Wiewia 8:1-40
8 Sohl eri pwungki eh kamakamala.
Ni rahnohte, kalokolok laud ahpw lelohng mwomwohdiso me mi nan Serusalem; tohnpadahk koaros, likin wahnpoaron ko, ahpw tangpeseng wasa koaros nan sapwen Sudia oh Sameria.
2 Ohl poadidi kei ahpw wahla Stipen pwe ren sarepedi oh re sengisengki laud.
3 Ahpw Sohl tepida kauwehla mwomwohdiso. E kin pedolongete nan ehuehu ihmw oh wurahdekiei ohl oh lih akan koaros oh kihirailong nan imweteng.
4 Ahpw irail ko me tangpeseng lella wasa koaros nan sahpw ko oh lohlohkiseli rongamwahu en mahsen en Koht.
5 Pilip eri kohdilahng kahnimw* en Sameria oh tepida kalohkihong irail duwen Krais.
6 Irail koaros me pokonpene ahpw kin tehk mwahu dahme Pilip koasoia ni arail kin rong oh kilang kilel kan me e kin wiahda.
7 Pwe mie aramas tohto me ngehn saut tiada pohrail, oh ngehn saut ako kin weriwer laud oh pedoisang irail. Oh aramas tohto me mwoator oh dangepel pil mwahula.
8 Eri peren laud ahpw kipehdi kahnimwo.
9 Eri mie ohl emen nan kahnimwo me ede Saimon, me kin wia akmanaman mahs oh kin kahrehiong tohn Sameria en pwuriamweikihla, oh kin kose me ih emen aramas lapalap.
10 Irail koaros, sang me keieu tikitik lel me keieu lapalap, kin tetehk ih oh nda: “Ohl menet iei Roson en Koht, me adaneki Manaman Lapalap.”
11 Eri irail kin wauneki ih pwehki ahnsou reirei me e kin kahrehiong irail en pwuriamweikihla eh akmanaman kan.
12 Ahpw ni arail kamehlelehla Pilip me kin kalohki rongamwahu en Wehin Koht oh mwaren Sises Krais, ohl oh lih akan ahpw kin papidaisla.
13 Pein Saimon pil pwosonlahr, oh mwurin eh papidaisla, e kin mihmihte rehn Pilip; oh e kin pwuriamweikihla eh kilang kilel kan oh doadoahk manaman laud kan me kin wiawi.
14 Ni ahnsou me wahnpoaron ko nan Serusalem rongada me mehn Sameria kamehlelehla mahsen en Koht, re ahpw kadarala Piter oh Sohn rehrail;
15 ira ahpw kohdihla oh kapakapkin irail pwe ren ale sapwellimen Koht manaman.*
16 Pwe re papidaislahr ni mwaren Kaun Sises, ahpw manamano saikinte ti pohrail.
17 Eri, ira pwil pehra ko pohrail, irail ahpw tepida ale sapwellimen Koht manaman.*
18 A ni ahnsou me Saimon kilangada me irail ale manamano* ni wahnpoaron ako ara kin pwil pehra ko pohrail, e ahpw kihong ira mwohni,
19 oh nda: “Pil kihong ie manaman wet, pwe mehmen me I pahn pwil pehi kat powe en ale sapwellimen Koht manaman.”*
20 Ahpw Piter ndaiong: “Noumw mwohni silperen en iang uhk sohrala, pwehki omw medewe me ke kak alehki mwohni sapwellimen Koht kisakis.*
21 Sohte pwaisomw de omw tungoal nan ire wet, pwe omw mohngiong sohte kin inen mwohn silangin Koht.
22 Eri koluhkihla omw lamalam suweden, oh kapakapohng Siohwa* ni ngidingid, pwe ma kak, a en ketin mahkikihong uhk widing en omw mohngiong;
23 pwe I kilang me ke duwehte pwoisin katik* oh lidun me suwed.”
