1 Pedro 4:1-19
-
Cristo rurashca shina Diospaj munaita rurashpa causashunchij (1-6)
-
“Tucui imalla tiyashcacuna tucurinaca ñami cꞌuchuyamucun” (7-11)
-
Cristota catijcuna llaquicunata apanamanta (12-19)
4 Cristoca aichapimi llaquicunata aparca. Cancunapish Cristo yuyashca shinallataj yuyangapaj allichirichij. Llaquicunata paipaj aichapi apaj runaca juchacunatami huashaman saquishca.
2 Aichayuj tulluyuj causangacamaca runacunapaj munaita ama rurangapaj, ashtahuanpish Diospaj munaita rurashpa causangapajmi chashna rurashca.
3 Cancunaca achca tiempotami cai pacha gentecunapaj munaita rurashpa causashcanguichij. Millai pinganayai ruraicunata* rurashpa, huainayana munailla purishpa, yallitaj machashpa, maipishcachun fiestacunata rurashpa, ubyangapajlla fiestacunata rurashpa, yanga dioscunata adorashpami causashcanguichij.
4 Cancunaca ña mana paicuna shina maipishcachun, mapa causaita charinguichijchu. Chaita ricushpami paicunaca mancharincuna. Chaimantami cancunamantaca mana allita nishpa rimancuna.
5 Chai gentecunaca Cristomanmi imata rurashcataca ricuchingacuna. Paica causajcunatapish, huañushcacunatapish juzgangapajca listomi can.
6 Chaimantami alli huillaicunataca huañushcacunapish yachaj chayashcacuna. Chashnami paicunaca runacunata juzgashca shina juzgashca cashpapish Diospaj espíritu yuyachishca shina causai tucuncuna.
7 Shinapish tucui imalla tiyashcacuna tucurinaca ñami cꞌuchuyamucun. Chaimanta alli yuyaiyuj caichij. Diosta mañangapajpish allichirishca* caichij.
8 Tucuimanta yallica shungumanta caishuj chaishuj cꞌuyaita ricuchinacuichij. Cꞌuyaita charijca achca juchacunata perdonangapajmi listo can.
9 Mana quejarinacushpa caishuj chaishuj cꞌuyaihuan chasquinacuichij.
10 Cancunaca cada unomi Diosmantaca shuj regalota chasquishcanguichij. Diosca yallitaj llaquij cashcataca chꞌican chꞌican layami ricuchin. Chaimanta alli mayordomocuna shina caishuj chaishuj sirvinacuichij.
11 Maijanpish parlajca Dios ima nishcata parlacuj shina parlachun. Shujtajcunata sirvijpish Dios cushca fuerzahuan sirvicuj shina sirvichun. Chashnami Jesucristomanta Diosca tucuipi jatunyachishca canga. Huiñai huiñaita jatunyachishca canapish, poderyuj canapish Diospajmi. Chashna cachun.*
12 Cꞌuyashca huauquicuna, nina shina jatun llaquicunata apacushpaca nunca mana ricushcata ricucushca shinaca ama mancharichijchu.
13 Chaipaj randica cushicushpa catichij. Cancunaca Cristo imamanta llaquita apashca shinallatajmi llaquita apacunguichij. Chashnami Cristo achijnicuj ricurina tiempopica cushicushpa achcata contentaringuichij.
14 Cristopaj shutimanta maipishcachun rimajpipish* Diospaj sumaj espíritu cancunapi cashcamantami cushilla canguichij.
15 Cancunamantaca ni pi huañuchij cashcamanta, shuhua cashcamanta, mana allita ruraj cashcamanta, shujtajcunapaj causaipi satirij cashcamantaca llaquita ama apachun.
16 Shinapish Cristota catij cashcamanta maijanpish llaquicunata apashpaca ama pingai tucuchun. Ashtahuanpish Cristota catij shina causashpa Diosta jatunyachishpa catichun.
17 Cunanmi juicio callaringapaj agllashca tiempo can. Cai juicioca Diospaj huasihuanmi callaricun. Shinapish cai juicio ñucanchijhuan punta callarijpica, ¿Diosmanta alli huillaicunata mana cazuj gentecunahuancarin imashi tucunga?
18 Cashcata ruraj runa sinchita esforzarishcamanta quishpirijpica, ¿millai runahuan, juchayuj runahuancarin imashi tucunga?
19 Shinaca Diospaj munaita rurashcamanta llaquita apacujcunaca allita rurashpa catichij. Tucuita Rurajpaj maquipi mingarichij. Paillapimi ñucanchijca confianchij.
Notacuna
^ Griego rimaipica: “asélgueia” ninmi. “Millai pinganayai ruraicuna” shimita huasha diccionariopi ricui.
^ O “rijcharishca”.
^ O “Amén”.
^ O “cꞌamijpipish”.
