‏”‏جدوں مَیں چھوٹی ساں تے میرا وڈا بھرا ہر روز مینوں ماردا سی تے گالاں کڈھدا سی۔ جدوں میری شادی ہو گئی تے میری سّس نے وی میرے نال ایہی سلوک کیتا۔ اوہ تے میرا سوہرا میرے نال نوکراں ورگا سلوک کردے سن۔ میرا دل کردا سی کہ مَیں خودکُشی کر لواں۔“‏—‏مدھو،‏ a انڈیا۔‏

 صحت دے عالمی اِدارے دی اِک رپورٹ چ دَسیا گیا اے کہ دُنیا بھر چ عورتاں تے ظلم کرنا اِک عام گل اے۔ اِک اندازے دے مطابق ہر تِن وچوں اِک عورت نُوں اپنی زندگی چ کدی نہ کدی جسمانی یاں جنسی تشدد دا سامنا کرنا پیندا اے۔‏

 جے تواڈے نال وی کدی اِنج ہویا اے تے شاید توانوں ایہہ ڈر ہووے کہ تواڈے نال ایہہ دُبارہ وی ہو سکدا اے۔ دُنیا بھر چ عورتاں نال ہون والے ظلم تے بدسلوکی دی وجہ توں شاید توانوں محسوس ہوئے کہ عورتاں دی کوئی اہمیت نئیں اے۔ پر کیہہ خدا دی نظر چ عورتاں دی اہمیت ہے وے؟‏

 ایت:‏ خدا نے انساناں نُوں مرد تے عورت بنایا۔—‏پیدائش 1:‏27‏۔‏

 ایت دا مطلب:‏ خدا نے انساناں نُوں مرد تے عورت بنایا۔ اوہدی نظر چ دونویں اہم نیں۔ ایہدے علاوہ بائبل چ خدا نے شوہراں نُوں ایہہ ہدیت دِتی اے:‏ ”‏اپنی اپنی بیوی نال اُنج ای پیار کرو جیویں تُسی اپنے آپ نال کردے او۔“‏ (‏اِفسیوں 5:‏33؛‏ کُلسّیوں 3:‏19‏)‏ اِک شوہر نُوں اپنی بیوی نُوں دھمکانا یاں مارنا کُٹنا نئیں چاہی دا سگوں اوہدے نال پیار نال پیش آنا چاہی دا اے۔ خدا دے کلام توں پتہ چلدا اے کہ اوہنوں عورتاں دی بڑی فکر اے تے اوہ اوہناں دی حفاظت کرنا چاہندا اے۔‏

 ‏”‏بچپن چ میرے رشتے‌داراں نے میرے نال جنسی بدسلوکی کیتی۔ جدوں مَیں 17 سال دی ساں تے میرے باس نے مینوں دھمکی دِتی کہ جے مَیں اوہدے نال سیکس نہ کیتا تے اوہ مینوں نوکری توں کڈھ دَوے گا۔ میرا شوہر، میرے ماں پیو تے میرے گوانڈھی وی میری بے‌عزتی کردے سن۔ پر جدوں مَیں اپنے خالق یہوواہ b بارے سکھیا تے مینوں پتہ چلیا کہ اوہ عورتاں دی عزت کردا اے۔ ایہہ جان کے مینوں محسوس ہویا کہ اوہ مینوں پیار کردا اے تے میری بڑی قدر کردا اے۔“‏—‏ماریا، ارجنٹینا۔‏

 ایت:‏ ایہو جیہا دوست وی ہوندا اے جیہڑا بھرا توں ودھ کے وفا کردا اے۔ —‏اَمثال 18:‏24‏۔‏

 ایت دا مطلب:‏ اِک سچا دوست ہمیشاں ساتھ دیندا اے۔ جے ممکن ہوئے تے اپنے کسے بھروسے‌مند دوست نُوں دَسو کہ تُسی کیہہ محسوس کردے او۔‏

 ‏”‏مَیں 20 سالاں تک کسے نُوں نہ دَسیا کہ میرے نال جنسی بدسلوکی ہوئی اے۔ ایہدی وجہ توں مَیں بوہت بے‌چین تے دُکھی رہن لگ پئی۔ پر جدوں مَیں اِک ایہو جہے انسان نُوں اپنے جذبات بارے دَسیا جیہڑا میری گل سُنن لئی تیار سی تے مینوں اِنج لگیا جیویں میرے دل دا بھار ہولا ہو گیا اے۔“‏—‏ایلف، تُرکیہ۔‏

 ایت:‏ ”‏اپنیاں ساریاں پریشانیاں اوہدے تے پا دَوو کیونکہ اوہنوں تواڈی فکر اے۔“‏—‏1-‏پطرس 5:‏7‏۔‏

 ایت دا مطلب:‏ جدوں تُسی خدا کولوں دُعا کردے او تے اوہ تواڈی سُن دا اے۔ (‏زبور 55:‏22؛‏ 65:‏2‏)‏ اوہنوں تواڈی فکر اے تے اوہ توانوں احساس دَواندا اے کہ تُسی اوہدے لئی اہم او۔‏

 ‏”‏یہوواہ خدا بارے سکھن نال میرے دل تے لگے زخم بھرن لگ پئے۔ ہُن مَیں دُعا چ خدا نُوں کُھل کے اپنے دل دی گل دسنی آں۔ اوہ اِک ایہو جیہا دوست اے جیہڑا میرے جذبات نُوں سمجھدا اے۔“‏—‏اینا، بیلیز۔‏

 ایت:‏ اَے یہوواہ، تُوں یتیماں تے کچلے ہوئے لوکاں نُوں اِنصاف دَوائیں گا تاکہ فانی انسان اوہناں نُوں ہور نہ ڈرا سکے۔—‏زبور 10:‏17، 18‏۔‏

 ایت دا مطلب:‏ خدا چھیتی ای ہر طرحاں دی نااِنصافی نُوں ختم کر دَوے گا یعنی اوہ عورتاں تے ہون والے ظلم تے تشدد نُوں وی ختم کر دَوے گا۔‏

 ‏”‏جدوں مَیں ایہہ سکھیا کہ یہوواہ عورتاں تے کُڑیاں نال ہون والے ظلم نُوں چھیتی ای ختم کر دَوے گا تے مینوں اِنج محسوس ہویا جیویں کہ اوہنے میرے زخماں تے مرہم لا دِتی ہوئے۔ ایس گل توں مینوں دِلی سکون ملیا۔“‏—‏روبرٹا، میکسیکو۔‏

 ایس بارے ہور جانن لئی کہ بائبل چ کیہہ امید دِتی گئی اے تے تُسی خدا دے وعدیاں تے بھروسا کیوں کر سکدے او، کسے یہوواہ دے گواہ نال مِلن لئی درخاست گھلو کیونکہ اوہ بائبل دے ذریعے تواڈی مدد کر سکدے نیں۔‏

 ایس مضمون نُوں ڈاؤن‌لوڈ تے پرنٹ کرو۔‏