کُلسّیوں دے ناں خط 3:1-25
3 پر جے توانوں مسیح نال زندہ کیتا گیا سی تے فیر اوہناں چیزاں نُوں حاصل کرن دی کوشش کردے رہوو جیہڑیاں اسمان چ نیں جتھے مسیح خدا دے سجے ہتھ بیٹھا ہویا اے۔
2 اپنا دھیان اسمان دِیاں چیزاں تے لائی رکھو زمین دِیاں چیزاں تے نئیں
3 کیونکہ تُسی مر گئے سو پر ہُن تواڈی زندگی مسیح دے ہتھ وچ* اے جیہڑا خدا نال اِک مُٹھ اے۔
4 جدوں مسیح ظاہر ہوئے گا جدے ذریعے سانوں زندگی مِلدی اے تے تُسی وی پوری شان چ اوہدے نال ظاہر ہووو گے۔
5 ایس لئی اپنے جسم دے حصیاں نُوں ایہو جہے کماں دے لحاظ نال مار دَوو جیویں کہ جنسی بدکاری،* ناپاکی، بے قابو جنسی خواہشاں، نقصان پونچان والیاں خواہشاں تے لالچ جیہڑا کہ بُتپرستی دے برابر اے۔
6 ایہو جہے کم کرن والیاں تے خدا دا قہر نازل ہوئے گا۔
7 پہلاں تُسی وی ایہو جہے کم کردے سو۔
8 پر ہُن تُسی ایہہ سارے کم وی بالکل چھڈ دَوو: قہر، غصہ، بُرائی، گالیگلوچ تے بےہودہ گلاں۔
9 تُسی اِک دُوجے نال جھوٹھ نہ بولو۔ پرانی شخصیت* نُوں ایہدے کماں سمیت لا کے سُٹ دَوو
10 تے نوِیں شخصیت نُوں پا لوو۔ جیویں جیویں تُسی خدا نُوں جان دے جاؤ گے،* تواڈی شخصیت اوہدیاں خوبیاں مطابق ڈھلدی جائے گی کیونکہ اوہنے ای ایہنوں بنایا اے۔
11 نوِیں شخصیت پان دی وجہ توں ایس گل نال کوئی فرق نئیں پیندا کہ کوئی یونانی اے یاں یہودی، اوہدا ختنہ ہویا اے یاں نئیں ہویا، اوہ پردیسی اے، سکوتی* اے، غلام اے یاں آزاد اے سگوں مسیح سب کجھ اے تے ساریاں نال اِک مُٹھ اے۔
12 ایس لئی خدا دے چُنے ہوئے مُقدس تے پیارے خادماں دے طور تے اِک دُوجے لئی دِلوں فکر وکھاؤ تے اپنی شخصیت نُوں ہمدردی، مہربانی، خاکساری، نرمی تے صبر نال سجاؤ۔
13 جے توانوں اِک دُوجے نال کوئی شکایت ہووے تے تُسی اِک دُوجے دی برداشت کردے رہوو تے اِک دُوجے نُوں دِلوں معاف کرو۔ جیویں یہوواہ نے توانوں دِلوں معاف کیتا اے، تُسی وی ایسے طرحاں کردے رہوو۔
14 پر سب توں ضروری ایہہ وے کہ تُسی اپنی شخصیت نُوں محبت نال سجاؤ جیہڑی ساریاں نُوں پوری طرحاں اِک مُٹھ رکھدی اے۔
15 نالے اوس اطمینان نُوں اپنے دِلاں تے راج کرن دَوو جیہڑا مسیح دیندا اے کیونکہ توانوں ایسے اِطمینان لئی بلایا گیا سی تاکہ تُسی اِک جسم دے حصے بنے رہوو۔ ایہدے علاوہ وکھاؤ کہ تُسی شکرگزار او۔
16 مسیح دے کلام نُوں اپنے دِلاں چ پوری طرحاں وساؤ تاکہ تُسی حکمت حاصل کر سکو۔ اِک دُوجے نُوں تلیم تے حوصلہ* دین لئی زبور گاؤ، خدا دی حمد کرو، شکرگزاری نال گیت گاؤ تے اپنے دِلاں چ یہوواہ دی وڈیائی لئی گاندے رہوو۔
17 تُسی جو وی کہندے یاں کردے او، سب کجھ مالک یسوع دے ناں تے کرو تے اوہدے ذریعے ساڈے خدا باپ دی شکرگزاری کردے رہوو۔
18 بیویو، تُسی اپنے اپنے شوہر دِیاں تابع رہوو کیونکہ مالک اپنے شاگرداں توں ایہی چاہندا اے۔
19 شوہرو، تُسی اپنی اپنی بیوی نال پیار کرو تے اوہدے تے غصے چ نہ بھڑکو۔ *
20 بچیو، ہر گل چ اپنے ماں پیو دا کہنا منو کیونکہ ایہدے توں مالک بوہت خوش ہوندا اے۔
21 تُسی جیہڑے باپ او، اپنے بچیاں نُوں غصہ نہ دَواؤ تاکہ اوہ بے حوصلہ نہ ہو جان۔
22 غلامو، ہر گل چ اپنے مالکاں دا کہنا منو۔ اوہناں نُوں خوش کرن لئی صرف اوہدوں ای اِنج نہ کرو جدوں اوہ توانوں ویکھ رہے ہون سگوں یہوواہ دا خوف رکھدے ہوئیاں دِلوں اوہناں دا کہنا منو۔
23 تُسی جو وی کرو، جیجان نال کرو تے ایہہ سوچ کے کرو کہ تُسی یہوواہ لئی کر رہے او نہ کہ انساناں لئی
24 کیونکہ توانوں پتہ اے کہ توانوں انعام چ یہوواہ وَلّوں وراثت ملے گی۔ ساڈے مالک مسیح دی غلامی کرو۔
25 یاد رکھو کہ جیہڑا بندہ غلط کم کردا اے، اوہنوں اپنے غلط کماں دی سزا بھگتنی پووے گی کیونکہ خدا کسے دی طرفداری نئیں کردا۔
فٹ نوٹ
^ یونانی چ: ”مسیح چ چھپی ہوئی اے۔“
^ یونانی چ: ”پورنیا۔“ ”لفظاں دی وضاحت“ نُوں ویکھو۔
^ یعنی سوچ تے عادتاں۔
^ یونانی چ: ”صحی علم حاصل کردے جاؤ گے۔“
^ ایہہ لفظ اوہناں لوکاں لئی استمال ہوندا سی جنہاں نُوں جاہل تے گنوار سمجھیا جاندا سی۔
^ یاں، ”نصیحت۔“
^ یاں، ”سختی نہ کرو۔“
