نکولس تے سلین نُوں اِک ہور طرحاں دے مسئلے دا سامنا ہویا۔ فرانس دی برانچ نے اوہناں نُوں اِک نوِیں کلیسیا چ جان لئی کہیا۔ اوہناں نے دَسیا:‏ ”‏شروع چ تے اَسی بوہت خوش ساں۔ پر اوتھے جان دے بعد سانوں اپنے دوستاں دی بڑی یاد آندی سی کیونکہ نوِیں کلیسیا دے بھین بھراواں نال حالے ساڈی اینی چنگی دوستی نئیں سی۔“‏ ایہہ سچ اے کہ توانوں مشکلاں دا سامنا ہو سکدا اے۔ پر تُسی کیویں اِک نوِیں کلیسیا چ خوشی نال خدمت کر سکدے او؟ نالے تُسی کیہہ کر سکدے او تاکہ تواڈا تے تواڈی نوِیں کلیسیا دا حوصلہ ودھے؟ اَسی سارے کلیسیا دے نویں بھین بھراواں دی مدد کیویں کر سکنے آں؟‏

چار اصول جیہڑے تواڈے کم آ سکدے نیں

1.‏ یہوواہ تے بھروسا رکھو۔‏ ‏(‏زبور 37:‏5‏)‏ جاپان چ رہن والی بھین کازومی نُوں اپنی کلیسیا اوہدوں بدلنی پئی جدوں اوہدے شوہر نُوں نوکری دی وجہ توں دُوجی جگہ جانا پیا۔ اوہ 20 سالاں توں اوس کلیسیا چ خدمت کر رہی سی۔ پر فیر وی اوہنے یہوواہ تے بھروسا ظاہر کیویں کیتا؟ اوہنے دَسیا:‏ ”‏مَیں دل کھول کے یہوواہ نُوں دُعا چ دَسیا کہ مَیں کِنّی پریشان تے کلّی آں۔ مَیں محسوس کیتا کہ مَیں جدوں وی دُعا کیتی تے یہوواہ نے مینوں حالاتاں دا سامنا کرن دی طاقت دِتی۔“‏

تُسی یہوواہ تے اپنے بھروسے نُوں کیویں ودھا سکدے او؟ اِک پودے نُوں ودھان لئی پانی تے کھاد دینی پیندی اے۔ پر ایمان نُوں ودھان لئی کیہہ کرنا پیندا اے؟ بھرا نکولس نے یہوواہ تے اپنا بھروسا ودھان لئی ابراہام، یسوع تے پولُس دی مثال تے سوچ‌وچار کیتا۔ ایہناں تِناں نے خدا دی مرضی پوری کرن لئی بڑیاں قربانیاں دِتیاں سن۔ ایسے طرحاں جدوں تُسی باقاعدگی دے نال پاک کلام پڑھو گے تے ایہدے تے سوچ‌وچار کرو گے تے فیر نہ صرف تُسی زندگی چ آن والیاں تبدیلیاں دا سامنا کر سکو گے سگوں تُسی ایہو جہیاں گلاں وی سکھو گے جنہاں دے ذریعے تُسی اپنی نوِیں کلیسیا دے بھین بھراواں دا حوصلہ ودھا سکو گے۔‏

