Llampʼu sonqo runasqa wajkunata respetanku, mana runaykachankuchu, nitaj suyankuchu wajkunawan allinpaj qhawachikuyta. Astawanpis wajkunaj allinninkuta maskʼanku, paykunamanta yachakunankupajtaj kallpachakunku.

Wakin runasqa yuyanku llampʼu sonqo runas manchalis kasqankuta. Chaytaj mana jinachu. Imajtinchus llampʼu sonqo runasqa, reparakunku maykamallachus ruwayta atisqankuta, pantaj runas kasqankutataj.

• Amigosniyoj kanapaj yanapawanchej. La epidemia del narcisismo libro nin: “Llampʼu sonqo runasqa tukuywan sumajta apanakunku. Wajkunawan parlariytapis atillanku”, nispa.

• Wawasta yanapanqa kausayninkupi allin rinanpaj. Llampʼu sonqoyoj kayta yachakoyqa wawasta yanapanqa wawasllaraj kashajtinku, wiñajtinkuñapis. Doctor Leonard Sax nerqa: “Jatunchakoj jovenqa trabajota maskʼashaspa mana tariyta atillanqachu. Llampʼu sonqoyoj kajtajrí ichapis tariyta atillanqa”, nispa. *

Maychus kajllata yuyanankupaj yanapana

BIBLIA NIWANCHEJ: “Pillapis mana ima kaspa may kasqanta yuyakun chayqa, pay kikinta chʼaukiyakushan”, nispa (Gálatas 6:3).

• Ama wawasman qhasillata creechinachu. Tatasqa wawasninkuman ichá ninku: “Tukuy ima munasqaykita ruwayta atinki”, nispa. Chay nisqankoqa ichá allillanman rijchʼakunman, chaywanpis mana jinachu. Wawastaqa allin renqa, imatachus ruwayta atisqankuman jinalla ruwanankupaj kallpachakojtinku.

• Allinta ruwajtinkoqa, sumajta ruwasqankuta nina. Tatasqa wawasninkuta ni pi qan jinaqa kanchu nispa, mana yanapankuchu llampʼu sonqo kanankupaj. Chayrayku kallpachakunanku tiyan sutʼita imamantapis allinta ruwasqankuta ninankupaj.

• Tatasqa qhawarinanku tiyan wawasninku Internetpi imastachus qhawasqankuta chayri churasqankuta. Runasqa redes sociales nisqaman yaykunku allinpaj qhawachikunankupaj chayri imatapis ruwasqankuta rikuchinankupaj. Chayta ruwaspaqa jatunchakushanku.

•   Wawas pantajtinku perdón ninankuta yachachina. Tatasqa wawasninku pantaykojtinku, pantaykusqankuta reparanankupaj yanapananku tiyan.

Agradecekuyta yachachina

BIBLIA NIWANCHEJ: “Agradecekuychejpuni”, nispa (Colosenses 3:15).

• Diospa ruwasqasninmanta. Wawasqa yachananku tiyan Diospa ruwasqasninta jatunpaj qhawayta. Reparachina kausakunapajqa aireta, yakuta, mikhunata imaqa necesitasqanchejtapuni. Ajinamanta paykunaqa Diospa ruwasqasninmanta agradecekonqanku, jatunpajtaj qhawanqanku.

• Wajkuna kʼachas kasqankumanta. Wawasman yachachina wajkunata aswan kurajta jina qhawanankuta, paykuna jinataj kʼacha kanankuta, envidiakunankumantaqa.

• Agradecekuyta yachachina. Wawasman yachachina sonqomantapacha agradecekuyta. Llampʼu sonqo kanapajqa agradecekunapuni.

Wajkunata yanapariyta yachachina

BIBLIA NIWANCHEJ: “Kʼumuykukoj sonqo kaspa, wajkunata qankunamanta aswan kurajta jina qhawaychej. Ama allinnillaykichejtaqa maskʼaychejchu. Manachayqa wajkunaj allinninkutapis maskʼaychej”, nispa (Filipenses 2:3, 4).

• Wawasta yachachina wasipi yanapakunankuta. Wawasta wasipi ni imata ruwachispaqa, kaytapis nishasunman jina: “Qanqa patroncito kanki, waj ruwachun”, nispa. Wawasqa wasipi ruwanastaraj ruwananku tiyan pujllanankumantaqa. Reparachina wasipi yanapakusqankoqa sumaj kasqanta. Ajinamanta wajkunawanpis munachikonqanku.

• Reparachina wajkunata yanapay sumaj kasqanta. Wawas wajkunata yanapajtinkoqa, wiñay tukusqa runas jina yuyanqanku. Chayrayku wawaykiwan piensariychej yanapata necesitajkunapi, imaynatatajchus yanaparinanpi. Wawas wajkunata yanaparejtinkoqa, allinta ruwasqankuta nina.