IREN MEHN KASUKUHL 01

Ia Duwen Paipel Eh Kak Seweseiuk?

PLAY

Kitail koaros kin men ese ia katepen mour, dahme kahrehda kin mie lokolok, ia wasa kitail pahn kohla ie mwurin mehla oh dahme pahn wiawi ni ahnsou kohkohdo. Kitail pil kin anahne sawas pwehn apwalihala atail kahpwal kan, me duwehte ia duwen atail pahn alehdi mwohni pwehn apwalihala atail anahn akan de ia duwen atail pahn kak ahneki peneinei nsenamwahu. Aramas tohto esehda me Paipel sohte kin sapengalahte ar peidek kesempwal kan me pid duwen mour ahpw e pil kin kihong irail kaweid mwahu kan me pid ar mouren ehuehu rahn. Ia duwe, mie emen me ke ese me Paipel kak sewese?

1. Ia ekei peidek kan me Paipel kin sapengala?

Paipel kin sapengala peidek pwukat: Ia duwen mour eh tepida miehla? Ia katepen mour? Dahme kahrehda aramas mwahu kan kin lokolok? Dahme kin wiawi ni aramas emen eh kin mehla? Ma aramas koaros men ahneki popohl, dahme kahrehda mahwen tohto kin wiawihki? Dahme pahn wiawihong sampah ni ahnsou kohkohdo? E sohte sapwung en idek soangen peidek pwukat, oh aramas tohto diaradahr pasapengpen ar peidek kan nan Paipel me uhdahn sewese irail.

2. Ia duwen Paipel eh kak sewesehkin kitail atail mouren ehuehu rahn?

Paipel kin kihong kitail kaweid mwahu. Karasepe, e kin padahkihong peneinei kan ia duwen ar pahn kak ahneki mour nsenamwahu mehlel. E kin sewese kitail en ese dahme kitail kak wia ni atail kin pwunod oh ia duwen atail kak perenki atail doadoahk. Ke pahn sukuhlki dahme Paipel kin padahngki duwen ire pwukat oh pil soahng tohto ni ata koasoiapene pwuhk wet. Ele ke pahn pwungki me “Nting Sarawi unsek [soahng koaros nan Paipel]” kin “mwahu” ong kitail.—2 Timoty 3:16.

Pwuhk wet sohte wiliandi Paipel. Ahpw e kin seweseiuk en pein kasawih Paipel. Eri se kangoangeiuk en wadek iren Paipel kan me kileldi nan iren mehn kasukuhl pwukat oh kapahrekiong mepwukat ong dahme ke sukusukuhlki.

KALAUDEHLA OMW ESE MET

Sukuhlki ia duwen Paipel eh sewesehier aramas akan, oh ia duwen omw kak perenki wadek, oh dahme kahrehda e mwahu ken peki sawas pwe ken wehwehki Paipel.

3. Paipel kak kaweid kitail

Paipel rasehng dengki marain ehu. Kitail kak doadoahngki pwehn kasalehiong kitail duwen atail pahn wiahda pilipil mwahu kan oh sewese kitail en ese dahme pahn wiawi ni ahnsou kohkohdo.

Wadek Melkahka 119:105, oh mwuri koasoiapene peidek pwukat:

Dahme sounnting en melkahka menet kin medewehki Paipel?
Dahme ke kin medewehki Paipel?

4. Paipel kak sapengala atail peidek kan

Emen lih diarada me Paipel sapengala eh peidek kan me e kin wie medemedewe sounpar tohto. Kilang KISIN KASDO, oh mwuri koasoiapene peidek pwukat.

KISIN KASDO: Never Give Up Hope! (1:48)

Sang nan kisin kasdou, soangen peidek dah kan me liho ahneki?
Ia duwen onop Paipel eh sewese ih?

Paipel kin sewese kitail en idek peidek kan. Wadek Madiu 7:7, oh mwuri koasoiapene ire pwukat:

Soangen peidek dah kan me ke ahneki me mweinele Paipel kak sapengala?

5. Ke kak perenki wadek Paipel

Aramas tohto kin perenki wadek Paipel oh re kin paiekihda ni ar wadek. Kilang KISIN KASDO, oh mwuri koasoiapene peidek pwukat.

KISIN KASDO: Bible Reading (2:05)

Sang nan kisin kasdou, ia en me pwulopwul kan pepehm duwen wadawad?
Mendahki ar sohte perenki wadawad, dahme kahrehda re men wadek Paipel?

Paipel mahsanih me e kak kihong kitail kaweid me kin kansenamwahwih kitail oh kihong kitail koapworopwor. Wadek Rom 15:4, oh mwuri koasoiapene peidek wet:

Ke men ese duwen inoun Paipel me kin kansenamwahu oh kihda koapworopwor?

6. Meteikan kak sewese kitail en wehwehkihla Paipel

Me tohto diarada me e kin sawas ma re kin iang meteikan koasoiapene Paipel likin ar pein wadek. Wadek Wiewia 8:26-31, oh mwuri koasoiapene peidek wet:

Ia duwen atail kak wehwehkihla Paipel?—Kilang iretikitik 30 oh 31.

Ohlen Idiopiao anahne sawas pwehn wehwehkihla Paipel. Aramas tohto diarada me e kin sawas ma re kin iang meteikan koasoiapene Paipel

EKEI ARAMAS KIN NDA: “Onopki Paipel kin kauwehla mwahl ahnsou.”

Ia omw madamadau? Dahme kahrehda?

DAHME KE SUKUHLKIER

Paipel kin kihda kaweid mwahu ong mouren ehuehu rahn, kin sapengala peidek kesempwal kan oh kin kansenamwahwihala aramas oh kihong irail koapworopwor.