1 Pedro 2:1-25
-
“Diospaj mana llulla shimita yachana munaita charichij” (1-3)
-
Diospaj espirituhuan huasita shayachingapaj causaj rumicunamanta (4-10)
-
Cai pachapi shujtaj llajtamanta shina causanamanta (11, 12)
-
Mandajcunata cazunamanta (13-25)
-
Cristopaj ejemplota catinamanta (21)
-
2 Shinaca tucui laya millai ruraicunamanta, umanamanta, mishqui shimi jayaj shungu canamanta, envidianamanta ima shinapish yangamanta juchachishpa rimanamantapish caruyaichij.
2 Diospaj shimica imahuan mana chagrushca leche shinami. Chaimanta cunanlla huacharishca huahuacuna lecheta munaj shina, cancunapish Diospaj mana llulla shimita yachana munaita charichij. Chai mana llulla shimimantami huiñashpa quishpiringuichij.
3 Cancunaca Amito llaquij cashcata alli yachashpallami chashna quishpiringuichij.
4 Runacunaca causaj rumitaca mana chasquircacunachu. Shinapish Diosmi chai rumitaca agllarca. Paipaj ñaupajpica valishcami can. Paipajman cꞌuchuyashpaca
5 cancunallatajmi causaj rumicuna shina canguichij. Cancunaca jucha illaj sacerdotecuna tucungapaj, espíritu santo yuyachishca shina sacrificiocunata cungapajmi Diospaj espirituhuan shayachicushca huasi canguichij. Chai sacrificiocunataca Jesucristomantami Diosca chasquin.
6 Dios quillcachishcapica: “¡Ricuichij! Sionpimi ñuca agllashca rumitaca churani. Caica pirca callaripi churashca valij rumimi. Maijanpish chai rumipi feta churajca manataj pingaipi saquiringachu” ninmi.
7 Shinashpaca cancuna paipi crishcamantami cancunapajca paica valishca can. Shinapish paipi mana crijcunapajca “huasita rurajcuna mana nishpa shitashca rumillatajmi, pircacunata jahua esquinapi tandachij rumi* tucushca”.
8 Chashnallataj “gentecunata ñitcachij rumi, urmachij jatun rumimi tucushca”. Paicunaca Diospaj shimita mana cazujcuna cashcamantami ñitcarincuna. Chaillapajtajmi paicunaca agllashca carcacuna.
9 Cancunaca Dios llaquij cashcata* tucui ladocunapi huillangapajmi agllashca familia, mandaj sacerdotecuna, jucha illaj llajta, Dios agllashca pueblo canguichij. Paimi cancunataca amsamanta sumaj luzman cayarca.
10 Shuj tiempoca cancunaca mana Diospaj pueblo carcanguichijchu. Shinapish cunanca Diospaj pueblomi canguichij. Shuj tiempoca Diosca cancunataca mana llaquircachu. Shinapish cunanca cancunata llaquishcatami paica ricuchishca.
11 Cꞌuyashca huauquicuna, cancunataca shujtaj llajtacunamanta runacunata shina, cai pachapi ashacamalla causacuj runacunata shinami aicha munaicunamanta jarcarishpa catichun rogapani. Cai munaicunami cancunahuan macanacucun.
12 Cai pacha gentecunapurapica alli causaichij. Pi cancunata mana allitami rurashca nishpa juchachijpica paicunallatajmi cancunapaj alli ruraicunata ricungacuna. Chaita ricushpami gentecuna imata rurashcata ricuchina punllapica Diosta jatunyachingacuna.
13 Amito munashca shina runacuna churashca mandajcunata cazuichij. Cancunata yalli caj reytapish,
14 pai cachashca mandajcunatapish cazuichij. Paicunataca mana allita rurajcunata castigangapaj, allita rurajcunata alabangapajmi reyca agllashca.
15 Diosca mana yachashpa parlaj yuyai illaj runacunata cancuna allita rurashpa upallachichunmi* munan.
16 Huatashcamanta cacharichishca runacuna shina causaichij. Shinapish cacharichishcacunami canchij nishpa mana allicunataca ama ruraichijchu. Ashtahuanpish Diosta sirvijcuna cangapaj causaichij.
17 Tucui laya gentecunata respetaichij, tucui huauqui panicunata cꞌuyaichij, Diosta manchaichij, reytapish jatunyachichij.
18 Sirvij runacunapish paicunapaj amocunataca respetota ricuchishpa cazuchuncuna. Alli amocunallata, intindij amocunallata cazunapaj randica imata rurajpipish mana contentarij amocunatapish cazuchun.
19 Diosca maijanpish paipaj ñaupajpi alli concienciata charingapaj esforzarijpi, llaquicunata ahuantajpi, ima culpata mana charishpapish llaquita apajpica achcatami cushicun.
20 Juchata rurashcamanta macajpica, ¿cancuna ahuantashcaca imapajtaj valingari? Shinapish allita rurashcamanta llaquicunata ahuantajpimi Diosca achcata cushicun.
21 Chaipajmi Diosca cancunataca agllarca. Cristoca cancunamantami llaquicunata aparca. Pai rurashcata* alli catichunmi ejemplota saquirca.
22 Paica ima juchata mana rurarcachu. Umachij shimicunatapish mana nircachu.
23 Cꞌamicujpipish* paica mana chashnallataj cꞌamircachu.* Llaquita apacushpapish llaquichishami nishpa mana manchachircachu. Ashtahuanpish cashcata rurashpa juzgajpaj maquipimi mingarirca.
24 Caspipi clavajpica paillatajmi ñucanchij juchacunata paipaj quiquin aichapi aparirca. Ñucanchij juchacunamanta quishpichingapaj, cashcata rurashpa causachunmi chashna rurarca. “Paipaj chugricunamantami cancunaca alliyachishca carcanguichij”.
25 Cancunaca caita chaita rij ovejacuna shinami carcanguichij. Shinapish cunanca cancunata michijpajman, cancunapaj causaita cuidajpajmanmi tigramushcanguichij.
Notacuna
^ O “caishuj rumicunamanta yalli importante rumi”.
^ Griego rimaipica: “Diosmanta allicunata” ninmi.
^ Griego rimaipica: “bozalta churachunmi” ninmi.
^ Griego rimaipica: “Paipaj chaqui sarushcata” ninmi.
^ O “Rimacujpipish”.
^ O “rimarcachu”.
