اِک نوجوان جدا ناں وِل اے کہندا اے:‏ ”‏جے توانوں بائبل پڑھن دا صحی طریقہ نئیں پتہ تے فیر بائبل پڑھدے ویلے توانوں بوریت محسوس ہو سکدی اے۔“‏

 کیہہ تُسی ایہو جہے طریقیاں بارے جاننا چاہوو گے جنہاں تے عمل کر کہ توانوں بائبل پڑھن دا مزہ آئے؟ ایہہ مضمون تواڈی مدد کرے گا۔‏

•  بائبل چ لکھے واقعے اپنے دل دِیاں اَکھاں نال ویکھو

•  تحقیق کرو

•  ایہدے بارے دُوجے نوجواناں دا کیہہ خیال اے؟‏

 تُسی جو کجھ وی پڑھ رہے او اوہنوں پورے دھیان نال پڑھو۔ تُسی کیہہ کر سکدے او؟‏

1.   بائبل چوں اوہ واقعہ چُنو جیہڑا تُسی پڑھنا چاہندے او۔ تُسی یسوع دے زمانے توں پہلے دا یاں اِنجیلاں چوں کوئی واقعہ چُن سکدے او یاں فیر ویب‌سائٹ jw.org تے موجود ‏”‏ڈرامے دے انداز چ بائبل پڑھائی“‏ وچوں کسے واقعے نُوں چُن سکدے او۔‏

2.   واقعہ تُسی چُنیا اے اوہنوں یاں تے تُسی کلّے پڑھ سکدے او یاں فیر دوستاں یاں اپنے گھر والیاں نال مِل کے اُچی آواز چ پڑھ سکدے او۔اِک بندہ واقعے نُوں پڑھے تے دُوجے فرق فرق کرداراں دِیاں گلاں نُوں پڑھن۔‏

3.  

   •   اوس واقعے نُوں سمجھن لئی اوہدیاں تصویراں بناؤ۔ اِک بورڈ تے ایہہ تصویراں اوسے ترتیب نال لاؤ جیویں ایہہ واقعہ ہویا سی۔ ہر تصویر دے تھلے لکھو کہ اوہدے چ کیہہ وکھایا جا رہیا اے۔‏

   •   خدا دے کسے وفادار بندے بارے پڑھدے ویلے، اوہدے بارے لکھو کہ اوہدے چ کیہڑیاں خوبیاں سن، اوہنے کیہڑے کم کیتے تے ایہناں دی وجہ توں اوہنوں کیہڑیاں برکتاں ملیاں۔‏

   •   واقعے نُوں خبر دی شکل چ پیش کرو۔ایہدے فرق فرق پہلوواں تے غور کرو نالے اوہناں لوکاں دا اِنٹرویو وی شامل کرو جیہڑے اہم کرداراں دی اداکاری کر رہے نیں۔‏

   •   جے کسے کردار نے کوئی غلط فیصلہ کیتا سی تے سوچو کہ جے اوہ صحی فیصلہ کر دا تے کیہہ ہوندا۔مثال لئی اوس واقعے بارے سوچو جدوں پطرس نے یسوع دا اِنکار کیتا سی۔ (‎مرقس 14:‏66-‏72‏)‏ پطرس لوکاں دے دباؤ دا مقابلہ کیویں کر سکدا سی؟‏

   •   تُسی کسے واقعے نُوں استمال کردے ہوئیاں آپ کوئی ڈرامہ لکھ سکدے او جدے چ تُسی اوہ سبق شامل کر سکدے او جیہڑے اَسی اوس واقعے توں سکھنے آں۔‏‏—‏رومیوں 15:‏4‏۔‏

 جے تُسی کسے واقعے دی تفصیل تے غور کرو گے تے ایہدے چوں توانوں خزانے وانگوں قیمتی گلاں لبھن گیاں۔کدی کدار تے بائبل چ لکھے کسے واقعے دے اِک یاں دو لفظاں چ ای بوہت اہم گلاں ہوندیاں نیں۔‏

 مثال لئی، متی 28:‏7 تے مرقس 16:‏7 تے غور کرو۔‏

•    مرقس نے ایہہ کیوں لکھیا کہ چھیتی ای یسوع اپنے شاگرداں تے پطرس نُوں ملےِ گا؟‏

•  اشارہ:‏ مرقس نے ایہہ واقعہ اپنی اَکھیں نئیں ویکھیا سی۔ ایہدے بارے اوہنوں پطرس نے دَسیا ہوئے گا۔‏

•  ذرا غور کرو:‏ پطرس نُوں ایہہ سن کے حوصلہ کیوں ملیا ہوئے گا کہ یسوع مسیح اوہنوں دوبارہ ملنا چاہندا اے؟ (‏مرقس 14:‏66-‏72‏)‏ یسوع مسیح نے ایہہ کیویں وکھایا کہ اوہ پطرس دا سچا دوست اے؟ تُسی یسوع مسیح دی مثال تے عمل کردے ہوئیاں دُوجیاں دے سچے دوست کیویں بن سکدے او؟‏

جدوں تُسی بائبل چ لکھے کسے واقعے نُوں پڑھدے ویلے اوہنوں اپنے دل دِیاں اَکھاں نال ویکھن دی کوشش کرو گے نالے اوہناں بارے تحقیق کرو گے تے توانوں بائبل پڑھن دا ہور وی مزہ آئے گا۔‏