Wakin kuteqa mana yachanchejchu llakisqa kajta imaynatachus yanapananchejta. Nillataj yachachejchu imatachus ninanchejta chayri ruwananchejta. Chayrayku jinalla qhepakunchej. Chaywanpis, ¿imaynasmantá yanapasunman?

Wakin kuteqa chaypi kanallanchejta necesitanku, “noqapis llakisqa kashani” ninanchejtataj. Wakin lugarespeqa abrazaykurispa chayri makinkumanta qʼapirispa, llakisqa kajkunata munakusqankuta rikuchinku. Llakisqa kaj parlariyta munan chayqa, sumajta uyariy. Chayri imatachus mana ruwayta atisqanpi yanapariwaj; waykʼuspa, wawasta qhawaspa chayri wañusqata pʼampanapaj imaschus ruwana kasqanpi yanapariwaj, pay munajtenqa. Ajinamanta yanapariy aswan sumaj, parlanallanchejmantaqa.

Tiemponmantaj ichá llakisqa kajwan, wañupojmanta parlariyta munawaj, kʼacha kasqanmanta yuyarikuspa chayri imastachus ruwasqanmanta. Ajinata parlarispaqa kusirikunanpaj yanapawaj. Ajina karqa Pam sutiyoj warmiwan, paypa qosan wañupusqanmanta sojta wataña pasan. Pay nin: “Runasqa imastachus qosay ruwaj karqa chaymanta willariwanku, wakintaqa ni yacharqanipischu,  ajinata parlariwasqankoqa mayta kusichiwan”, nispa.

Wakin doctores nisqankuman jina wañupojkunaj familiaresninkuta qallariyllapi yanapasqankuta. Chaymantataj amigosninkoqa, yanapata necesitallasqankutapuni qonqapusqankuta. Chayrayku llakiypi kajkunaman llakikusqanchejta rikuchinapajqa, parlarinallapuni. * Ashkhasqa, chay llakiypi rikukusqankumanta unayña pasajtinpis parlarisqanchejmanta mayta agradecekunku.

Japón suyumanta Kaori sutiyoj sipasmanta parlarina. Paypataqa maman wañuporqa, 15 killasninmantaj hermananñataj. Chayrayku sapitan qhepakorqa. Jinapis amigosnin yanaparerqanku. Ujnin amiganqa Ritsuko sutiyoj, paymanta aswan kuraj kasqanrayku, wawanta jina qhawananta nerqa. Kaori nin: “Mamay jina kayta munasqanqa, mana gustawarqachu. Ni pi mamay jinaqa kanmanchu. Chaywanpis may kʼacha noqawan kasqanqa mamayta jina munakunaypaj yanapawarqa. Sapa semana willayman, tantakuyman ima khuska rej kayku. Tecitota tomarinaykupaj wajyariwaj, mikhunatapis apanpuwaj, tarjetasta, cartasta qhelqamuwaj. Ritsuko ‘mamay’ noqawan kʼacha kasqanqa mayta yanapawarqa”, nispa.

Kaorij maman wañupusqanmantaqa 12 watasña pasan. Kunantaj qosanwan khuska Bibliamanta yachachinankupaj astawan tiempochakunku. Pay nin: “Ritsuko ‘mamayqa’ noqamanta llakikullanpuni. Wasiyman kutispaqa, visitarej rini, paywan kashaspaqa kusisqa kani”, nispa.

Poli, pichus Chipre nisqamanta, Jehovaj testigontaj, wajkuna yanaparisqanku may allin kasqanta nillantaj. Qosanqa Sozos sutikorqa, kʼacha runa karqa, payqa congregacionta ñaupajman apaj jina sumajta ruwaj. Imajtinchus congregacionmanta wajchasta, viudasta ima wasinman mikhurinankupaj wajyarej (Santiago 1:27). Chaywanpis 53 watayoj kashaspa wañuporqa umanmanta sinchʼita onqoykusqanrayku. Poli nin: “Qosaywanqa 33 watasta khuska kausakorqayku”, nispa.

Poliqa qosanta pʼampasqankutawan Canadá suyuman sullkʼa wawan Danielwan riporqanku, payqa 15 watayoj. Chay lugarpi kaj testigoswantaj tantakorqanku. Pay nin: “Chay congregacionmanta kajkunaqa mana yacharqankuchu ima llakiykunapichus rikukusqaykuta. Chaywanpis kʼachamanta parlapawarqayku, yanapawarqaykutaj. Chayqa may sumajpuni karqa wawaypaj, imajtinchus payqa tatanta mayta faltachasharqa. Congregacionta ñaupajman apajkuna Danielta mayta yanaparqanku. Paykunamanta ujnintaj wajkunawan khuska kusirikunanpaj, pelotawan pujllaj rinanpaj ima wajyarejpuni”, nispa. Kunanqa Poli, wawan Danielwan kusisqa kashanku.

Rikunchej jina llakisqasta tukuy imaymanamanta yanapayta, sonqochayta ima atisunman. Bibliaqa mayta sonqochawanchej, imajtinchus uj sumaj suyakuymanta willawanchej. Qhepan yachaqanapitaj chaymanta yachakusun.