Mana. Bibliapica santocunata mañana cashcataca mana yachachinchu. Yaya Diosllatami mañana canchij. Shinallataj Jesucristopaj shutipimi mañana canchij. Jesusca: “Cancunaca cashna mañanguichij: ‘Jahua pachapi caj ñucanchij Yaya, cambaj jucha illaj shutitaca, alli nishca cachun’” nircami (Mateo 6:9) Jesusca santocunata, angelcunata o pi shujtajta mañana cashcataca mana yachachircachu. Yaya Diosllata mañana cashcatami yachachirca.

 Jesucristoca caitapishmi nirca: “Ñucamari ñan cani, mana llullapish, causaiyujpish cani. Yayapajmanca pi mana paillatajca chayai tucunchu. Ñucami Yayapajman chayachij ñan cani” (Juan 14:6). Jesusllamantami Yaya Diospajman cꞌuchuyai tucunchij (Hebreos 7:25).

¿Yaya Diosta mañashpapish santocunatapish mañai tucunchijchu?

 Moisesman cushca chunga mandamientocunapica Yaya Diosca: “Ñucami Mandaj cambaj Taita Dios cani. Ñucaca tucuita rurai tucuj Dios, ñucapajlla cachun munajmi cani” nircami (Éxodo 20:5). ¿“Ñucapajlla cachun munajmi cani” nishpaca imatataj nisha nicun? La Biblia. Traducción del Nuevo Mundo Bibliapica cai shimicunataca: “Ñucallata adorachun munajmi cani” nishpami traducishca. Chashnami Yaya Diosca paillata adorachun munashcata intindinchij. Diosta mañashpaca paita adorashcatami ricuchinchij (Isaías 48:11).

 Diosta mañanapaj randi shuj ángel o shuj santota mañajpica Yaya Diosca llaquillami sintiringa. Apocalipsis libropica apóstol Juanmanta parlashpaca, paica shuj cutinca shuj angelta adorangapajmi paipaj ñaupajpi cumurirca ninmi. Pero chai angelca: ‘Riqui, ama chashna ruraichu. Ñucapish can shinallataj, Jesús huillashcata alli catij cambaj huauquicuna shinallatajmi cani. Diosta adorai’ nircami (Apocalipsis 19:10, QC, 1989).