2 Corintios 8:1-24
-
Judea llajta huauquicunata ayudashcamanta (1-15)
-
Titota Corinto llajtaman cachanamanta (16-24)
8 Huauquicuna, Diosca yallitaj llaquij cashcatami Macedonia llajta congregacioncunamanca ricuchishca. Chaita yachachunmi munanchij.
2 Paicunaca sinchi llaquita charishcamantami achcata sufrircacuna. Yallitaj pobrecuna cashpapish paicuna imalla charishcacunatami cushicuihuan curcacuna. Chashnami tucui shunguhuan cujcuna cashcata ricuchircacuna.
3 Paicunaca tucui pudishcatami curcacuna, cui pudishcatapish yallimi curcacuna. Chaitaca ñucallataj ricushpami huillani.
4 Paicunaca shungumanta cushun nishpa, jucha illaj huauquicunatapish ayudashun nishpami quiquin yuyaimanta cutin cutin ñucanchijta rogarcacuna.
5 Paicunaca ñucanchij yuyashcatapish yallimi rurarcacuna. Shinallataj Amito Jesusta sirvingapajmi achcata esforzarircacuna. Dios munashca shinami ñucanchijtapish ayudarcacuna.
6 Chaimantami shungumanta cancuna cushca ayudata tandachunca Titota animarcanchij. Paimi cancunapurapica chashna tandai callarichirca.
7 Cancunaca tucuipimi allita ruracunguichij. Crishcapipish sinchimi canguichij. Alli parlajcuna, alli yachajcunami canguichij. Imata rurashpapish cushicushpa rurangapajmi esforzaringuichij. Ñucanchij cꞌuyashca shinallatajmi shujtajcunatapish cꞌuyanguichij. Shinapish shungumanta cujcuna cangapaj esforzarishpa catichij.
8 Chashna nishpaca cancunataca mana mandacunichu. Ashtahuanpish shujtajcuna cushicuihuan sinchita trabajacujta cancuna ricuchunmi munani. Shinallataj shujtajcunata shungumanta cancuna cꞌuyaj cashcatami ricunata munani.
9 Cancunaca ñucanchij Amito Jesucristo yallitaj llaquij cashcataca yachanguichijmi. Paica charij cashpapish cancunamantami pobre tucurca. Pai pobre tucushcamantami cancunaca charijcuna tucushcanguichij.
10 Caimantaca ñucaca caitami yuyani. Shuj huata huashamanmi cancunaca imalla charishcacunata cushun nishpa tandai callarircanguichij. Chashna rurashpaca cancunapaj allipajllatajmi rurashcanguichij.
11 Cunanca cancuna rurai callarishcataca tucuchingacama ruraichij. Callaripi ima shinami cui pudishcata cushicuihuan curcanguichij chashnallataj tucuringacama cushpa catichij.
12 Shungumanta cushcatami Diosca chasquin. Diosca gentecuna imata cui tucushcallatami cuchun munan. Imata mana cui tucushcataca mana mañanchu.
13 Caitaca shujtajcunapaj jahualla cachun, cutin cancunapajca sinchi cachunca mana nicunichu.
14 Ashtahuanpish cancunapish, caishujcunapish igual charichunmi munani. Cancuna yalli charishcataca paicuna ima minishtishcata charichun cuichij. Chashnami paicunapish yallihuan charishcataca cancuna ima minishtishcata charichun cungacuna. Chaita rurashpami cancunapish, paicunapish chaillatataj charinguichij.
15 Cashnami quillcashca tiyacun: “Achcata charijpajpish mana sobrarcachu. Ashallata charijpajpish mana illarcachu” ninmi.
16 Titopish cancunamanta ñucanchij shinallataj sustarishcamantami Diosta pagui ninchij.
17 Paica ñucanchij nishcatami uyarca. Shinallataj ñucanchij ima mañashcatami rurasha nirca. Chaimantami paica quiquin yuyaimanta cancunata visitanaman ringa.
18 Alli huillaicunata huillashcamanta tucui congregacioncunapi alli nishca huauquitapishmi paihuan cachanchij.
19 Ashtahuanpish mana chaillachu. Paitaca congregacioncunamanta huauquicunami ñucanchijhuan richun agllarca. Paica cancuna tandashca ayudata shujtajcunaman cushpami ñucanchijta ayudanga. Cai ayudataca Amitota jatunyachingapajmi chashna cushun. Chaita rurashpami shujtajcunata ayudangapaj listos cashcata ricuchishun.
20 Chashnami shungumanta cancuna cushca ayudata shujtajcunaman cujpica pipish mana yangamanta juchachishpa rimangacuna.
21 ‘Ñucanchijca Jehová* Diospaj ñaupajpi, gentecunapaj ñaupajpica imatapish mana llullashpa rurangapajmi esforzarinchij’.
22 Shinallataj paicunahuanca ñucanchijmanta shujtaj huauquitami cachanchij. Paica imatapish alli pajtachij cashcatami ñucanchijmanca ricuchishca. Imata rurangapajpish achcatami esforzarishca. Cunancarin cancunata rijsishcamantami allita rurangapaj ashtahuan esforzaringa.
23 Maijanpish Titomanta tapujpica cancunata ayudangapaj ñucahuan sirvijmi can ninguichij. Shinallataj caishuj huauquicunamanta tapujpica Cristota jatunyachingapaj congregacioncunamanta cachashca apostolcunami can ninguichij.
24 Chaimanta cai huauquicunata cꞌuyashcata ricuchichij. Shinallataj congregacioncunapi huauqui panicunaman cancunamanta allita parlashca mana yanga cashcata ricuchichij.
Notacuna
^ “Jehová” shutita huasha diccionariopi ricui.