2.‏ نوِیں کلیسیا دا مقابلہ پرانی کلیسیا دے نال نہ کرو۔‏ ‏(‏واعظ 7:‏10‏)‏ جدوں بھرا جُولز اپنا ملک بینن چھڈ کے امریکہ آیا تے  اوہنے ویکھیا کہ اوتھے دے لوکاں دا رہن‌سہن تے سوچ بڑی فرق اے۔ اوہنے دَسیا:‏ ”‏مَیں ایتھے زیادہ لوکاں نُوں نئیں جاننا ساں۔ ایس لئی مینوں ہر نویں بندے نُوں اپنے بارے فیر توں دَسنا پیندا سی۔“‏ اوہدے لئی ایہہ بوہت اوکھا سی ایس لئی اوہ کلیسیا دے بھین بھراواں توں دُور رہن لگ پیا۔ پر جدوں اوہنے بھین بھراواں نُوں جانن دی کوشش کیتی تے اوہدی سوچ بدل گئی۔ اوہنے کہیا:‏ ”‏مَیں سمجھ گیا واں کے اصل چ ہر ملک دے لوک اِکو جہے نیں بس اوہناں دا بول‌چال تے رہن سہن اِک دُوجے توں فرق ہوندا اے۔ اوہ بھانویں جیہو جہے وی ہون سانوں اوہناں نُوں قبول کرنا چاہی دا اے۔“‏ ایس لئی کدی وی اپنی نوِیں کلیسیا دا مقابلہ پرانی کلیسیا دے نال نہ کرو۔ بھین این لیز جیہڑی اِک پہل‌کار اے اوہنے دَسیا:‏ ”‏مَیں نوِیں جگہ ایس لئی نئیں گئی ساں تاکہ اوتھے وی سب کجھ پرانی کلیسیا ورگا ہوئے سگوں مَیں نوِیں جگہ جا کے نوِیاں گلاں سکھنا چاہنی ساں۔“‏

بزرگاں نُوں وی نوِیں کلیسیا دا مقابلہ اپنی پرانی کلیسیا نال نئیں کرنا چاہی دا۔ ہر کلیسیا دے کم کرن دا طریقہ تھوڑا فرق ہو سکدا اے۔ ایس لئی چنگا ہوئے گا کہ کوئی مشورہ دین توں پہلاں اوتھوں دے بھین بھراواں دے حالات نُوں جانن دی کوشش کرو۔ (‏واعظ 3:‏1،‏ 7‏)‏ اوہناں تے اپنی رائے تھوپن دی بجائے اوہناں لئی چنگی مثال قائم کرو۔—‏2-‏کُرنتھیوں 1:‏24‏۔‏

3.‏ نوِیں کلیسیا چ دل لا کے کم کرو۔‏ ‏(‏فِلپّیوں 1:‏27‏)‏ اِک نوِیں جگہ تے شفٹ ہون چ بڑا وقت تے محنت لگدی اے۔ پر بوہت ضروری اے کہ تُسی چھیتی توں چھیتی نوِیں کلیسیا دی عبادتاں تے جان دی کوشش کرو۔ جے ممکن اے تے تُسی عبادت‌گاہ چ جاؤ تاکہ تُسی بھین بھراواں نُوں مِل سکو۔ اِنج اوہ تواڈی مدد وی کر سکن گے۔ بھین لُوسینڈا اپنی دو دِھیاں نال جنوبی افریقہ دے اِک وڈے شہر چ شفٹ ہو گئی۔ اوہنے دَسیا:‏ ”‏میرے دوستاں نے مینوں مشورہ دِتا سی کہ مینوں چھیتی توں چھیتی نوِیں کلیسیا دے بھین بھراواں نال گھلنا ملنا چاہی دا اے۔ ایس لئی مَیں اوتھے جاندیاں ای عبادتاں چ حصہ لین لگ پئی تے بھین بھراواں نال مِل کے مُنادی کرن لگ پئی۔ مَیں بھراواں نُوں ایہہ وی کہیا کہ اوہ مُنادی دے گروپ ساڈے گھر وی رکھ سکدے نیں۔“‏

