Tudu jintis tene nomi. Sera ki i ka normal pa Deus tene tambi nomi? Tene nomi i usal i un kusa importanti na un amizadi. Sera ki dibi di sedu diferenti ora ki na trata di no amizadi ku Deus?

Na Biblia, Deus fala: “Ami i SIÑOR [“Jeova”, NM]; es i ña nomi.” (Isaias 42:8) Apesar di i tene tambi manga di titulus suma “ku ten tudu puder”, “Siñor”, “Kriadur”, Deus onra si servus atraves di kumbida elis pa e usa si propi nomi. — Kumsada 17:1; Atus 4:24; 1 Pedru 4:19.

Manga di tradusons di Biblia tene nomi pesual di Deus na Saida 6:3. Es testu fala: “N bai pa Abraon ku Isaki ku Jakó suma Deus ku ten tudu puder, ma N ka disa elis pa e kunsin pa ña nomi SIÑOR [“Jeova”, NM].”

Jeová i forma di nomi di Deus na Purtugis ku usadu pa manga di sekulus. Manga di spesialistas pirfiri usa “Yahweh,” ma Jeova i un forma di si nomi ku mas rukuñisidu. Purmeru parti di Biblia ka skirbidu na Purtugis ma na lingua ebraiku, es lingua ta leidu di direita pa skerda. Na es lingua, nomi di Deus skirbidu ku kuatru konsuanti, יהוה. Es kuatru letras ebraiku — skirbidu ku es letras YHWH — kunsidu suma Tetragrama.