NI OMW wadek duwen ire riau pwukat, mehnia me duwehte dahme ke medewe? Me tohto diarada me ahn Sohl sang Tarsus, me pil adaneki wahnpoaron Pohl, eh koasoi ko kaselel oh kansenamwahu. (Wiewia 17:26, 27) Oh Paipel audaudki koasoi kansenamwahu teikan me pil duwehte met. Karasepe, Sises ketikihda kapakap ehu me kamehlelehiong kitail me sapwellime tohnpadahk kan kak esehla Koht oh alehdi sapwellime kapai.​—Sohn 17:3.

Ahpw, ohl loalokong kan duwehte Philo ahneki madamadau me weksang met. Re kin nda me dene kitail sohte kak douluhl esehla Koht pwehki e inenen apwal en wehwehkihla. Ahpw ia uhdahn me mehlelo?

Paipel pohnese me mie soahng kan duwen Koht me apwal ong aramas en wehwehki. Karasepe, uwen reirei en Sounkapikadao eh wie ketiket, kaselel en sapwellime madamadau, oh loalen sapwellime erpit sohte me kak wehwehki. Mepwukat siksang douluhl dahme aramas kak wehwehki. Ahpw, soahng pwukat me pid duwen Koht sohte kahpwalihala atail en esehla ih. Ni mehlel, doudouloale soahng pwukat kak sewese kitail en karanihala Koht. (Seims 4:8) Kitail kilang ekei karasaras en soahng kan me kitail sohte kak wehwehki. Kitail eri pahn kilang soahng kan duwen Koht me kitail kak wehwehki.

KOHT EH KETIKET KOHKOHLAHTE: Paipel padahngki me Koht wia “Koht poatopoat emen, oh pahn wia Koht kohkohlahte.” (Melkahka 90:2) Met wehwehki me Koht sohte tapwi oh sohte imwi. Ong me pid dahme aramas kin medewe, “kitail sohte kak wehwehkihla . . . tohtohn sapwellime sounpar akan.”​—Sohp 36:26.

Ia duwen omw paiekihda: Koht ketin inoukihong uhk mour soutuk ma ke uhdahn esehla ih. (Sohn 17:3) Ia duwen inou wet eh pahn mehlel ma pein Koht sohte mour kohkohlahte? ‘Nanmwarki poatopoato’ kelehpw me kak ketin kapwaiada soangen inou wet.​—1 Timoty 1:17.

SAPWELLIMEN KOHT MADAMADAU: Paipel padahngki me “sohte emen kak dehdehki kupwure” pwehki sapwellime madamadau ileile sang atail. (Aiseia 40:28; 55:9) Ihme konehng Paipel kihda peidek wet me kin kamwakid atail madamadau: “Ihs me wehwehki duwen kupwur en Kaun-o pwe en kak kaweid ih?”​—1 Korint 2:16, English Standard Version.

Ia duwen omw paiekihda: Koht kin kak ketin karonge kapakap en aramas rar rar kei ni ahnsou ehute. (Melkahka 65:2) E pil kin ketin pohnese kisin menpihr koaros me kin pwupwudiong nanpwel. Ia duwe, sapwellimen Koht madamadau pahn direkihla soahng tohto oh kahrehiong ih en sohte ketin tehk uhk oh karonge omw kapakap kan? Soh, met pwehki sohte irepen sapwellime madamadau. Laudsang met, ong ih “kumwail kesempwalsang mehlel menpihr tohto!”​—Madiu 10:29, 31.

SAPWELLIMEN KOHT WIEWIA KAN: Paipel padahngki me aramas sohte kak “wehwehki mehlel wiepen nin lime kan.” (Eklesiasdes 3:11) Eri, kitail sohte douluhl pahn ese soahng koaros duwen Koht. Sohte me kak wehwehki erpit en sapwellimen Koht wiewia kan. (Rom 11:33) Ahpw, Koht ketin kupwurki kasalehda sapwellime wiewia kan ong irail kan me men kaperenda ih.​—Eimwos 3:7.

Ia duwen omw paiekihda: Ma ke kin wadek oh onopki Paipel, ke pahn pousehlahte sukuhlki soahng kapw kan duwen Koht oh sapwellime ahl akan. Met wehwehki me kitail kak kakerenihala kitail rehn Samatail nanleng kohkohlahte.

