یہوواہ دے گواہ ہفتے چ دو وار عبادت لئی اپنیاں عبادت‌گاہواں چ جمع ہوندے نیں۔ اوہناں دِیاں عبادتاں چ کیہہ کجھ ہوندا اے؟ تے مینوں اوہناں دِیاں عبادتاں تے جا کے کیہہ فائدہ ہووے گا؟‏

•  یہوواہ دے گواہواں دِیاں عبادت گاہواں چ کیہہ ہوندا اے؟‏

•  توانوں یہوواہ دے گواہواں دِیاں عبادتاں چ کیوں جانا چاہیدا اے؟‏

•  ایہدے بارے دُوجے نوجواناں دا کیہہ خیال اے؟‏

 یہوواہ دے گواہواں دِیاں عبادت‌گاہواں چ خدا دے کلام چوں تلیم دِتی جاندی اے تے خاص طور تے ایہہ سکھایا جاندا اے کہ اَسی کیویں بائبل دے اصولاں تے عمل کر سکنے آں۔ ایہناں عبادتاں چ جا کے تُسی :‏

•   خدا دے بارے سچائی سکھو گے۔‏

•   دُنیا دے بھیڑے حالاتاں دی وجہ جانو گے۔‏

•   اِک چنگے انسان بنو گے۔‏

•    چنگے دوست لبھ سکو گے۔‏

 کیہہ توانوں پتہ اے؟‏ یہوواہ دے گواہواں دِیاں عبادت‌گاہواں نُوں کنگڈم ہال ایس لئی کہیا جاندا اے کیونکہ ایہناں عبادت‌گاہواں چ خدا دی بادشاہی بارے تلیم دِتی جاندی اے۔—‏متی 6:‏9، 10؛‏ 24:‏14؛‏ لُوقا 4:‏43‏۔‏

 اوتھے دِتی جان والی تلیم تواڈی مدد کرے گی‏۔اوہناں عبادتاں چ بائبل دے اصولاں دی جیہڑی تلیم دِتی جاندی اے اوہدے توں توانوں حکمت تے دَنائی ملے گی۔ (‏امثال 4:‏5‏)‏ پاک کلام دی تلیم اپنی زندگی چ چنگے فیصلے کرن چ تواڈی مدد کرے گی۔ نالے ایہہ زندگی دے ضروری سوالاں دے جواب لبھن چ تواڈی بڑی مدد کرے گی جیویں کہ:‏

•   ساڈی زندگی دا مقصد کیہہ اے؟‏

•   کیہہ ساڈیاں تکلیفاں دا ذمے دا ر خدا اے؟‏

•   مرن توں بعد انساناں نال کیہہ ہوندا اے؟‏

 یہوواہ دے گواہواں دِیاں عبادتاں تے ایہو جہے موضوعاں بارے گل کیتی جاندی اے:‏

•   سانوں خدا دے کلام چوں رہنمائی کیوں لینی چاہی دی اے؟‏

•   مشکل ویلے چ سانوں مدد کتھوں مل سکدی اے؟‏

•   خدا دی بادشاہی توں اَج سانوں کیویں فائدہ ہو رہیا اے؟‏

 ‏”‏میرا اِک ہم‌جماعت ساڈی عبادت چ آیا۔‏ اوہ ساڈے خاندان نال بیٹھا سی تے اَسی اوہنوں عبادت چ استمال ہون والیاں کتاباں دِتیاں۔‏ بعد چ اوہنے مینوں دَسیا کہ ساڈی عبادت دے دوران بھین بھراواں دے تبصرے سن کے اوہنوں بڑا چنگا لگیا۔‏ نالے اوہنے کہیا کہ اوہناں دے چرچ چ تلیم دین لئی ایہو جہیاں کتاباں استمال نئیں ہوندیاں۔“‏–‏برینڈا۔‏

 کیہہ توانوں پتہ اے؟‏ یہوواہ دے گواہواں دِیاں عبادت‌گاہواں چ ہر کوئی آ سکدا اے تے اوتھے کوئی چندہ نئیں لیا جاندا۔‏

 اوتھے آئے لوکاں نُوں مل کے توانوں حوصلہ ملے گا۔‏ بائبل دَسدی اے کہ کٹھے مل کے عبادت کرن دی وجہ توں سانوں موقع مِلدا اے کہ اَسی اِک دُوجے دا حوصلہ ودھائیے۔ (‏عبرانیوں 10:‏24، 25‏)‏ ایس خود غرض دُنیا چ توانوں ایہو جہے لوکاں نال وقت گزار کے بڑا چنگا لگے گا جیہڑے خدا نُوں بوہت پیار کردے نیں تے دُوجے لوکاں لئی فکر وکھاندے نیں۔‏

 ‏”‏اِک لمے دن توں بعد میں بوہت تھک جانی آں،‏ پر عبادت تے دُوجیاں نُوں مل کے مینوں بڑا سکون مِلدا اے۔‏ گھر واپس آندے ویلے میں بوہت خوش ہونی آں تے اگلے دن لئی بالکل تیار محسوس کرنی آں۔“‏–‏ایلیسا۔‏

 کیہہ توانوں پتہ اے؟‏ پوری دُنیا چ یہوواہ دے گواہواں دِیاں 1 لکھ 20 ہزار کلیسیاواں نیں تے 60 ہزار توں زیادہ عبادت‌گاہواں نیں۔ ہر سال تقریباً 1500 نوِیاں عبادت‌گاہواں تعمیر کیتیاں جا رہیاں نیں کیونکہ عبادت چ آن والے لوکاں دی تعداد ودھدی جا رہی اے۔‏ a