Kenia nacionchö ishkaq precursorkuna juk wayiman yëkurirmi, takshalla nuna cämarëkaqta rikëkur alläpa espantakuyarqan. Qasqun (pëchun) y rikrankunapis takshallam karqan. “Luychunöran cöjukunapis ëqikachäyanqa” nir Dios awnikunqanta willariyaptinmi alläpa kushikurqan (Is. 35:6).

Cäsi 40 watayoq Onesmusqa, mana alli tulluyoq yurishqa kanqantam precursorkunaqa musyariyarqan. Tullunkunaqa alläpa delicädu karmi imallachöpis takakuriptinqa ras pakirin. Tsë qeshyampaq mana jampi kaptinmi, Onesmusqa nanapäkurlla y ruëdayoq sïllanllachö kawakunampaq kaqta pensarqan.

Peru pëqa Bibliata estudiarmi qallëkurqan. Tsënö kaptimpis, pakikur mas nanapäkur sufrinanta mana munarmi, mamäninqa reunionkunata ëwananta munaqtsu. Tsëmi wawqikuna reunionkunata grabayäpoq y pënam wayinllachö wiyaq. Peru pitsqa killapana Bibliata estudiëkarnam, ima pasanan kaptimpis reunionkunaman ëwëta munarqan.

¿Reunionkunaman ëwarqa mastsuraq nanapäkurqan? Manam. Kënömi nin: “Reunionkunachöqa manam alläpatsu nanapäkoq kä”. Dios awnikunqanman pensanqanmi alli sientikunampaq yanapaq. Mamäninqa alläpam kushikurqan wawan jukläyana sientikunqanta rikar y Bibliata estudiarmi qallëkurqan. “Diosta sirwinqanmi wawäpaqqa jampin cuenta” neqmi.

Ichikllachönam, Onesmusqa manaraq bautisakur yachatsikoq tikrarirqan. Tiempuwannam bautisakurirqan y kananqa siervu ministerialnam. Chakinkunata y juknin kaq rikranta mana kuyutsita puëdirpis, puëdinqanmannö Jehoväta sirwitam munarqan. Precursor auxiliar këtam munarqan, peru solicitü llenëtam mantsarqan. ¿Imanir? Porqui ruëdayoq sïllanta kumar jukraq (kunjar) yanapanampaq kaqta musyarmi yarpachakurqan. Cristiänu mayinkunata tsëta willariptinnam, yanapayänampaq awniriyarqan. Cristiänu mayinkuna yanapayaptinmi, Onesmusqa precursor auxiliar këta puëdirqan.

Precursor regular këta munarpis tsënöllam sientikurqan. Peru juk kutichö Llapan junaqkuna Bibliapita yachakunapaq follëtuta leyinqanmi yanaparirqan. Y Salmu 34:8 textum karqan, kënömi nin: “Jehovä alli kanqanta rikäyë y kushikuyë”. Tsë textuman alli pensarirmi precursor regular kanampaq churakärirqan. Kananqa semänachö chusku kutim yachatsikoq yarqun y Bibliapita yachëkätsinqan atskaq nunakunam alli yachakïkäyan. Y 2010 watachönam Precursorkunapaq Escuëlaman ëwashqa. ¡Imaraq kushikurqan qallananchö yachatseqnin wawqikunapita juknin kaq escuëlachö yachatseqnin kaptin!

Teytankunaqa wanukuyashqanam, peru congregacionmi wananqanwan yanapan. Alläpam agradecikun imëka bendicionkunata chaskikanqampita, y alläpa kushishqam shuyaran “manam ni pï: ‘Qeshyämi’ ninqanatsu” nir Dios awnikunqan junaq chämunanta (Is. 33:24).