Paradais! Kisin pwuhk kaselel kan kin kahrehiong kitail en men kohla wasa doh me duwehte nan “paradais” pwehn kommoal oh manokehla atail pwunod kan oh kahpwal kan. Ahpw nin duwen me kitail esehier, ni atail kin pwurala ni imwatail kan, atail kahpwal kan kin duduwehte.

Ahpw mendahki met, aramas kin perenkihte medemedewe duwen paradais. Kitail sohte kak tokedihsang medemedewe: ‘Ia duwe, “paradais” wiahte ouraman kansenamwahu ehu? Ma ei, dahme kahrehda aramas kin perenki medemedewe? Oh e kak uhdahn pweida?’

Sangete mahs aramas akan kin perenki medemedewe duwen paradais. Ong me tohto, irail kin men esehla duwen met pwehki dahme Paipel mahsaniheki duwen “mwetuwel ehu ni palimese, me adaneki Ihden.” Dahme kahrehda mwetuwel wet nohn kaselel ong aramas? Paipel padahkihong kitail: “[“Siohwa Koht,” NW] ahpw ketin kakairada soangen tuhke kaselel koaros oh soangen tuhke me wah kan kin mwahu ong tungoal.” Mwetuwelo wia wasa lingan ehu oh mwahu. Me keieu kapwuriamwei iei pil mie “tuhkehn komour” nanwerengen mwetuwelo.​—Senesis 2:8, 9.

Pil patehng met, pwuhken Senesis mahsanih duwen pillap pahpwoat me pwilipwilsang nan mwetuwelo. Rahnwet kitail kin ese duwen pillap rioapwoat sang nanpwungarail, Daikris, (de, Iddekel) oh Iupreitis. (Senesis 2:10-14) Rahnwet pillap rioapwoatet kin pwilipwillahng ni Persian Gulf me mi nan Iraq, me mahso kin wia kisehn Persia.

E sansal me paradais nin sampah kin wia kisehn poadopoad en mehn Persia kan. Lohs likou ehu me mehn Persia kan wiahda nan pahr 1500 samwa nan Philadelphia Museum of Art, nan Pennsylvania, U.S.A. kasalehda mwetuwel ehu me perperda oh mwomwen tuhke kan oh wahnrohs kan mi pohn lohs wet. Lepin lokaiahn Persia ong “mwetuwel ehu me perperda” pil kin wehwehki “paradais,” oh dahme sansalda pohn lohso kin rasehng dahme Paipel kawehwehda me pid duwen mwetuwel en Ihden me lingan oh audepe kan me wohkian.

Ni mehlel, nan sahpw oh lokaia tohto koasoipen paradais kin kodokodoudou kohdo lel rahnwet. Ni aramas akan ar kin kohpeseng nan sampah pwon, irail kin wapeseng koasoipen dahme uhdahn wiawi mahso, oh erein poadopoad e kin uhd wiahla soai kan en ehuehu sahpw. Pil leledo rahnwet, aramas kalapw kahdaneki wasa kaselel kan paradais.

Ekei sounroporop kan koasoia me irail diaradahr paradais me salongalao. Karasepe, Charles Gordon, emen kaunen sounpei en Britain, mwemweitla Seychelles nan pahr 1881. E uhdahn pwuriamweikihla uwen kaselel en welin tuhkehn Vallée de Mai me met wiahla wasa ehu me pwihnen World Heritage kin perehsang aramas en dehr kauwehla. E nda me iei wasao me mwetuwel en Ihden mihmi ie. Nan pahr 1400 samwa, sounseiloak en Italy me adaneki Christopher Columbus medewe me e kereniongehr diarada mwetuwel en Ihden ni ahnsou me e lella pohn dekehn Hispaniola, me met adaneki Dominican Republic oh Haiti.

