COSTA de Marfil nacionchö juk waktsalla Pascal jutiyoq nunam, mas alli kawakïta munaq. Tsëmi yarpakachaq boxeador oficiunwan mëchö qellëta gananampaq kaqta. 25 watayoqnö këkarmi musyarirqan Euröpa nacionkunachö tsëta logranampaq kaqta. Tsë nacionkunaman yëkunampaq documentunkuna mana kaptinmi, permïsunnaqlla qëkïta munarqan.

1998 watachömi, Pascal 27 watayoq këkarnin, Ghana, Togo y Benin nacionkunapa pasarqan, y Niger nacionpa Birni Nkonni jutiyoq markanmanmi charqan. Peru, norti kaq lädupa ëwanampaqqa desiertu del Sahara nishqantam camionëtawan pasanan karqan, y mar Mediterräneo nishqanman chärirnam, juk barcuwan Euröpaman ëwanan karqan. Peru Niger nacionllachömi quedakurqan, ¿imanir?

Qellëninmi ushakärirqan, y Noë jutiyoq precursortam reqirirqan, y pëwanmi Bibliapita yachakur qallëkurqan. Yachakunqan shonqunyaq chäriptinmi kawëninta cambiarqan. Diospa kaqta mas precisaqpaq churarmi 1999 diciembri killa bautisakurirqan. Jehoväta agradecikunqanta rikätsikurmi, 2001 watachö, Niger nacionllachö precursornö yanapakur qallëkurqan. ¿Tsëta ruranqampita imanötaq sientikun? “Kawënïtam alli provechëkä” ninmi.

Manam Pascal-llatsu Diospa kaqchö yanapakurnin mas kushikïta tarishqa. Wakin wawqikuna y panikunapis Euröpapitam Africaman ëwayashqa publicadorkunata mas wanayanqan sitiukunachö yanapakuyänampaq. 17 watayoqpita 70 watakunayoq 65 wawqikuna y panikunam Africa occidentalchö Benin, Burkina Faso, Niger y Togo nacionkunaman ëwayashqa. * ¿Imataq yanapashqa tsëpa ëwayänampaq, y imakunapataq pasayashqa?

Dinamarca nacionpita Anne-Rakelmi kënö nin: “Teytäkunam Senegal nacionchö misionëru kayarqan. Misionërunö yanapakï alläpa kushikïpaq kanqanta imëpis parlayaptinmi, noqapis pëkunanö këta munarqä”. 15 watanam pasarishqa, 20 watayoqnö këkarnin Togo nacionchö sëñas idiömachö yanapakunampaq kë pani ëwanqampita. Tsënö ruranqan, ¿imanötaq wakinkunata yanapashqa? Pëmi kënö nin: “Tiempuwannam nanäwan turï Togo nacionman shayämurqan”.

 70 watayoq Franciapita Aurele wawqim kënö nin: “Pitsqa watanam pasarirqan jubilakunqäpita, qallananchöqa manam musyarqätsu imata ruranäpaq kaqta, wayïllachö paraïsuta shuyararnin këta o Diospa kaqchö mas yanapakïta”. Diospa kaqchö mas yanapakïtam kë wawqiqa decidirqan. Kananqa kima watanam pasarishqa Albert-Fayette warminwan Benin nacionman ëwakunqampita. Aurelem kushishqa kënö nin: “Kë markaman Jehoväta sirwiyänäpaq shayämunqänöqa manam ni imapis kashqatsu, këchöqa lamarkunapa wakin lädunkunaqa paraïsunömi”.

Franciapita Benin nacionman Clodomirwan warmin Lysiane ëwakuyanqampitaqa 16 watanam pasarishqa. Qallananchöqa familiankunata y amïgunkunata alläpa llakirninmi mana yachakäyänampaq kaqta pensayaq. Peru mantsapakïninkuna pasariptinmi kushishqana kawayarqan. Clodomirmi kënö nin: “Kë 16 watakunachöqa cada watam juk nunata bautisakunampaq yanapakuyarqö, y tsëqa alläpa kushikïpaqmi kashqa”.

Franciapita Sebastien y Johannam, 2010 watachö Benin nacionpa ëwakuyarqan. Sebastienmi kënö nin: “Congregacionchöqa imëka rurëkunam kan, këchö sirwiqa imëka Diospita ras yachakuyänampaq escuëlaman ëwënömi”. ¿Y nunakunaqa wiyakuyaqku? Johannam nin: “Alläpam munayan Diospita yachakïta, cällichö purikäyaptïpis Bibliapitam tapuyäman y publicacionkunatam mañakayäman”. ¿Imanötaq yanapakoq ëwakuyanqan pëkunata yanapashqa? Sebastienmi kënö nin: “Juknölla kayänäpaqmi yanapayämashqa. Warmïwan cada junaq yachatsikïqa alläpa shumaqmi”.

Eric y warmin Katyqa, Benin nacionpa norti kaq lädunchömi precursor kayan, y tsëchöqa ichikllam nunakuna kayan. Chunka watanam pasarishqa Franciachö këkarnin publicadorkunata wanayanqan sitiukunapaq yachatsikïkunata leyiyanqampita, y llapan tiempunkunawan yachatsikoqkunawan parlayanqampita. Tsëmi yanaparqan 2005 watachö juk nacionpa ëwayänampaq. Tsëpita patsëqa yanapakuyanqan congregacionchö masmi mirayashqa. Ericmi nin: “Pasaq ishkë watakunachöqa, Tanguiëta nishqan grüpuchöqa 9 publicadorkunallam karqan, kananqa 30 publicadorkunanam kayä. Y domingukunaqa 50 o 80 nunakunanömi reunionkunaman shayämun. Manam imawampis igualantsu kënö miranqanta rikar kushikuyanqäqa”.

