LECCIÓN 03
¿Ne na inqakoj qakʼux chi riij i Santo Laj Huuj?
Pan Santo Laj Huuj inqareq taqeh irubʼehsaj qeh i Dios. Mareh inawaaj anabʼeem chi riij, xa reʼ laʼ mareh wilik woʼ apahqanik. ¿Ne na inqakoj qakʼux ruukʼ irubʼehsaj qeh i Dios? ¿Korik na iruqʼor i Santo Laj Huuj chi ne inqasuqkileej i qakʼachariik yuʼnaak eh pan taqeh qʼiij chalik reh? Kʼih i kʼachareel inkiqʼor chi naak. Chawil chaaj woʼ reet jeʼ reʼ inkikapaaj eh mareh ne tirutobʼeej.
1. ¿Korik na chi xkʼuljik iruqʼor i Santo Laj Huuj?
Pan Santo Laj Huuj wilik qʼorik «i rukʼul chi qʼorarik» xtzʼihbʼjik chi korik (Eclesiastés 12:10). Inqʼorik chi riij xkʼuljik jeʼ woʼ chi kiij taqeh kʼachareel (chawil Lucas 1:3 eh 3:1, 2). Kʼih taqeh kʼachareel kikojom rehtaal chi chuʼnchel iruqʼor i Santo Laj Huuj korik, jeʼ rukabʼ noq inqʼorik chi riij taqeh haabʼ, taqeh kʼachareel eh taqeh yeʼaabʼ wilik chupaam.
2. ¿Chaaj woʼ reet ne inqakoj qakʼux ruukʼ i Santo Laj Huuj atoobʼ ta najtir xtzʼihbʼjik?
Reʼ Santo Laj Huuj najtir tzʼihbʼamaj xa reʼ laʼ, reʼ taqeh naʼojbʼal wilik chupaam inkamanik yuʼnaak. Jenaj ehtalil, inqʼorik chi riij nikʼwach i ruwiiʼ i akʼal noq wilik naq reh reh wach kapebʼal chi riij. Xa reʼ laʼ yuʼnaak inqilow chi reʼ inkiqʼor taqeh científico irukʼuhtaaj chi reʼ Santo Laj Huuj korik iruqʼor. «Eh maʼ naa ta ruyojiik wach i rukʼuhbʼaal, naa laʼ ruwihiik chi juneliik» (Salmo 111:8).
3. ¿Chajariik iruqʼor i Santo Laj Huuj chi riij i qaqʼijil?
Reʼ Santo Laj Huuj inqʼorik a chi riij «i komajaaʼ inkʼularik» (Isaías 46:10). Tzʼihbʼamaj naq chik chajariik i narukʼuljiik. Inqʼorik woʼ chi riij i kʼahchiʼ rukʼuljiik yuʼnaak. Chupaam i naʼojbʼal wilih naqatzʼirim riij i ruqʼorom cho i Santo Laj Huuj eh naqilom chi reʼ kʼahchiʼ qatijem holohik.
CHATZʼIR RIIJ I KʼAHCHIʼ ATIJEM
Qil nikʼwach irukʼam riibʼ i kiqʼorom taqeh científico ruukʼ iruqʼor i Santo Laj Huuj eh naqilom i juʼjun qʼorooj cho rubʼiral.
4. Reʼ inkikʼuhtaaj i científico irukʼam riibʼ ruukʼ iruqʼor i Santo Laj Huuj
Kʼih i kʼachareel inkikapaaj chi reʼ akʼal wilik inchopinik reh. Chawil taq i VIDEO.
Chawil xtzʼihbʼjik cho ixibʼ mil quinientos haabʼ pan ruhuuj i Job. Chawil taq i Job 26:7 eh tiqʼoroq taq chi riij:
-
¿Chaaj woʼ reet irusach qakʼux chi reʼ Santo Laj Huuj iruqʼor chi reʼ akʼal «xa panteew wilik»?
Kiʼibʼ ciento haabʼ yuʼnaak xkireq chi riij nikʼwach irumol riibʼ i haʼ pan suutzʼ. Xa reʼ laʼ chakoj rehtaal i xuqʼor i Santo Laj Huuj najtir chik qʼiij. Chawil taq i Job 36:27, 28 eh tiqʼoroq taq chi riij:
-
¿Chajariik imponik chawach chi riij nikʼwach irumol riibʼ i haʼ pan suutzʼ?
-
¿Inakoj na akʼux ruukʼ i xawil pan Santo Laj Huuj?
5. Reʼ Santo Laj Huuj ruqʼorom naq chik taqeh xkʼuljik
Chawil taq Isaías 44:27 ko pan 45:2 eh tiqʼoroq taq chi riij:
-
¿Chajariik xuqʼor i Santo Laj Huuj chi narukʼulum i tinamit Babilonia?
