TUKUYPIS allin rikchʼayniyuq kayta munanchik, ¿icharí? Chayrayku wakinkunaqa, allin rikchʼayniyuq kayta munaspa pʼunchaypi juk kutillatapis espejopi qhawakunku, wakinkunataq astawan.

Bibliata ñawiriyqa, espejopi qhawakuywan kikinchakunman (Santiago 1:23-25). Biblia Diospa yuyaychasqan kasqanrayku, yuyaychaykunasninqa sunqunchikpi imayna runapunichus kasqanchikta reparachiwanchik. Chayrayku Hebreos 4:12 pʼiti nin: “Chay Palabraqa runaj sonqon ukhukamapuni chayan”, nispa. Ajinamanta Bibliap yuyaychaykunasninqa, kawsayninchikpi imatachus allinchananchik kasqanta rikuchiwanchik.

Astawanpis imaynatachus chayta ruwanata sutʼinchallawanchiktaq. Apóstol Pablo nirqa: “Diosmanta tukuy Qhelqasqaqa paypa yuyaychasqan kaspa, may sumaj kashan yachachinapaj, juchata reparachinapaj, cheqa kajman kutirichinapaj, cheqanta kawsayta yachachinapaj ima”, nispa (2 Timoteo 3:16, 17). Kay pʼitipi “juchata reparachinapaj, cheqa kajman kutirichinapaj, cheqanta kawsayta yachachinapaj” rimaykunaqa, Bibliap yuyaychaykunasnin kawsayninchikta tikrananchikpaq may sumaq kasqanta rikuchiwanchik. Allin rikchʼayniyuq kayta munasqanchikrayku sapa pʼunchay espejopi qhawakunchik chayqa, ¿manachu sapa pʼunchay Bibliata ñawirinanchik kanman Diospa ñawpaqinpi allin runas kananchikpaq?

Jehovaqa, Israel llaqtata kamachinanpaq Josueta churachkaspa, payman jinata nirqa: “Kay libropi Diospa leyninmanta kajtaqa willaypuni kʼiskimanta. Tuta pʼunchay unanchay kay libropi, imatachus nisqanta ruwanaykipaj, ajinamanta tukuy ima ruwasqaykipi allin risunampaj”, nispa (Josué 1:8). Arí, allin kamachiq kananpaq Josueqa, Diospa Palabranta “tuta pʼunchay”, nisunman, sapa pʼunchay ñawirinan karqa.

Chantapis Salmo 1:1-3 pʼitikunaqa, sapa pʼunchay Bibliata ñawiriy, allin kasqanta rikuchillantaq, nintaq: “Kusikuyniyojmin runaqa sajra runaspa yuyaychasqankuta mana japʼikojqa, juchasapaspa ñanninkutapis mana qhatejqa, Diosmanta asikojkunawampis mana khuskachakojqa. Manachayqa, Diospa kamachisqampi pay sonqonta churan, chay kamachisqampitaj tuta pʼunchay unanchan. Chay runaqa mayu kantupi sachʼa jina, tiempompi poqoj, laqhesnenqa qʼomerllapuni, manataj qawinchu. Tukuy ima ruwasqanqa ñawpajman rin allinta”, nispa. Tukuyninchik, kay salmomanta runajina kawsayninchikpi tukuy imapi allin rinawanchikta munanchik, ¿icharí?

Chayrayku achkha runas, sapa pʼunchay Bibliata ñawirinku. Juk kuti juk cristianota imaraykuchus sapa pʼunchay Bibliata ñawirisqanta  tapurisqanku, paytaq jinata kutichisqa: “Sapa pʼunchay Diosmanta mañakuni chayqa, uyarinawantataq munani chayqa, ¿manachu ñuqapis sapa pʼunchay Bibliata ñawirispa, imatachus Dios niwasqanta uyarinay kanman?”, nispa. Arí, Bibliata ñawiriyqa, imatachus Dios yuyaychawasqanchikta uyarichkasunmanpisjina kanman.

Ichapis Bibliata sapa pʼunchay ñawirinaykipaq juk horariota ñawpaqta ruwakurqankiña. Génesis libromantapacha, Apocalipsis librokama ñawiriyqa, Bibliamanta astawan yachakunapaq may allin. Chaywanpis wakinkunaqa, ajinata ruwayta qallarispapis mana Bibliamanta tukuynin librosninta ñawiriyta atirqankuchu. ¿Qamri? ¿Bibliamanta tukuynin librosninta ñawiriyta atirqankichu? Mana jina kaptin, Bibliamanta tukuynin librosninta ñawirinaykipaq iskay yuyaychaykunata rikuchisusqayku.

Ima horapichus ñawiriyta munasqaykita akllay. Ima horapichus Bibliata ñawiriyta munasqaykita akllaytawankama, ima wak horapichus ñawiriyta munasqaykita akllallaytaq, jinamanta wakin kuti ñawpaqta akllasqayki horapi mana ñawiriyta atispaqa, chay wak akllasqayki horapi ñawirinaykipaq. Ajinata ruwaspataq sapa pʼunchay Bibliata ñawiriyta atinkipuni, Bereamanta runasjina ruwachkasqaykitataq rikuchinki, imaraykuchus paykunaqa, “Diospa Palabranta tukuy sonqo japʼikorqanku. Sapa pʼunchay Diosmanta Qhelqasqata allinta qhawaspa, waturerqanku Pabloj yachachisqan cheqachus manachus kasqanta” (Hechos 17:11).

Imaynatachus Bibliata ñawirinaykita sumaqta akllay. Juk watapi Bibliata ñawiriyta tukuyta munanki chayqa, sapa pʼunchay kimsa chayri phichqa tʼaqasta ñawirinayki kanqa. Qhipan paginaspi, imaynatachus chayta ruwanata sutʼinchakuchkan. ¿Chaypi nisqanmanjina ruwayta atiwaqchu? Chaypaqqa, maypichus “Fecha” nisqa rimay rikhurin chay uranpi maykʼaqchus Bibliamanta chay tʼaqasta ñawiriyta munasqaykita qillqay, ñawiriyta tukusqaykimanjinataq juchʼuy cuadritoman raqhaykuy. Jinamanta machkhatañachus ñawirisqaykita yachayta atinki.

Bibliamanta tukuynin librosninta ñawiriyta tukuspapis, sapa wata Bibliamanta tukuynin librosninta ñawiriyta atiwaq, chaypaqqa ichá yuyaychasusqaykumanjina watiqmanta ruwallawaqtaq, ichá Bibliamanta wak libronmantañataq qallarispa. Chantapis allillanmanta ñawirinaykipaq imatachus juk pʼunchaypi ñawirinayki kasqanqa iskay chayri astawan pʼunchaykunapi ñawiriwaq.

Diospa Palabranmanta tukuynin librosninta achkha kutita ñawirispapis, sapa ñawirispa, kawsayninchikpi yanapanawanchikpaqjina juk yuyaychayta tarisunchikpuni. ¿Imaraykutaq? Imaraykuchus kay pachap tukukuynin astawan qayllaykamuchkasqanmanjina, tukuy imaymana llakiykunapi rikukunchik (1 Corintios 7:30, 31). Chayrayku sapa pʼunchay Bibliata ñawiriypuni, jinamanta sapa pʼunchay imatachus Jehová Dios nisusqanta uyarinaykipaq (Salmo 16:8).