¿Imakunapataq pasayan yanapakoq ëwaqkuna? 33 watayoq Benjaminqa, Anne-Rakelpa turinmi. 2000 watachömi, Togo nacionchö sirweq juk misionërutam Dinamarcachö reqirirqan. Pëmi kënö nin: “Precursor këta munanqäta niriptïmi, ‘¿Togo nacionchö precursor këta pensashqaku kanki?’ nir tapuramarqan. Tsë witsankunaqa manaraqmi 20 watayoqraqtsu karqä, peru ishkan panïkuna tsëchöna sirwiyaptinmi, mas fäcilna karqan”. Tsëmi, alleq yarpachakurirnin yanapakoq ëwarqan. Peru Benjaminqa manam ni ichikllapis frances idiöma parlëta yachaqtsu. Pëmi kënö nin: “Qallanan joqta killakunaqa manam fäciltsu karqan”. Peru tiempuwanqa masmi yachakurirqan, kananqa Benin nacionpa sucursalninchömi publicacionkunata apatsir y Departamento de Computadora nishqanchö yanapakïkan.

Näqa parlanqantsik Ericwan Katyqa, Franciapita manaraq Benin nacionman ëwarmi, juk idiömata parlaq congregacionchö sirwiyarqan. ¿Tsënöllatsuraq karqan Africachö sirwï? Katym nin: “Juk alli wayita tariqa manam fäciltsu karqan, tsëmi atska killakunapa luzninnaq y yakunnaq wayichö täräyarqä”. Y Ericnam nin: “Vecinökunaqa müsicatam llapan voluminwan wiyayaq. Tsëmi pacienciakoq käyäna y yachakäyäna precisarqan”. Tsënö karpis ishkanmi kënö niyan: “Tsënö territoriukunachö yanapakuyanqäpita bendicionkunata chaskiyanqäqa manam imawampis igualantsu”.

Pasaq pitsqa watanam, Franciapita 60 cäsi watakunayoqnö Michel y Marie-Agnès ëwakuyarqan Benin nacionman. Qallananchöqa mantsapakuyarqanmi. Mëtsikaq nunakunam pensayaq ëwakuyanqanqa peligrösu kanqanta. Michelmi nin: “Jehovä mana yanapayämaptinqa pasëpachi mantsakäyäman karqan. Pëta mas sirwiyänäpaqmi ëwakuyarqä. Y pëqa manam imëpis jaqiyämashqatsu”.

Mas wanayanqan sitiukunachö yanapakoqkunaqa puntallapitana alistakï precisanqantam niyan. Tsëpaqqa, wakinkunapa costumbrinkunawan yachakäyänampaqmi listu këkäyan, kapuyanqanllawan kawakïtam yachakuyänan y Jehovämanmi markäkuyänan (Lüc. 14:28-30).

Näqa parlanqantsik Sebastienmi, kënö willakun: “Manaraq yanapakoq yarqurninmi, Johannawan noqa ishkë watapa qëllëta juntayarqä. Mana precisaqkunachö mana gastayänäpaqmi decidiyarqä”. Juk nacionchö yanapakur sïguiyänampaqmi cada  wata Euröpata wallka killakunalla trabajaq ëwayan, y tsëmi yanapaq tsë wata Benin nacionchö precursornö sirwiyänampaq.

Ishkë chunka soltërakuna Africa occidentalpa ëwaqkunachömi Marie-Thérèse shipashpis këkan. Franciachöqa cärruta manejarmi trabajaq, peru 2006 watachömi Niger nacionchö precursöranö yanapakunampaq juk watapa permïsuta mañakurqan. Cuentatam qokurirqan tsënö kawë alli kanqanta. Pëmi kënö nin: “Franciata kutirirmi, patronnïta mañarqä mäyupita agostuyaq tsëchö trabajanäpaq, y ‘allim’ nimarqanmi, tsëmi kananqa Niger nacionchö septiembripita abrilyaq precursöranö yanapakö”.

Diospa kaqta puntaman churaqkunaqa wanayanqankunata Jehovä qonampaq kaqtam següru këkäyänan (Mat. 6:33). Benin nacionchö precursöranö yanapakoq 30 cäsi watayoqnö Saphira panita pasanqanta rikärishun. Pitsqa watana tsëchö këkarmi, juk wata mas tsëchö yanapakïta munar, 2011 watachö Franciata kutirqan trabajanampaq. Pëmi nin: “Viernisnam karqan y tsë junaqllam trabäjöqa ushanan karqan, chunka junaqkuna masmi trabajëta wanarqä qellëta mas juntanäpaq. Jehovätam tsë pasamanqanta willarirqä. Jinan höram telëfunupa qayarayämarqan ishkë semänapa jukpa rantin trabajanäpaq”. Lünisnam, Saphira paniqa tsë trabäjuman ëwarqan imata ruranampaq kaqta musyatsiyänampaq. Jina ninmi: “Kushikïnïpaqqa, musyarirqä Precursorkunapaq Escuëlaman ëwanampaq juk nana chunka junaqpa permïsukunqantam, y pëpa rantinmi trabajanä karqan. Patrunninshi ninaq pëpa rantin jukta tariptinqa permïsuta qonampaq kaqta. Y pëpis Jehovätash mañakunaq, ¡ishkäpa mañakïnïkunatam contestayämarqan!”.

Africa occidentalta yanapakoq wakin ëwaqkunaqa tsëchömi yachakäriyarqan, wakinnam wallka watakunalla karirnin nacionninkunata kutikuyarqan. Tsënö kaptimpis, kutikoqkunaqa yarpäyanran tsëchö yanapakuyanqampita. Yachakuyashqam rasumpa kushikïqa Jehoväta sirwïpita kanqanta.