Yurirgä Paddington marcacho, Londres (Inglaterra) naciuncho. Mamanëwan y quimsa nanäcunawan tiyargä. Taytäga manami casupäcamarganchu, payga upiarla puricoj y munashgan hora wasimanpis chayamoj.

Pishilaraj caycaptë mamanëga yachachimargan chacaycunapa Diosta mañacunäpaj. Ichicnayla Bibliata charashcä, Salmos librulami caj y chaylapitami canciuncunata jorgoj cä cantarcunäpaj. Juc cuticho juc libruta leirmi cayta tarirgä: “Runaga mana musyanchu wara warantin cawananpaj cajtapis”. Chay palabracunata leirga alapa yarpachacurmi punuytapis puedirgächu. Shamoj tiempuman yarpar galaycurgä. Y quiquïmi tapucurgä: “Cawayga manami chaynochu canman. ¿Imapätaj cawä? ¡Wanuyta mana munargächu!”

Chaurasga brujucunapa ruraynincunata rurar galaycurgä, chaymi estudiaj masëcunawan shuntacaycur pantiuncunaman aywapäcurgä wanushgacunawan parlayta munar. Nircur paycunawan manchacaypaj peliculacunata ricapäcurgä, manchanaypaj captinpis ricarayta gustapäcamargan.

Chunca watayojla caycarmi, mana ali ruraycunatana ruraycargä. Cigarruta mucayta yachacurgä y tiempuwanga cachayta munargächu, nircur drogatapis shogayta galaycurgä. 11 watapana aywaycaptë upiaytapis yachacurgä, fiyu ashgaj captinpis shincash caytami gustamaj. Música wiyayta y tushuypis gustamaj, chaymi chacaycunapa fiestacunaman pacaylapa aywaj cä y pacha waraptinraj pipis mana ricamaptin wasëman yaycoj cä. Alapa utishga carmi escuelamanpis aywargänachu, y aywarpis estudiaj masëcunawan washcuta pacaylapa upiapäcoj cä.

Estudiücunata ushaycaptënami notäcuna mana ali cargan. Mamanëga manami musyarganchu mana alipa purishgäta, chaymi notäcunata ricaycur payga laquishga sienticurgan y rabiar gayapämargan. Chaurasga ishcäcuna rimanacushpämi wasëpita aywacurgä. Juc tiempupa Tony jutiyoj choluwan tiyargä, payga cargan suwacoj, drogata ranticoj y runacunaga reguipäcoj peliandero cashganta. Chaypitana 16 watapa aywaycaptë gueshyaj quedargä guechpa caj wambräta.

Jatun wasicho tiyaycaptë waccha warmicunawan y wamracunawanpis Jehovapa testiguncunata reguirgä. Ishcay warmicuna Jehovapa testiguncuna shapäcamoj Bibliapita yachachipäcunanpaj jipashlami wachapacojcuna warmicunata. Juc cuti yachachicuycashganman aywargä luta yachachicushganta ricachinäpaj. Chayno captinpis paycunaga ali shimilapa lapan tapucuynëcunata Bibliawan contestapäcamargan, paycuna yachaylapa y cuyaylapa tratamashgan. Chaymi paycunawan Bibliapita yachacuyta galaycurgä.

Bibliacho yachacuycashgämi cushichimargan. Wambra cashgäpita wanuyta manchargä, pero Bibliacho yachacurgä Jesús wanushgacunata yapay sharcachimunanpaj (Juan 5:28, 29). Jina tantiargä nogapäpis Dios yarpachacunganta (1 Pedro 5:7). Jeremías 29:11 texto nishgan shongüta cushichirgan. Chay texto caynomi nin: “Nogaga maynami yarpaycä gamcuna imano canayquipäpis. Gamcuna alli goyänayquipämi yarpaycä, manami ushacächinäpächu. Chauraga mananami imaypis ninquipänachu ‘imatanataj shuyäshäpis’ nir. Noga Tayta Diosmi chayno në (Tayta Diosninchi Isquirbichishan)”. Yarpar galaycurgä juc Shumaj Pachacho mana wanuypa cawanäpaj (Salmo 37:29).

Jehovapa testiguncunapa reuniunnincunaman aywar galaycuptë lapancunami shumaj chasquipäcamargan, paycunawan alimi sienticurgä, lapancunami cuyacuywan tratamargan (Juan 13:34, 35). ¡Waquin iglesiacunacho chaynoga manami tratamarganchu! Jehovapa testiguncunaga manami juzgamarganchu unaycho mana alicunata rurashgäpita. Paycunaga cuyacuywan y pacienciawan yachachipäcamargan, y tiempuntapis raquirgan yanapamänanpaj. Paycunawan familianomi sienticurgä.

Bibliata yachacuycaptëmi cuentata gocurgä cawaynëcho cambiucunata ruranäpaj, chaynopa Dios munashganno cawanäpaj. Manami facilchu cashga cigarro mucayta cachanäpaj, y cuentata gocurgä gustamaj musicacunaga mana ali cashganta, chaymi manana wiyargänachu chay musicacunata, ni fiestacunaman aywarganächu y upiaytapis jaguirirgämi. Ali amigunacunata ashirgä yanpamänanpaj alicunata ruranäpaj (Proverbios 13:20).

Chay wichanlacho Tonypis Jehovapa testiguncunawan Bibliapita yachacuycargan. Lapan tapucuynincunata Bibliawan contestaptinmi, payga cuentata gocurgan yachachicushgan rasunpa cashganta. Chaymi mana ali amiguncunawan manana purirgannachu, suwacurgannachu, cigarro y drogata shoguytapis cacharirgan. Jinamanpis Jehová munashganno cawapäcunäpaj y wamräta ashmapäcunäpaj 1982 watacho decidipäcurgä casacärinäpaj.

La Atalaya y ¡Despertad! * revistacunachomi ashej cä leinäpaj waquincunata Biblia yanapashganta cambiananpaj. Paycuna wilacushganmi yanapamashga calpachacunäpaj mana ali ruraynëcunata jaguirinäpaj. Jehovata cutin cutin mañacoj cä pacienciawan yanapamänanpaj. Julio quilla, 1982 watachomi Tonywan ishcanë bautizacärirgä.

Jehovata reguishgämi yanapamargan wanuypita salvacunäpaj. Payga yanapamargan Tonywan imayca mana alicunata aguantapäcunäpaj. Yachacärirgä imayca problemacunapa pasarpis Jehovalaman yaracärinäpaj, payga nogacunata imaypis yanapäcamargan (Salmo 55:22).

Alapa cushicärirgä wambräcunata yachachipäcushgäpita Jehovata sirvipäcunanpaj. Cushishgami sienticö wilcäcuna Jehovapita yachacäriptin.

Cananga manami alapa yarpachacönachu shamoj tiempupaj ni imano wanunäpaj cajtapis. Tonytami yanagä Jehovapa testiguncunapa congregaciuncunata watucanäpaj, chaynopa hermanunchicunata animarcunäpaj y runacunata Bibliapita yachachipäcö paycunapis salvacärinanpaj.