Bibliaqa niwanchej qorikuyta yachananchej kasqanta, manataj iskay sonqollachu, manaqa tukuy sonqo. Chayta ruwaspaqa mana wajkunallatachu kusichisun, manaqa noqanchejpis kusisqallataj kasun (Proverbios 11:25; Lucas 6:38). Jesús nerqa: “Aswan kusisqa kanchej wajman qorispa, qorichikunamanta nisqaqa”, nispa (Hechos 20:35).

•  ¿Ima kutispitaj qorisqanchejwan Diosta kusichinchej?

•  ¿Ima kutispitaj qorisqanchejwan Diosta mana kusichinchejchu?

•  Qorikuymanta parlaj versículos

 Imatapis tukuy sonqo qojtinchej. Bibliaqa nin: “Sapa uj sonqonpi yuyasqanman jina ruwachun, mana llakikuspa, nitaj obligasqa jinachu. Imaraykuchus Diosqa kusiywan qojta munakun”, nispa (2 Corintios 9:7).

 Diosqa munan payta yupaychajkuna, tukuy sonqo qorikuyta yachananchejta (Santiago 1:27). Pisichikojman imatapis qorispaqa, Diosman manurishanchej. Paytaj kutichipunawanchejta nin (Proverbios 19:17). Bibliaqa nin wajkunaman qorejtinchej, Dios bendecinawanchejta (Lucas 14:12-14).

 Imata japʼiyta munasqanchejraykulla qorejtinchej. Kaykuna kanman:

•   Wajkunawan alabachikunapaj qojtinchej (Mateo 6:2).

•   Kutichipunawanchejta suyaspa qojtinchej (Lucas 14:12-14).

•   Salvacionta tarinapaj qojtinchej (Salmo 49:6, 7).

 Diospa chejnisqan imasta ruwanankupaj qojtinchej. Mana allinchu kanman, pimanpis qolqeta qonanchej machaykunanpaj, drogakunanpaj, chayri waj sajra imasta ruwananpaj (1 Corintios 6:9, 10; 2 Corintios 7:1). Manallataj allinchu kanman qolqeta qhella runasman jaywananchej, pikunachus atishaspa mana trabajankuchu, chaykunaman (2 Tesalonicenses 3:10).

 Wajkunaman qorinanchejrayku familianchejman faltachejtinchej. Bibliaqa nin, qosaspis tataspis familiankuman ni imata faltachinankuchu kasqanta (1 Timoteo 5:8). Mana allinchu kanman tatas chayri qosas, wajkunaman qorinankurayku familiankuman pisichinanku. Jesuspa tiemponpi wakin runasqa, machuyasqa tatankuta, mamankuta mana yanapanankurayku, qolqenku “Diospajña tʼaqasqa” kasqanta nej kanku. Jesustaj chay ruwasqanku, mana allinchu kasqanta nerqa (Marcos 7:9-13).