یوحنا دی اِنجیل 13:1-38
13 فسح دی عید توں پہلاں ای یسوع نُوں پتہ سی کہ ہُن اوہ ویلا آگیا اے جدوں اوہ دُنیا نُوں چھڈ کے باپ کول چلا جائے گا۔ ایس لئی دُنیا وچ جیہڑے اوہدے اپنے سن تے جنہاں نال اوہ پیار کردا سی، اوہناں نال اوہ مردے دم تک پیار کردا رہیا۔
2 اوہ سارے شام دا کھانا کھا رہے سن۔ پر اِبلیس نے پہلاں ای شمعون دے پُتر یہوداہ اِسکریوتی دے دل چ ایہہ گل پا دِتی سی کہ اوہ یسوع نُوں دھوکھے نال پھڑوائے۔
3 یسوع نُوں پتہ سی کہ باپ نے ساریاں چیزاں اوہدے ہتھ چ دے دِتیاں نیں تے اوہ خدا کولوں آیا سی تے خدا کول ای واپس جا رہیا اے۔
4 ایس لئی اوہ کھانے دے دوران اُٹھیا تے اپنا چوغہ لا کے اِک پاسے رکھ دِتا تے اِک تولیہ لے کے اپنے لک دَوالے بنھ لیا۔
5 ایہدے بعد اوہنے اِک دابڑے چ پانی لیا تے شاگرداں دے پیر دھو کے اپنے لک دَوالے بنھے تولیے نال پُونجن لگ پیا۔
6 جدوں اوہ شمعون پطرس کول آیا تے اوہنے کہیا: ”مالک، تُوں میرے پیر دھون لگا ایں؟“
7 یسوع نے اوہنوں جواب دِتا: ”مَیں جو کر رہیا واں تُوں ایہنوں حالے نئیں سمجھ سکدا۔ پر بعد چ سمجھ جائیں گا۔“
8 پطرس نے اوہنوں کہیا: ”مَیں تینوں اپنے پیر کدی وی نئیں دھون دَواں گا۔“ یسوع نے اوہنوں کہیا: ”جے تُوں مینوں اپنے پیر نہ دھون دِتے تے تیرا میرا کوئی رشتہ نئیں۔“
9 شمعون پطرس نے اوہنوں کہیا: ”مالک، تے فیر تُوں میرے پیر ای نئیں سگوں میرے ہتھ تے میرا سِر وی دھو دے۔“
10 یسوع نے اوہنوں کہیا: ”جنہے نہا لیا اے اوہنوں پیراں توں سوا ہور کجھ دھون دی لوڑ نئیں سگوں اوہ پوری طرحاں صاف اے۔ تُسی پاک صاف او، پر سارے نئیں۔“
11 یسوع نُوں پتہ سی کہ اوہنوں کون دھوکھے نال پھڑوائے گا۔ ایسے لئی اوہنے کہیا سی کہ ”تُسی سارے پاک صاف نئیں۔“
12 اوہناں دے پیر دھون دے بعد یسوع اپنا چوغہ پا کے فیر بہہ گیا تے اوہناں نُوں کہیا: ”کیہہ تُسی سمجھ گئے او کہ مَیں تواڈے پیر کیوں دھوتے نیں؟
13 تُسی مینوں ”اُستاد“تے ”مالک“ کہندے او تے بالکل ٹھیک کہندے او کیونکہ مَیں ہے وی آں۔
14 ایس لئی جے مالک تے اُستاد ہوندے ہوئیاں مَیں تواڈے پیر دھوتے نیں تے فیر توانوں وی اِک دُوجے دے پیر دھونے چاہی دے نیں
15 کیونکہ مَیں تواڈے لئی اِک مثال قائم کیتی اے۔ جیس طرحاں مَیں تواڈے لئی کیتا،تُسی وی اوسے طرحاں کرو۔
16 مَیں توانوں سچ کہنا واں، جیس طرحاں اِک غلام اپنے مالک توں وڈا نئیں ہوندا، اوسے طرحاں جیس بندے نُوں بھیجیا جاندا اے، اوہ اپنے بھیجن والے توں وڈا نئیں ہوندا۔
17 ہُن توانوں ایہہ گلاں پتہ چل گئیاں نیں۔ جے تُسی ایہناں تے عمل کرو گے تے تُسی خوش رہوو گے۔
18 مَیں تواڈے ساریاں بارے گل نئیں کر رہیا کیونکہ جنہاں نُوں مَیں چُنیا اے، اوہناں نُوں مَیں جاننا واں۔ پر ایہہ سب کجھ ایس لئی ہویا تاکہ پاک کلام دی ایہہ گل پوری ہوئے: ”جیہڑا میری روٹی کھا رہیا سی، اوہی میرے خلاف ہو گیا۔“*
19 مَیں توانوں ایہہ گلاں پہلاں توں ای دَس رہیا واں تاکہ جدوں ایہہ ہون تے توانوں یقین ہو جائے کہ جو میرے بارے لکھیا اے، اوہ سچ اے۔
