Keieu, ale kamweit sang ire mehlel wet: Koht ketin mwahngih duwen lokolok nan sampah rahnwet, oh e ketin kupwurki en wia mehkot me pid duwen met. (Melkahka 72:13, 14) Nan sapwellime Mahsen, Paipel, Koht ketin inoukihda me e ‘pahn ketin kamaiauda irail kan me kin mihmi pahn lokolok.’ Iahd? “Ni en Kaun Sises eh pahn ketido sang nanleng, iangahki sapwellime tohnleng manaman akan, . . . pwe en kaloke irail kan me pohnsehse Koht oh irail kan me sohte kin peikiong Rongamwahu en Kaun Sises.” (2 Deselonika 1:7, 8) Ire wet duwen Sises pahn wiawi ni ahnsou kohkohdo me Paipel kahdaneki “mahwen me pahn wiawi ni Rahn Lapalap en Koht, Wasa Lapalahpie,” me pil adaneki Armakedon.​—Kaudiahl 16:14, 16.

Nan mahwen wet me pahn wiawi ahnsou kohkohdo, Koht sohte pahn ketin doadoahngki aramas, ahpw e pahn ketin doadoahngki sapwellime Ohlo, Sises Krais, iangahki tohnleng manaman teikan en mahweniong me suwed. Pokon en karis wet nanleng pahn ketikihsang lokolok koaros.​—Aiseia 11:4; Kaudiahl 19:11-16.

Leledo rahnwet, sapwellimen Koht madamadau ong mahwen sohte wekila. E kin ketin kilangwohngete mahwen nin duwen kahrepe mwahu ehu en ketikihsang lokolok oh me suwed. Ahpw nin duwen me mehlel nan poadopoad, Koht kelehpw me ahneki pwuhng en koasoanehdi iahd soangen mahwen wet pahn wiawi oh ihs me pahn iang pidada. Nin duwen me kitail kilangehr, Koht ketin koasoanehdier me mahwen me pahn ketikihsang me suwed oh ikih irail kan me kin lokolok wia mahwen  ehu me pahn wiawi ni ahnsou kohkohdo oh me sapwellime Ohlo, Sises Krais me pahn ketin peiki mahwen wet. Met wehwehki me Koht sohte ketin kupwurki mahwen kan me kin wiwiawi rahnpwukat, mendahki ia uwen eh mwomwen me mie kahrepe mwahu ong mahweno.

Pwehn karasahda: Medewehla pirien ehu me tepida akamai erein ara pahpao kohkohla. Ira uhdi ahnsou kis oh eker ara pahpao nan delepwohn. Emen rehra nda me mehteio me katapiada akamaio, a mehteio dene me rieo kin wia kawe ih. Ira koaros pek sawas rehn ara pahpao, emenemen ira medemedewe me ara pahpao pahn utungada eh pali. Ahpw, mwurin ara pahpao karonge ira koaros, e ndaiong ira en uhdihsang ara akamaio oh awih ih en pwurodo oh kapwungala ireo. Erein ahnsoukis pirieno awih. Ahpw mwuhr, ira pil pwurehng tepida akamai. Ni ahnsou me ara papaho pwurodo, e sohte perenki dahme ira wia. Ih eri kihong kalokepen ara sapeik ong ih.

Rahnpwukat, wehi kan me kin mahwenpene kin kalapw peki rehn Koht en ketin utung irail. Ahpw Koht sohte kin ketin uhpalih mahwen en rahnpwukat. Nan sapwellime Mahsen, Paipel, e ketin kasalehda ni sansal: “Ma emen pahn wiahiong kumwail me suwed, kumwail dehr dupungkihong me suwed,” oh, “Kumwail dehr pein dupuk.” (Rom 12:17, 19) Patehng met, e pil ketin kasalehda me aramas anahne “kanengamahiong oh awiawih” en ketin mwekid, iei met me e pahn ketin wia ni Armakedon. (Melkahka 37:7) Ni ahnsou me wehi kan sohte awih Koht en ketin mwekid ahpw re pein tepida mahwen, Koht kin ketin kilangwohng soangen mahwen pwukat nin duwen wiewia aklapalap oh lemei me e sohte ketin kupwurki. Ihme kahrehda, nan Armakedon, Koht pahn ketin kasalehda sapwellime engieng oh kapwungala douluhl ahn wehi kan ar uhpene sang eh pahn “ketin katokehdi mahwen wasa koaros nin sampah.” (Melkahka 46:9; Aiseia 34:2) Ei, Armakedon iei mahwen me pahn katokehdi mahwen koaros.

Kaimwiseklahn mahwen koaros iei ehu kisehn kapai tohto en Wehin Koht. Sises mahsanih duwen koperment wet nan kapakap wet me me tohto kin ese: “Mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.” (Madiu 6:10) Kaidehn ihte Wehin Koht pahn kasohrehla mahwen koaros ahpw e pil pahn kasohrehla dahme kin uhdahn kahrehda mahwen, me iei irair en mwersuwed. * (Melkahka 37:9, 10, 14, 15) E sohte kapwuriamwei me sapwellimen Sises tohnpadahk ko kin uhdahn kasikasik kapai kan en Wehin Koht.​—2 Piter 3:13.

Eri, ia uwen werei atail en awih Wehin Koht en ketikihsang lokolok oh me suwed kan koaros? Kokohp en Paipel kan ar wie pweipweida kasalehda me kitail miher ni “imwin rahn akan” en koasoandi wet. (2 Timoty 3:1-5) * Ahnsou keren, Wehin Koht pahn ketin doadoahngki mahwen en Armakedon pwehn kaimwisekala imwin rahn pwukat.

Nin duwen me kileledier mwoweo, irail kan me pahn sohrala nan mahwen wet iei irail kan me sohte douluhl kin “peikiong Rongamwahu en Kaun Sises.” (2 Deselonika 1:8) Ahpw taman me Koht sohte kin ketin kupwurperenki mehlahn aramas sohte lipilipil, pil iangahki me suwed kan. (Esekiel 33:11) Pwehki e “sohte ketin kupwurki emen en lekdekla” nan mahwen wet, ni ahnsou wet e ketin tehk mwahu me rongamwahwo duwen atail Kaun Sises en “lohkseli wasa koaros nin sampah, pwe kadehde en mie ong aramas koaros” mwohn imwio leledo. (2 Piter 3:8, 9; Madiu 24:14; 1 Timoty 2:3, 4) Ei, pwehki doadoahk en kalohk nan sampah pwon me Sounkadehdehn Siohwa kan kin wia, aramas akan rahnwet ahneki ahnsou mwahu en esehla Koht, en peikiong rongamwahwo duwen Sises, oh en mour pwehn kilang rahno me mahwen solahr pahn wiawi.