جدوں تُسی اپنی نوِیں کلیسیا چ بھین بھراواں نال ”‏اِک دل تے اِک جان“‏ ہو کے یہوواہ دی خدمت کرو گے تے تُسی ”‏خوش‌خبری تے ایمان“‏ لیان چ دُوجیاں دی مدد کر سکو گے۔ بزرگاں نے بھین این لیز نُوں حوصلہ دِتا کہ اوہ اپنی نوِیں کلیسیا دے سارے بھین بھراواں نال مُنادی کرے۔ ایہدا کیہہ فائدہ ہویا؟ بھین نے دَسیا:‏ ”‏بھین بھراواں نال گھلن مِلن دا ایہہ ودھیا طریقہ سی۔“‏ ایہدے علاوہ عبادت‌گاہ دی صفائی تے مرمت دے کم چ وی حصہ لوو۔ ایس طرحاں بھین بھرا ویکھ سکن گے کہ تُسی ایس کلیسیا نُوں اپنی کلیسیا سمجھدے او۔ جِنّاں زیادہ تُسی نوِیں کلیسیا چ دل لا کے خدمت کرو گے اونی چھیتی تُسی بھین بھراواں دے نیڑے ہو جاؤ گے۔‏

4.‏ نوِیں کلیسیا دے بھین بھراواں نال دوستی کرو۔‏ ‏(‏2-‏کُرنتھیوں 6:‏11-‏13‏)‏ نویں دوست بنان لئی بھین بھراواں چ  دلچسپی لوو۔ اِنج کرن لئی عبادت توں پہلاں تے بعد چ بھین بھراواں نال گل بات کرو تاکہ تُسی اوہناں نُوں جان سکو۔ جدوں تُسی لوکاں نال ہس کے ملو گے تے اوہناں دے ناں یاد رکھو گے تے تواڈی اوہناں نال چنگی دوستی ہوئے گی۔‏

ایہہ نہ سوچو کہ توانوں نوِیں جگہ جا کے اپنے آپ نُوں بدلن دی لوڑ اے۔ بھین بھراواں نال اُنج ای ملو جیویں دے تُسی ہے او۔ بھین لُوسینڈا نے کہیا:‏ ”‏اَسی بھین بھراواں نُوں اپنے گھر بلا‌یا جدی وجہ توں ساڈی اوہناں نال چنگی دوستی ہو گئی۔“‏

اِک دُوجے نُوں قبول کرو

جدوں کوئی نوِیں کلیسیا چ کسے نُوں نئیں جان دا تے شاید اوہ گھبرا جائے۔ ایس لئی تُسی کلیسیا چ آن والے نویں بھین بھراواں دی مدد کیویں کر سکدے او؟ پولُس رسول نے مسیحیاں نُوں ہلاشیری دِتی کہ جیویں مسیح نے توانوں قبول کیتا اے، تُسی وی اِک دُوجے نُوں قبول کرو۔ (‏رومیوں 15:‏7‏)‏ کلیسیا دے بزرگ نویں بھین بھراواں لئی مسیح ورگا پیار وکھا سکدے نیں۔ (‏ایس بکس نُوں وی ویکھو:‏ ‏”‏ جدوں اِک مبشر کلیسیا بدلدا اے۔‏‏“‏‏)‏ اصل چ کلیسیا چ ساریاں نُوں ایتھوں تک کہ بچیاں نُوں وی نویں بھین بھراواں نال دوستی کرنی چاہی دی اے۔‏

اوہناں نال دوستی کرن لئی اوہناں نُوں اپنے گھر بلا‌ؤ تے اوہناں دی مدد کرن دی پوری کوشش کرو۔ مثال لئی، جدوں اِک بھین اِک نوِیں جگہ گئی تے اوتھوں دی اِک بھین نے اوہنوں اوہ علاقہ وکھایا تے رستیاں نُوں سمجھن چ اوہدی مدد کیتی تاکہ اوہ اسانی نال سفر سکے۔ نوِیں بھین اوس بھین دی بڑی شکرگزار سی کیونکہ اوہنے اوہدی مدد کرن لئی ایناں وقت کڈھیا۔‏

