Testigo de Jehovacunaca semanapica ishqui cutinmi tandanacuncuna. ¿Chaipica imatataj rurancuna? ¿Testigo de Jehovacunapaj tandanacuiman rinaca imamantataj alli canga?

•  ¿Tandanacuna Huasipica imatataj rurancuna?

•  ¿Imamantataj Testigocunapaj tandanacuiman rinaca alli canman?

•  ¿Shujtaj jovencunaca imatataj yuyancuna?

 Testigo de Jehovacunapaj Tandanacuna Huasicunapica Bibliamantami yachachincuna. Chai tandanacuicunaman rishpaca:

•   Diosmantami verdadta yachangui.

•   Cai punllacunapi imamanta llaquicuna tiyashcatami intindingui.

•   Ashtahuan alli personami tucungui.

•    Alli amigocunatami taringui.

  Tandanacuicunapi yachashcaca cantami ayudanga. Testigo de Jehovacunapaj tandanacuicunapica Bibliamanta yachashpami alli yachaita charingui (Proverbios 4:5). Bibliapi tiyaj consejocunaca alli decisioncunata agllachunmi ayudai tucun. Shinallataj chai tandanacuicunapica cai catij tapuicunatami yachai tucungui:

•   ¿Imapajtaj causanchij?

•   ¿Diosca ñucanchij llaquicunamantaca culpata charinchu?

•   ¿Huañushca huashaca causaica tiyanchu?

 Fin de semana tandanacuicunapica alaja conferenciacunatami uyangui. Huaquin temacunaca cashnami can:

•   ¿Bibliapi mandashcacunata cazushpaca ima shinataj causashun?

•   ¿Llaquicunahuan cajpica pitaj ayudai tucun?

•   ¿Diospaj Gobiernoca imatataj ñucanchijmanta ruracun?

 Brendaca: “Shuj compañeromi tandanacuiman shamushpa ñuca familiahuan tiyarirca. Paimanca yachana librocunatami compartircanchij. Paica tandanacuipi rurashca tapuicunata shujtajcuna ima shina cutichijta uyashpami contento sintirirca. Shinallataj yachangapaj ñucanchij publicacioncunata shina paipaj iglesiapi mana charishcatami nirca” ninmi.

 ¿Caita yacharcanguichu? Testigo de Jehovacunapaj tandanacuica gratismi can. Cullquita mana tandancunachu.

 Tandanacuicunapi shujtajcunata rijsishpaca achcatami animaringui. Bibliapica Jesusta catijcunaca caishujmanta chaishujmanta animaringapaj tandanacujcuna cashcatami nin (Hebreos 10:24, 25). Cai punllacunapi gentecunaca paicunallapimi yuyancuna. Pero Diosta alli sirvijcunahuan tandanacunaca ñucanchijtami achcata animanga.

 Elisaca: “Punllapi shaicuita cainashca qꞌuipaca tandanacuiman rishpami chaipi cajcunahuan alli sintirini. Tandanacui tucurishca qꞌuipa huasiman tigrashpaca cushillami sintirini. Cayandij punlla ñaupajman catingapajpish fuerzastami charini” ninmi.

 ¿Caita yacharcanguichu? Muyundij Allpapica 120 mil yalli congregacioncunami tiyan. Shinallataj 60 mil yalli tandanacuna lugarcunami tiyan. Ashtahuan gentecuna Testigo de Jehovacunapaj tandanacuicunaman ricushcamantami cada huata casi mil quinientos mushuj Tandanacuna Huasicunata shayachinchij. a