24 Saimon eri sapeng ira nda: “Kapakapkin ie rehn Siohwa* ni ngidingid pwe soahng pwukat me kumwa ndaier en dehr lelohng ie.”
25 Eri, ni ara wiahier ara kadehde ni unsek oh padahkiher mahsen en Siohwa,* ira ahpw tepida pwurupwurala Serusalem oh kin kalokalohki rongamwahu nan kisin kahnimw tohto en mehn Sameria.
26 Ahpw, sapwellimen Siohwa* tohnleng men ndaiong Pilip: “Uhda oh kohla palieir ni ahl me tangdihla sang Serusalem ong Kasa.” (Elen sapwtehn ehu met.)
27 E ahpw uhda oh kohla, a kilang! ohlen Idiopia lapalap men, ohl men me ahneki manaman pahn Kandehsi, lih nanmwarkien Idiopia, oh me kin apwahpwalih eh dipwisou kesempwal kan koaros. Ohlo kolahngehr Serusalem pwe en kaudok,
28 oh ni eh pwurupwurala, e mihmi pohn were werennansapwo oh wadewadek ni ngihl laud pwuhken soukohp Aiseia.
29 Sapwellimen Koht manaman* ahpw mahsanihong Pilip: “Kohla oh keiong mpen werennansapw wet.”
30 Pilip eri tangala limwahn werennansapwo oh rong eh wadewadek ni ngihl laud pwuhken soukohp Aiseia, e ahpw ndaiong: “Ke uhdahn ese* dahme ke wadewadeken?”
31 E nda: “Ia duwen ei pahn kak ese ma sohte me kaweid ie?” Ih eri luke Pilip en douda oh mwohndi reh.
32 Eri iet iren Nting Sarawi me e wadewadeko: “Rasehng sihpw men, e wisikdohng kamakamala, oh rasehng sihmpwul men me sohte kin mweseisei ni ar kin sehk wune ko, e sohte kin kihpeseng ewe.
33 Ahnsou me irail kasarowehdi, re sohte kihong ih pwung pahrek. Ihs me pahn koasoia duwen oaritikpen eh dih?* Pwehki eh mour pahn sohrasang sampah.”
34 Ohl lapalapo eri ndaiong Pilip: “Padahkihong ie mahs, ihs me soukohpo koasoia duwe? Duwen pein ih de emen tohrohr?”
35 Pilip eri tepida koasoi, oh tepikihda nting sarawi wet, oh koasoiaiong ih rongamwahu duwen Sises.
36 Eri, ni ara kohkohla nanialo, ira ahpw lellahng wasa me pihl mi ie, ohlo ahpw nda: “Kilang! Iet pihlen; dahme irehdi ei pahn papidaisla?”
37 *——
38 E ahpw ruwese werennansapwo en uhdi, eri Pilip oh ohlo kohdilahng nan pihlo, e ahpw papidaisihala ih.
39 Ni ahnsou me ira pwurada sang nan pihlo, sapwellimen Siohwa* manaman* ahpw mwadangete kahrehsang Pilip wasao, ohlo ahpw solahr kilang ih, ahpw e pereperen kohkohla.
40 Pilip ahpw lel Asdod oh e kalokalohkiseli rongamwahwo nan kahnimw koaros lao e lel Sesaria.
Footnote kan
^ De kakete, “kahnimw ehu.”
^ LK, pneuʹma. Kilang KLL.
^ LK, pneuʹma. Kilang KLL.
^ LK, pneuʹma. Kilang KLL.
^ LK, pneuʹma. Kilang KLL.
^ De “kisakis me sohte isepe.”
^ Kilang KLL.
^ De “katik duwehte pilen ehd katik.”
^ Kilang KLL.
^ Kilang KLL.
^ Kilang KLL.
^ LK, pneuʹma. Kilang KLL.
^ De “wehwehki.”
^ De “peneinei me e kohsang ie.”
^ Kilang Madiu 17:21, ntp.
^ Kilang KLL.
^ LK, pneuʹma. Kilang KLL.