نوِیاں گلاں سکھن لئی تیار رہوو

اِک تتلی نُوں اپنے خول چوں باہر نکلنا پیندا اے تاکہ اوہ اپنے پَر کھول کے اُڈ سکے۔ ایسے طرحاں جدوں تُسی اِک نوِیں کلیسیا چ جاندے او تے توانوں وی اپنے خوف چوں نکلنا پووے گا تاکہ تُسی یہوواہ دی خدمت  چ اَگے ودھ سکو۔ بھرا نکولس تے بھین سلین نے دَسیا:‏ ”‏اِک نوِیں جگہ تے توانوں نویں لوکاں نال تے فرق حالاتاں چ یہوواہ دی خدمت کرن دا موقع مِلے گا۔ جے تُسی اپنے آپ نُوں نویں ماحول مطابق ڈھالو گے تے تُسی اپنے اندر نوِیاں خوبیاں پیدا کر سکو گے۔“‏ بھرا جان دے خاندان نُوں وی تبدیلیاں نُوں قبول کر کے بوہت فائدہ ہویا۔ اوہنے کہیا:‏ ”‏نوِیں کلیسیا چ ساڈے بچے ہور چنگی طرحاں یہوواہ دی خدمت کر رہے نیں تے اوہدے نال اوہناں دی دوستی ہور پکی ہو گئی اے۔ کجھ ای مہینیاں دے اندر اندر ساڈی دِھی مسیحی زندگی تے خدمت والی عبادت چ حصے دین لگ پئی تے ساڈا پُتر مبشر بن گیا۔“‏

جے تُسی اوس علاقے چ نئیں جا سکدے جتھے مبشراں دی زیادہ لوڑ اے تے فیر تُسی کیہہ کر سکدے او؟ تُسی اپنی کلیسیا چ رہندیاں ہوئیاں ایس مضمون چ دِتے ہوئے مشوریاں تے عمل کرو۔ یہوواہ تے بھروسا رکھو تے پوری واہ لا کے کلیسیا دے بھین بھراواں نال مِل کے اوہدی خدمت کرو۔ فرق فرق بھین بھراواں نال مُنادی کرو، اوہناں نال دوستی کرن دی کوشش کرو تے کلیسیا چ اپنے دوستاں نال اپنے رشتے نُوں ہور مضبوط کرو۔ پتہ لاؤ کہ کلیسیا چ کنہاں نُوں مدد دی لوڑ اے تے اوہناں دی مدد کرن دی کوشش کرو۔ یاد رکھو کہ پیار سچے مسیحیاں دی خاص خوبی اے۔ (‏یوحنا 13:‏35‏)‏ جدوں تُسی فرق فرق طریقیاں نال دُوجیاں لئی پیار ظاہر کرو گے تے تُسی یہوواہ دے ہور نیڑے ہو جاؤ گے۔ یقین رکھو کہ خدا ایہو جہیاں قربانیاں نُوں پسند کردا اے۔—‏عبرانیوں 13:‏16‏۔‏

بوہت سارے بھین بھرا اِک نوِیں جگہ جا کے خدمت کرن چ کامیاب ہوئے نیں بھانویں کہ اِنج کرنا آسان نئیں سی۔ تُسی وی اِنج کر سکدے او۔ بھین این لیز نے دَسیا:‏ ”‏نوِیں کلیسیا چ جا کے مَیں ہور بھین بھراواں لئی اپنے دل چ جگہ بنا سکی۔“‏ بھین کازومی نے محسوس کیتا اے کہ یہوواہ نے ایہو جہے طریقیاں نال اوہدی مدد کیتی اے جنہاں بارے اوہنے کدی سوچیا وی نئیں سی۔ بھرا جُولز نے دَسیا:‏ ”‏نوِیں کلیسیا دے بھین بھراواں نے مینوں ایناں پیار دِتا اے کہ مینوں کدی نئیں لگیا کہ مَیں اپنے گھر توں دُور آں۔ نوِیں کلیسیا دے بھین بھراواں نال میری دوستی اینی پکی ہو گئی اے کہ مَیں اوہناں توں دُور جان بارے سوچ وی نئیں سکدا۔“‏