Diosqa parlëta yachaqtam nunakunata kamamashqantsik, tsëmi imanö sientikunqantsikta willëta puëdintsik. Diospa unë sirweqnin Davidmi kënö nirqan: “Pipis mañakushuptiki qam wiyankim. Llapan nunakunapis adorayäshunëkipaq qammanmi shayämunqa” (Salmu 65:2). ¿Imanöraq mañakushwan Diosnintsik wiyamänapaq?

Salmus 62:8 kënö nin: “Llapan shonquntsikwan pëta mañakushun”. Diosman mañakurqa, pitapis mana willëta puëdinqantsikkunatam pëta willëta puëdintsik. Y tsëtam alläpa gustan.

Diosman mañakurqa mëtsikaqmi niyan “Señor”, “Teyta Dios” y maskunata. ¿Imaraq rasumpa jutinqa? Kikin Diosmi jutin ima kanqanta Palabran Bibliachö nimantsik. Kënömi nin: “Noqaqa Jehovämi kä. Tsëmi jutï” (Isaïas 42:8, TNM). Bibliachöqa Diospa jutin 7 mil kutipitapis masmi yurin. Unë willakoqninkunapis pëman mañakurqa jutimpam mañakuyaq. Unë willakoqnin Abrahanpis kënömi mañakurqan: “Teyta Jehovä, ama cölerakullëtsu, yapë tapurillashqëki” (Genesis 18:30, TNM). Noqantsikpis Diosman mañakurninqa jutimpam mañakunantsik.

Quechuachö mañakushqapis Diosqa entiendimäshunmi. Tsënö kanqantam Palabranchö kënö nimantsik: “Kananmi sïqa rasumpa käyirï Diosqa llapantapis igualpa rikanqanta, y më nacionchöpis pëta mantsaqta y alli kaqta ruraqtaqa, pë chaskinqanta” (Hëchus 10:34, 35).

Diosnintsik yanapamänata munarqa manam mañakunantsikllatsu, sinöqa maskunatam ruranantsik. Tsëtam yachakurishun.