20 مَیں توانوں سچ کہنا واں، جیہڑا اوہنوں قبول کردا اے جنہوں مَیں گھلیا اے، اوہ مینوں وی قبول کردا اے تے جیہڑا مینوں قبول کردا اے، اوہ اوہنوں وی قبول کردا اے جنہے مینوں گھلیا اے۔“
21 ایہہ گلاں کہن دے بعد یسوع دا دل بڑا دُکھی ہویا تے اوہنے کہیا: ”مَیں توانوں سچ کہنا واں، تواڈے وچوں اِک جناں میرے نال دھوکھا کرے گا۔ “
22 ایہہ سُن کے شاگرد اِک دُوجے وَل ویکھن لگ پئے کیونکہ اوہناں نُوں نئیں سی پتہ کہ اوہ کِدے بارے گل کر رہیا اے۔
23 اِک شاگرد جنہوں یسوع بڑا پیار کردا سی، اوہدے نال ای بیٹھا ہویا سی۔
24 ایس لئی شمعون پطرس نے اوس شاگرد نُوں سِر نال اشارہ کر کے پچھیا: ”دَس اوہ کِدے بارے گل کر رہیا اے۔“
25 اوہ شاگرد پچھے مُڑیا تے یسوع دے سینے نال ٹیک لا کے اوہنوں پچھیا: ”مالک، اوہ بندہ کون اے؟“
26 یسوع نے جواب دِتا: ”اوہی جنہوں مَیں پیالے چ بُرکی ڈبو کے دَواں گا۔“ فیر اوہنے بُرکی ڈبو کے شمعون اِسکریوتی دے پُتر یہوداہ نُوں دِتی۔
27 جدوں یہوداہ نے بُرکی لے لئی تے اوہدے بعد شیطان نے اوہدے دل نُوں اپنے وَس چ کر لیا۔ ایس لئی یسوع نے اوہنوں کہیا: ”تُوں جو کرنا چاہنا ایں چھیتی چھیتی کر لے۔“
28 پر اوتھے بیٹھے شاگرداں چوں کسے نُوں پتہ نہ چلیا کہ یسوع نے اوہنوں ایہہ کیوں کہیا اے۔
29 یہوداہ کول پیسیاں دا ڈبہ ہوندا سی۔ ایس لئی کجھ شاگرداں نے سوچیا کہ یسوع اوہنوں ایہہ کہہ رہیا اے کہ ”عید لئی جیہڑیاں چیزاں چاہی دِیاں نیں، اوہ خرید لے“ یاں فیر ایہہ کہ ”غریباں وچ کجھ پیسے وَنڈ دے۔“
30 ایس لئی بُرکی لین دے بعد یہوداہ فوراً اوتھوں چلا گیا۔ اوہ رات دا ویلا سی۔
31 اوہدے جان دے بعد یسوع نے کہیا: ”ہُن انسان دے بیٹے* دی وڈیائی ہوئے گی تے اوہدے ذریعے خدا دی وڈیائی ہوئے گی۔
32 خدا آپ اوہدی وڈیائی کرے گا تے اوہ چھیتی ایہہ کرے گا۔
33 پیارے بچیو، مَیں ہُن بس تھوڑا ای چِر تواڈے نال آں۔ تُسی مینوں لبھو گے تے جو مَیں یہودیاں نُوں کہیا سی ہُن توانوں وی اوہی کہہ رہیا واں کہ ”جِتھے مَیں جا رہیا واں تُسی اوتھے نئیں آ سکدے۔“
34 مَیں توانوں اِک نواں حکم دے رہیا واں کہ تُسی اِک دُوجے نال پیار کرو۔ جیویں مَیں تواڈے نال پیار کیتا اے، تُسی وی اِک دُوجے نال پیار کرو۔
35 جے تواڈے چ پیار ہوئے گا تے ایہدے توں ای ساریاں نُوں پتہ چلے گا کہ تُسی میرے شاگرد او۔“
36 شمعون پطرس نے اوہنوں پچھیا: ”مالک، تُوں کتھے جا رہیا ایں؟“ یسوع نے جواب دِتا: ”مَیں جِتھے جا رہیا واں تُوں اوتھے میرے پچھے ہُن نئیں آ سکدا۔ پر بعد چ آئیں گا۔“
37 پطرس نے اوہنوں کہیا: ”مالک، مَیں ہُن تیرے پچھے کیوں نئیں آ سکدا؟ مَیں تے تیرے لئی اپنی جان وی وار دَواں گا۔“
38 یسوع نے جواب دِتا: ”کیہہ تُوں واقعی میرے لئی اپنی جان وار دَویں گا؟ مَیں تینوں سچ کہنا واں، اَج رات کُکڑ دے بانگ دین توں پہلاں تُوں تِن واری مینوں جانن توں اِنکار کریں گا۔“
