پاک کلام چ میکاَپ کرن تے زیور پان بارے کیہہ دَسیا گیا اے؟
پاک کلام دا جواب
بھانویں کہ بائبل چ ایس موضوع بارے زیادہ کجھ نئیں دَسیا گیا پر ایہدے چ میکاَپ کرن، زیور پان تے سجن سنورن توں منع نئیں کیتا گیا۔ بائبل چ ظاہری خوبصورتی دی بجائے اندرونی خوبصورتی تے زور دِتا گیا اے جیہڑی پُر سکون تے نرم رویے نال سجی ہوندی اے تے کدی ختم نئیں ہوندی۔—1-پطرس 3:3، 4۔
سجنا سنورنا غلط نئیں اے
بائبل چ جنہاں وفادار عورتاں دا ذکر اے، اوہ وی سجدیاں سنوردیاں سن۔ اِضحاق دی بیوی رِبقہ نے سونے دی نتھ، سونے دے کڑے تے ہور وی قیمتی زیور پائے سن جیہڑے اوہدے ہون والے سوہرے نے اوہنوں تحفے دے طور تے دِتے سن۔ (پیدائش 24:22، 30، 53) ایسے طرحاں آستر نے وی اپنی خوبصورتی نُوں نکھارن لئی کئی چیزاں استمال کیتیاں تاکہ اوہ فارس دی ملکہ بنن لئی اپنے آپ نُوں تیار کر سکے۔ (آستر 2:7، 9، 12) ایہناں چیزاں چ میکاَپ تے رنگ نکھارن والیاں کئی چیزاں شامل سن۔
بائبل چ زیور دِیاں مثالاں دے کے چنگیاں گلاں دَسیاں گئیاں نیں۔ مثال لئی بائبل چ دَسیا گیا اے کہ چنگا مشورہ دین والے بندے دی گل،سُنن والے دے کن چ سونے دی والی وانگوں اے۔ (امثال 25:12) ایسے طرحاں خدا نے اِسرائیلی قوم نال اپنے رویے دا ذکر کردے ہوئیاں اپنے آپ نُوں اِک ایہو جہے شوہر وانگوں کہیا جیہڑا اپنی دُلہن نُوں کڑے، ہار تے والیاں پاندا اے۔ ایس وجہ توں اِسرائیلی قوم بوہت خوبصورت بن گئی۔—حِزقیایل 16:11-13۔
میکاَپ کرن تے زیور پان بارے کجھ غلطفہمیاں
غلطفہمی: 1-پطرس 3:3 دے مطابق بائبل چ والاں دے سٹائل بنان تے سونے دے زیور پان توں منع کیتا گیا اے۔
سچائی: ایس ایت دِیاں اگلیاں پچھلیاں ایتاں تے غور کرن نال پتہ چلدا اے کہ اندرونی خوبصورتی ظاہری خوبصورتی نالوں زیادہ اہم اے۔ (1-پطرس 3:3-6) بائبل دِیاں دُوجیاں ایتاں توں وی ایہی گل ثابت ہوندی اے۔—1-سموئیل 16:7؛ امثال 11:22؛ 31:30؛ 1-تیمُتھیُس 2:9، 10۔
غلطفہمی: اِیزِبل جیہڑی اِک بھیڑی ملکہ سی، اوہنے اپنیاں اَکھاں چ سُرمہ پایا۔ ایہدے توں پتہ چلدا اے کہ میکاَپ کرنا غلط اے۔—2-سلاطین 9:30۔
سچائی: اِیزِبل جادو ٹونا کردی سی نالے اوہنے قتل وی کرائے سن۔ اوہنوں اوہدے بھیڑے کماں دی وجہ توں سزا ملی نہ کہ میکاَپ کرن دی وجہ توں۔—2-سلاطین 9:7، 22، 36، 37۔