Reʼ xkʼuljik pan haabʼ 539 noq ko majaaʼ inkʼulik i Cristo reʼ rey reh Persia bʼihnaal Ciro ruchʼihiil taqeh rusoldado xkichop naah i tinamit Babilonia. Peet, xkijal rubʼeeh i haʼ reʼ inkoʼlinik naq reh i tinamit eh ruum chi maʼ tzʼaplik ta i puerta xiʼokik eh xkichop naah i tinamit chi maʼ xkibʼan ta i peleto. Ikʼinaq chik kiʼibʼ mil quiniento haabʼ chi xkʼuljik i wilih, eh reʼ Babilonia sahchinaq chik wach. Chakoj taq rehtaal i xuqʼor i Santo Laj Huuj.
Chawil taq Isaías 13:19, 20 eh tiqʼoroq taq chi riij:
-
¿Nikʼwach xooj eloq wach i qʼorooj cho rubʼiral wilih?
Yuʼnaak jeʼ wilih i Babilonia ar Irak
6. Reʼ Santo Laj Huuj xuqʼor cho rubʼiral i kʼahchiʼ rukʼuljiik yuʼnaak
Reʼ Santo Laj Huuj iruqʼor chi wilkooj «pan rukuxiik taqeh qʼiij» (2 Timoteo 3:1). Chakoj rehtaal i xuqʼor chi narukʼuljiik.
Chawil taq Mateo 24:6, 7 eh tiqʼoroq taq chi riij:
-
¿Chajariik xuqʼor i Santo Laj Huuj chi narukʼuljiik pan rukuxiik taqeh qʼiij?
Chawil taq 2 Timoteo 3:1-5 eh tiqʼoroq taq chi riij:
-
Jeʼ rukabʼ xuqʼor i Santo Laj Huuj, ¿chajariik chi naʼojbʼal na naq rukʼutiniik pan rukuxiik taqeh qʼiij?
-
¿Inaqʼor na chi kʼahchiʼ chik qilom taqeh naʼojbʼal iruqʼor i texto?
REʼ INKIQʼOR I JUʼJUN: «Reʼ Santo Laj Huuj nunjinaq chi chukuj qʼorik».
-
¿Ahaʼ wilik reh i qʼorooj cho rubʼiral irubʼan chi inakoj akʼux ruukʼ i Santo Laj Huuj?
KʼOLOQ PAN AKʼUX
Reʼ inkiqʼor taqeh científico eh reʼ i qʼorooj cho rubʼiral irukʼuhtaaj chi ne inqakoj qakʼux ruukʼ i Santo Laj Huuj.
Reʼ xkahnik pan akʼux
-
¿Mi xa chukuj qʼorik wilik chupaam i Santo Laj Huuj?
-
¿Nikʼwach kikʼuhtaam taqeh científico chi reʼ iruqʼor i Santo Laj Huuj korik?
-
¿Korik na iruqʼor i Santo Laj Huuj chi riij i chalik reh? ¿Chaaj woʼ reet jeʼ reʼ inakapaaj?
CHAREQ RUMAN
Ruukʼ inkiqʼor i científico, ¿korik na iruqʼor i Santo Laj Huuj?
«¿Irukʼam na riibʼ i Santo Laj Huuj ruukʼ irukʼuhtaaj i científico?» (Naʼojbʼal reh jw.org)
¿Chajariik irukʼuhtaaj chi wilkooj «pan rukuxiik taqeh qʼiij»?
«Waqiibʼ chi ehtalil qʼorooj cho rubʼiral reʼ kʼahchiʼ chik qilom» (La Atalaya, 1 reh mayo reh 2011)
Chanabʼeej nikʼwach xooj eloq wach i qʼorooj cho rubʼiral chi riij i rajaawriik i tinamit Grecia.
Reʼ «Kiqʼorbʼal taqe propeeta» iruyeew rukowiil qakʼux (5:22)
Chawil nikʼwach jenaj winaq xujal i rukapebʼaal chi riij i Santo Laj Huuj.
«Maʼ rukoj ta naq chi wilik jenaj Dios» (La Atalaya, núm. 5 reh 2017)
a Reʼ taqeh qʼorooj cho rubʼiral, ruqʼorbʼal i Dios chi riij i chalik reh.
Puede que también le interese
PAHQANIK CHI KIIJ TAQEH TESTIGO REH JEHOVÁ
¿Nikʼwach i tijinik chi riij i Santo Laj Huuj inkiyeew taqeh testigo reh Jehová?
Ruukʼ i tijinik inkiyeew taqeh testigo reh Jehová xa ahaʼ paʼ wilik i Santo Laj Huuj ne irubʼan chi ne nakoj. Jeʼ woʼ chik, ne irubʼan chi ne nayuqʼeej taqeh awas achaaq oon taqeh amigo inawaaj.
