Reʼ qakamaj chi jun suut i akʼal inchalik ruukʼ i toobʼinik ruukʼ i tumiin reʼ inkibʼan taqeh testigo reh Jehová. a Reʼ tumiin ne i rubʼan chi ne inkojarik chupaam taqeh kokʼ kaxoon reʼ wilkeebʼ pan qayeʼaabʼ reh loqʼinik oon tokoom chik ruwiiʼ i toobʼinik ne inqabʼan jeʼ rukabʼ iruqʼor pan qayeʼaabʼ reh internet jw.org. Reʼ kʼachareel ne iruchih mi iraaj ruyeʼeem i rutoobʼiniik ruukʼ tumiin reh i kamanik chi jun suut i akʼal oon reh taqeh saach ne inbʼanarik chupaam i molaabʼ, oon reh kabʼchel.

 Maʼ jenoʼ testigo reh Jehová inpahqaaljik reh jaruubʼ i tumiin naruyeʼeem. Maʼ irutoj ta i diezmo ni xa ta iruyeew kʼisinoq reh i tumiin reʼ irukʼul pan rukamaj (2 Corintios 9:7). Pan qayeʼaabʼ reh moloj iibʼ maʼ inkipahqaaj ta i tumiin ni xa ta intojarik i okbʼal. Reʼ taqeh kʼamal bʼeeh maʼ inkipahqaaj ta tumiin reh qahsanik haʼ, reh i ruyeʼariik i kʼuhbʼaal reh muqʼuunik, reh kaxaro oon tokoom chik. Maʼ inqakʼayej ta kʼuxbʼal eh maʼxta inqakʼayej reh rumolariik i tumiin. Maʼ inqabʼan ta taqeh lotería, taqeh rifa, kʼay kʼuxbʼal reh rumolariik tumiin, ni xa ta inqapahqaaj qatumiin keh taqeh kʼachareel. Maʼ inqayeew ta chi nabʼjik ajwach i ruyeew i rutoobʼiniik ruukʼ tumiin (Mateo 6:2-4). Eh jeʼ woʼ chik, pan qayeʼaabʼ reh internet eh chupaam taqeh qahuuj maʼxta inqakʼayej.

 Chuʼnchel taqeh poh, taqeh molaabʼ reh taqeh testigo reh Jehová, inkiqʼor jaruubʼ i tumiin wilik eh jarubʼ xkisach eh reʼ taqeh kimoloj iibʼ keh chuʼnchel taqeh kʼachareel. Inkichih jenoʼ qʼiij reh rutzʼirariik riij mi reʼ tumiin kʼahchiʼ rukojariik chi korik (2 Corintios 8:20, 21).

•   Kokʼ kaxoon yeʼaabʼ toobʼinik ruukʼ tumiin: Ne irubʼan chi ne nakoj atoobʼinik ruukʼ tumiin oon cheque chupaam taqeh kokʼ kaxoon reʼ wilkeebʼ chupaam taqeh qayeʼaabʼ reh moloj iibʼ, taqeh qayeʼaabʼ reh nimlaj moloj iibʼ oo xa ahaʼ paʼ inamol awiibʼ.

•   Toobʼinik ruukʼ tumiin pan qayeʼaabʼ reh internet: chi jun suut i akʼal ne irubʼan chi ne inkojarik i qayeʼaabʼ pan internet ahaʼ iruqʼor «Ruyeʼariik atoobʼinik keh taqeh testigo reh Jehová» reh toobʼinik ruukʼ tumiin chi tarjeta reh crédito oon débito, ruqʼahsjiik tumiin pan banco oon jenoʼ chik ruwiiʼ. b Juʼjun taqeh testigo reh Jehová inkiyeew pareh nechʼ oq kitumiin chuʼnchel taqeh poh, jeʼ reʼ noq inkiyeew i kitoobʼinik ruukʼ tumiin noq inkikoj taqeh qakamambʼal reh i qayeʼaabʼ pan internet (1 Corintios 16:2).

•   Toobʼinik ruukʼ tumiin tiqʼimaj wach: Juʼjun taqeh toobʼinik ruukʼ tumiin ko ruman chi ne inkamamjik riij oon ne inpahqaljik naʼojbʼal kuukʼ taqeh abogado. Reʼ reʼ irubʼan chi ne inelik chi korik. Kʼih iruyeew riibʼ chi keh, runabʼjiik chi riij i toobʼinik ne inkiyeew reh i rutinamiit i Jehová noq ko kʼachalkeebʼ, jeʼ reʼ noq, noq kamnaq chik taqeh maʼxta kʼaxkilal ne inwihʼik. Ne irubʼan chi ne kiqʼorik pan sucursal keh taqeh testigo reh Jehová oon reʼ maʼ najt ta kuukʼ reh runabʼjiik nikʼwach i toobʼinik ruukʼ tumiin nakibʼanam noq ne inkikoj:

  •   cuentas bancarias

  •   seguros y planes de jubilación

  •   bienes raíces

  •   acciones y bonos

  •   testamentos y fideicomisos

 Wi nawaaj anabʼeen kʼisinoq chik nikʼwach jeʼ i toobʼinik ruukʼ tumiin ne nabʼan, tiʼokoq chupaam i qayeʼaabʼ reh internet «Ruyeʼariik atoobʼinik keh taqeh testigo reh Jehová».