Uj casada warmeqa qosanta pornografiata qhawashajta taripaykorqa. Qosantaj kutin kutita nerqa: “Perdonariway, manañapuni chayta qhawasajchu”, nispa. Nisqanta juntʼarqapunitaj. Jinapis tiemponmanqa watejmanta pornografiata qhawayta qallarerqa.

 Qanpis, ¿nichu pornografiata saqeyta atishanki? Ajina kajtenqa, entiendenayki tiyan chay ruwasqayki imaynatachus warmiykej sonqonta nanachisqanta. Chantapis yachanayki tiyan imaynatachus chay millay viciota saqenaykita. a

Kay yachaqanapi kay imasta yachakunki:

•  Kayta yachana

•  ¿Imatá ruwasunman?

•  Qosayki pornografiata qhawajtin

 Pornografiata qhawayqa qhariwarmi kausayta tʼaqanachin. Uj qosa pornografiata qhawan chayqa, señoranqa mayta sientekunman, niñataj qosanpi confianmanchu. b

 Uj qosa pornografiata qhawan chayqa, warmenqa kay jina sientekunman:

•   Engañasqa. Uj warmi Sarah sutiyoj nin: “Qosay pornografiata qhawasqanqa kutin kutita waj warmiswan engañashawanmanpis jina karqa”.

•   Ni imapaj valesqanta. Uj warmeqa qosan pornografiata qhawasqanrayku mana kʼachitachu kasqanta yuyaj, ni imapaj valesqantataj.

•   Mana qosanpi confiayta atinchu. Uj warmi Helen sutiyoj nin: “Mana qosaypi confiayta atillanichu, sapa rato pornografiata qhawashasqanta yuyani”.

•   Ancha llakisqa. Catherine nin: “Qosay pornografiata qhawasqanta yachayqa manchaytapuni llakichiwaj”.

 Kaypi piensariy: Bibliaqa nin qosasqa warminkuta munakunanku kasqanta (Efesios 5:25). Jinapis qan pornografiata qhawaspa, ¿niwajchu warmiykita munakushasqaykita?

 Pornografiata qhawaytaqa mana saqeyta atikullanchu. Stacey nin: “Qosayqa saqeyta atillarqa cigarrota, marihuanata, alcoholtapis. Jinapis pornografiata qhawaytaqa mana saqeyta atishallanchu”.

 Sichus qanpis pornografiata qhawayta mana saqeyta atishankichu chayqa, kay yuyaychaykuna yanapasunkiman chay millay viciota saqenaykipaj.

•   ¿Entiendenkichu imaraykuchus pornografiata qhaway millay ruway kasqanta? Pornografiata qhawaj runaqa payllapi yuyan, sajra munayninwantaj atipachikun. Chayrayku matrimonionpi niña kusisqachu kausakunku, imajtinchus niña munakuypis, confianzapis, respetopis kanchu. Chantapis pornografiata qhawajqa Jehovata pisipaj qhawan, imajtinchus pay qhariwarmi kausayta rikhuricherqa.

   Biblia niwanchej: “Qhariwarmi kausaytaqa tukuypis jatunpaj qhawachunku” (Hebreos 13:4).

•   Ruwasqaykimanta ama wajkunata juchachaychu. Ama niychu: “Warmiychus aswan kʼacha noqawan kanman chayqa, mana pornografiata qhawaymanchu”, nispa. Warmiykita juchachayqa mana allinchu, chayta nispaqa achakisllata churashanki pornografiata qhawanaykipaj.

   Biblia niwanchej: “Sapa ujta munaynillantaj pruebaman churan sonqonta aysaspa, suwaspataj” (Santiago 1:14).

•   Warmiykiman ama ni imata pakaychu, willariypuni tukuy imata. Kevin nin: “Warmiymanqa sapa día willarini imaynachus riwasqanmanta. Millay imas rikhurimuwajtin qhawasqaytachus chayri chay rato waj ladota qhawasqaytachus willani. Warmiyman tukuy imata willasqayrayku, payqa mana yuyanchu imallatapis pakaypi ruwashasqayta”.

   Biblia niwanchej: ‘Tukuy imapi allintapuni puriyta munayku’ (Hebreos 13:18).

•   Ama watejmanta urmanaykipaj wakichisqa kay. Pornografiata ashkha watastaña niña qhawajtiykipis, chay millay viciota atipasqaykitaña yuyajtiykipis, watejmanta chaypi sonqoyki urmachisunkiman. Chaymanta parlaspa Kevin nillanpuni: “Chunka watasta mana pornografiata qhawarqanichu. Yuyarqanitaj chay millay viciota atipasqaytaña. Jinapis chaytaqa mana qonqasqanichu, uj sajra animal jinataj noqapi kasharqa pantachinawanpaj”.

   Biblia niwanchej: “Pichus sinchʼita sayashasqanta yuyakojqa, allinta qhawakuchun ama urmananpaj” (1 Corintios 10:12).

•   Ama sajra munayninchejwan atipachikunachu. Ichá sonqoyki pornografiata qhawayman aysasunkiman, jinapis qanmanta kashan chayta qhesachanayki chayri mana. Sichus uj sajra munaywan aysachikushaspa chay rato waj imapi yuyanki chayqa, usqhayllata chay sajra yuyayninchej chinkanman.

   Biblia niwanchej: ‘Sapa ujniykichej yachanaykichej tiyan, imaynatachus cuerpoykichejta kamachiyta. Ajinamanta cuerpoykichej llimphullapuni kananpaj, allinpaj qhawasqa, amataj sinchʼi munapayaywan qʼoñirisqa kananpaj’ (1 Tesalonicenses 4:4, 5).

•   Urmachisunanpaj jina kaj imasmanta karunchakuy. Querer no es poder nisqa libropi ajinata nin: “Uj fosforota japʼichispañaqa […] uj chhika gasolinalla necesitakun ashkha imasta qʼolaykuchinapaj. Ajinallataj kanman uj tentacionpi urmanapaj jina kashajtinchej”. Chay kutipeqa tumpitapaj kashanchej juchaman urmaykunapaj.

   Biblia niwanchej: “Ama saqeychu ima sajrapis apaykachanawanta” (Salmo 119:133).

•   Matrimonioykipi watejmanta allinta kausakuwaj. Warmiyki watejmanta qanpi confiananpajqa, ichapis watas pasanan kanqa. Chaywanpis ashkha qhariwarmisqa ajinapi tarikuspa watejmanta allinta kausakuyta aterqanku.

   Biblia niwanchej: “Munakuyniyoj runaqa pacienciayoj” (1 Corintios 13:4).