Ehu pwuhken poadopoad me wiawihda rahnpwukat me adaneki Mapping Paradise audaudki map en sahpw en mahs kan me tohtohsang meh 190 oh ire pisetik tohto. Tohtohn map pwukat kasalehda duwen Adam oh Ihp nan mwetuwel en Ihden. Ehu nanpwungarail iei map ehu me weksang meteiko me mi nan ehu pwuhken Beatus of Liébana me wiawihda nan pahr 1200 samwa. Pohn koadoken mapo mie kilel en koakon ehu me paradais mi nan nanwerenge. Wasao mie irekidien pillap pahpwoat me pwilipwilpeseng, me adaneki “Daikris,” “Iupreitis,” “Pison,” oh “Geon,” koaros kasangpeseng kolahng ni keimw pahieu en koakono, dene e kin wehwehkiong kohpeseng en pelien lamalam en Kristian nan keimw pahieu en sampah. Soangen kilel wet kasalehda me mendahki sohla me ese ia wasa me Paradaiso uhdahn mihmi ie mahso, ahpw aramas kin tamatamante uwen eh lingan.

 John Milton, emen me kin ntingihada koasoi kaselel kan nan pahr 1600 samwa, kin ndandki eh nting kaselel me adaneki Paradise Lost, me poahsoandahsang koasoi nan Senesis me pid dipen Adam oh eh pekeussang nan Ihden. Nan oaralapo, e kasansalehda inou en pwurehng kapwurehdo mour soutuk pohn sampah ong aramas, oh koasoia: “Ahnsowo sampah pwon pahn wiahla paradais.” Mwuhr, Milton pousehla ntingihada keriaun oaralap me koasoia Paradise Regained.

E sansal me koasoipen paradais nan sampah me salongala kin wia mehkot me aramas kin kamehlele erein poadopoad. Eri dahme kahrehda re sohla kesempwalki? Ele pwehki nin duwen me Mapping Paradise kasalehda, “sounroporop en palien lamalam kan . . . kin pilada en pohnsehsehla ire me pid ia wasa me paradais mi ie.”

Pali laud en aramas me kin kohla sarawi kin padahngki me re pahn kohdahla nanleng, a kaidehn mour nan paradais nin sampah. Ahpw Paipel mahsanih nan Melkahka 37:29, NW: “Me pwung kan pahn koukousoan nan sampah, oh re pahn sapwenikihla kohkohlahte.” Pwehki sampah rahnwet sohte wia paradais ehu, ia duwen atail kak koapworopworki me inou wet pahn pweida? *

Siohwa Koht, me ketin kapikada tepin Paradaiso, ketin inoukihda en kapwurehdo dahme salongalao. Ia duwen? Taman me Sises ketin padahkihong kitail en kapakapki: “[“Wehiomwi,” NW] en pweida wasa koaros, kupwuromwi en kin wiawi nin sampah duwen eh kin wiawi nanleng.” (Madiu 6:10) Wehio iei koperment ehu me pahn kaunda sampah. Sises Krais me kakaun wehi wet oh e pahn wiliandi kaundahn aramas koaros. (Daniel 2:44) Pahn kaundahn Wehio, kupwuren Koht me pid duwen paradais ehu nin sampah pahn “wiawi.”

Mwohn met, Koht ketin kamwakid soukohp Aiseia en kawehwehda irair kan nan Paradais me inoudahro, wasa me kapwunod oh kahpwal kan koaros me aramas kin lelohng rahnpwukat pahn sohla mie. (Aiseia 11:6-9; 35:5-7; 65:21-23) Eri, se kangoangeiuk en doadoahngki ekis ahnsou oh wadek iren Paipel pwukat nan pein noumw Paipel. Ni omw pahn wia met, e pahn kamehlelehiong uhk dahme Koht ketin koasoanehdiong aramas peik kan ni ahnsou kohkohdo. Irail kan me pahn momour ahnsowo pahn nsenamwahuki paradais oh pil pahn alehdi sapwellimen Koht kupwuramwahu, soahng riau me Adam katihasang.​—Kaudiahl 21:3.

Dahme kahrehda kitail kak kamehlele me koapworopwor en Paradais nin sampah kaidehn ouraman ehu ahpw e mehlel? Pwehki Paipel mahsanihong kitail: “KAUN-O kelehpw me ketin sapwellimanki nanleng, a sampah e ketikihong aramas akan.” Koapworopwor en Paradais nin sampah iei mehkot me “Koht, me sohte kin ketin likamw, ketin inoukihongkitailehr mour wet mwohn tepin kawa.” (Melkahka 115:16; Taitus 1:2) Ia uwen kaselel en koapworopwor wet me Paipel ketikihda, Paradais kohkohlahte!