcapi pajtarin.
15 Chashna jahuapish caishuj chaishuj caninacushpa, millpunacushpa caticushpaca ñataj caishuj chaishuj huañuchinacunguichijman.
16 Chaimantami cancunamanca cashna nini. Diospaj espíritu yuyaita cushca shina causaichij. Chashnami aicha munaitaca mana ruranguichij.
17 Aichaca paipaj munaicunamantami espiritupaj contra can. Espiritupish aichapaj contrami can. Aichapish espiritupish contra cashcamantami cancuna rurasha nishcataca mana ruranguichij.
18 Diospaj espíritu yuyachijpica leyta cazunataca ña mana minishtinguichijchu.
19 Shinapish aichapaj ruraicunaca ricunallami. Caicunaca: huainayana,* mapa ruraicuna, millai ruraicunata mana pingashpa rurana,*
20 rurashcalla dioscunata adorana, brujiana,* pꞌiñanacushpalla causana, macanacuicuna, llaquirinacuicuna, jahualla pꞌiñarina, pꞌiñanacuicuna, chꞌicanyarinacuicuna, chꞌican chꞌican religioncunata callarichina,
21 envidiana, machana, maipishcachun fiestacunata rurana, cai laya shujtaj ruraicunapishmi can. Ima shinami ña huillarcani cutinllatajmi cashna nini. Maijanpish caicunata rurashpa catijca Diospaj Gobiernopica manataj yaicungachu.
22 Cutin Diospaj espíritu pꞌucuchishca granoca: cꞌuyaimi, cushicuimi, sumaj* causaimi, pacienciata charinami, alli canami, llaquij canami, feta charinami,
23 manso shungu canami, quiquinllataj jarcarinami. Caicunata pajtachichunca ima ley mana jarcanchu.
24 Ashtahuanpish Cristo Jesuspaj cajcunaca paicunapaj juchayuj cuerpotaca millai munaicunandij, mana alli munaicunandijmi caspipi clavashpa churashcacuna.
25 Diospaj espíritu yuyachishca shina causacushpaca chai espíritu yuyachishca shinallataj causashpa catishunchij.
26 Ama jatun tucushunchijchu, caishuj chaishuj ama mishanacushunchijchu, caishuj chaishuj ama envidianacushunchijchu.
Notacuna
^ “Llaquichina caspi” shimita huasha diccionariopi ricui.
^ O “eunuco tucushpachari”. Cashnami paicuna difindicushca leytaca mana pajtachi tucungacuna.
^ Griego rimaipica: “pornéia” ninmi. “Huainayana” shimita huasha diccionariopi ricui.
^ Griego rimaipica: “asélgueia” ninmi. “Millai pinganayai ruraicuna” shimita huasha diccionariopi ricui.
^ “Brujiana” shimita huasha diccionariopi ricui.
^ O “tranquilo”.
