Wuarom moaken Menschen eenen Unjascheet? Wäajen dee bie aundre doano kjikjen, von woon Launt dee sent ooda von woone Rauss, Volkj ooda Sproak ooda waut fa eenen Gloowen dee haben ooda aus dee rikj ooda oam sent ooda aus daut Mana ooda Frues sent. Eenje denkjen uk schlajcht äwa aundre, wäajen dee doano kjikjen, woo oolt de aundre sent, no waut vonne Schoolen dee jegonen sent, aus dee behindat sent ooda woo dee lat. Un doch jleewen dee, daut see nich eenen Unjascheet manke Menschen moaken.

Ooda du? Moakst du eenen Unjascheet manke Menschen? De mieeschte woaren daut bloos von aundre en, oba nich von sikj selfst. En Werkjlichkjeit denkj wie aula mol schlajcht von aundre. Woo kaun daut utkomen, wan eena schlajcht äwa eene Sort Menschen denkjt un dan wäm von soone Sort bejäajent? David Williams, waut huach utjelieet es, sajcht: “Eena woat dän dan aundasch behaundlen, onen daut eena daut enwoat.”

Jovica biejlikj wont en een Launt en Europa, wua uk waut Menschen von een aundret Volkj läwen. Hee sajcht: “Ekj docht, daut nich eena von dee een gooda Mensch wia. Oba mie wia daut nich kloa, daut ekj eenen Unjascheet manke Menschen muak. Ekj docht: ‘Dee sent bloos soo.’”

Väl Rejierungen moaken Jesazen, daut de Menschen nich eenen Unjascheet moaken sellen, biejlikj tweschen de Raussen. Oba doawäajen woat daut nich opphieren. Wuarom nich? Wiels de Jesazen bloos sajen, waut de Menschen doonen sellen. Dee kjennen dee nich väasajen, waut dee denkjen un feelen sellen. Un eenen Unjascheet moaken kjemt von daut, waut eena em Hoat un en de Jedanken haft. Meent daut dan, daut eena doa nuscht jäajen doonen kaun? Ooda jeft et doa Rot fäa?