Pwehki kitail sohte kak wehwehki soahng koaros me pid duwen Koht met sohte wehwehki me kitail sohte kak douluhl esehla ih. Paipel kin audaudki ire tohto me sewese kitail en esehla mwahu duwen Koht. Tehk karasepe pwukat:

MWAREN KOHT: Paipel padahkihong kitail me pein Koht ketin sapwellimaniki mwar ehu. E mahsanih: “Ngehite me KAUN-O, * omw Koht. Sohte emen koht pahn ahneki lingan en mwarei.” Mwaren Koht pwarada pak 7,000 tohtohsang ahd teikan nan Paipel.—Aiseia 42:8.

Ia duwen omw paiekihda: Sises mahsanih nan sapwellime kapakapo: “Samat me ketiket nanleng: Mwaromwi en sarawihla rehn aramas koaros.” (Madiu 6:9) Ia duwe, ke kak pil doadoahngki mwaren Koht nan omw kapakap? Siohwa ketin kupwurki en doarehla koaros me kin kasalehda arail wauneki mware.​—Rom 10:13.

WASA ME KOHT KETIKET IE: Paipel padahngki me mie wasa riau ong wasahn kousoan—sampah me kitail kin kousoan ie oh nanleng me ngehn kan kin mi ie nin duwen me Paipel kasalehda. (Sohn 8:23; 1 Korint 15:44) Wasa me Sounkapikadao kin ketiket ie iei “nanleng.”​—1 Nanmwarki 8:43.

Ia duwen omw paiekihda: Met ke wehwehkihla mwahu duwen Koht laudsang mahs. Sounkapikadao kaidehn manaman ehu me aramas sohte kak wehwehki me kin mi wasa koaros oh nan mehkoaros. Siohwa uhdahn  Emen me ketin mie oh uhdahn mie wasa ehu me e kin ketiket ie. Mendahki met, “sohte mehkot me kak rirsang silangin Koht. Mehkoaros nanleng oh sampah pokon kin sansal oh dehde mwohn silangi.”​—Ipru 4:13.

SOANGEN KOHT DAH MEN IH: Paipel padahngki me Siohwa ketin sapwellimaniki irair kaselel kan. “Koht iei limpoak.” (1 Sohn 4:8) E sohte kin ketin likamw. (Taitus 1:2) E kin ketin mahk, kadek, sohte kin ketin lipilipilki aramas oh sohte kin ketin mwadang lingeringerda. (Eksodus 34:6; Wiewia 10:34) Aramas tohto pahn pwuriamweikihla me Sounkapikadao kupwurki “kompoakepahnki” irail kan me kin waunekin ih.​—Melkahka 25:14.

Ia duwen omw paiekihda: Ke kak wiahla kompoakepahn Siohwa. (Seims 2:23) Eri, ni omw esehla soangen Koht dah men Siohwa, ke kak wehwehkihla mwahu iren Paipel kan.

Paipel kin kasalehda ni sansal soangen Koht dah men Siohwa. Weksang soangen madamadau me kitail sohte uhdahn kak wehwehki ih, Sounkapikadao ketin kupwurki kitail en esehla ih. Sapwellime Mahsen, Paipel, inoukihda: “Ma kumwail pahn rapahki, e pahn ketin mweidohng kumwail en diar.” (2 Kronikel 15:2) Ke seu esehla Koht sang ni omw kin wadek oh doudouloale duwen koasoipen Paipel kan? Ma ke wia met, Paipel inoukihda me Koht ‘pahn ketin keiong mpomw.’​—Seims 4:8.

Ele ke kin medewe, ‘Pwehki I sohte kak wehwehki soahng koaros duwen Sounkapikadao, ia duwen ei pahn kak wiahla kompoakepah?’ Medewehla met: Ia duwe, emen me wia kompoakepah keren en toahkte men anahne pil naineki kisinlikoun sukuhl laud en toahkte? Soh douluhl! Kompoakepahn toahkteo ele wia ehu soangen doadoahk tohrohr. Ahpw, ira kak kompoakepahnkihte emenemen. Me kesempwal iei me kompoakepahn toahkteo kin ese duwen toahkteo, duwehte dahme e kin perenki oh dahme e sohte kin perenki. Pil duwehte, ke kak sukuhlkihdi sang Paipel soangen Koht dah men Siohwa—soahng kante me ke anahne ese pwe ken kak wiahla kompoakepah.

Weksang kihda ekeite ire kan duwen Sounkapikadao, Paipel kin audaudki soangsoangen ire kan me kitail anahne pwe kitail en esehla Koht. Ia duwe, ke men kalaudehla omw sukuhlki duwen Siohwa Koht? Sounkadehdehn Siohwa kan kin toukihda arail ahnsou pwehn wia onop en Paipel ni soh isepe. Se men luke iuk en kohla rehn Sounkadehde kan nan omw wasa de kohla nan nait website, www.pr418.com.