Je mea wie äwa wäm siene Ieejenschoften lieren, je bäta kjan wie dän, un soo kjenn wie jratre Frind woaren. Biejlikj soo es daut met Jehova – je mea wie äwa siene Ieejenschoften lieren, je bäta weet wie, woo hee es, un kjennen jratre Frind met am woaren. Von aul de goode Ieejenschoften, waut Gott haft, sent vea besonda: siene Macht, Weisheit, Jerajchtichkjeit un Leew.

“HAR Gott, du hast de Himmel un de Ieed jemoakt met diene groote Krauft [Macht]” (JEREMIA 32:17).

Jehova siene Macht es aun siene Schepfunk to seenen. Biejlikj wan du em Somma aun eenen Äwadach buten best, waut feelst du dan opp diene Hut? De Hett von de Sonn. En Werkjlichkjeit feelst du Jehova siene Macht derch daut, waut hee jemoakt haft. Woo stoakj es de Sonn? Enne Medd es dee rom 15 000 000 Grod Celsius (27 000 000 °F) heet. De Krauft, waut jieda Sekund ut de Sonn rutjeit, es soo väl aus wan väl hundade Millionen Atomm-Bommen oppdäwren wudden.

Un de Sonn es mau kjlien em Vejlikj met väl von de ontalboare Stierns, waut daut jeft. Forscha taksieren, daut eent von de jratste Stierns, waut UY Scuti heet, eenen Derchmäta haft, waut rom 1 700 Mol jrata es aus dee von de Sonn. Wan de UY Scuti doa wia, wua de Sonn es, dan wudd dee soo väl Rum ennämen, daut dee bie de Ieed un mau rajcht bie dän Planeet Jupiter vebierieekjen wudd. Veleicht halpt ons dit noch bäta to vestonen, waut Jeremia meend, aus hee säd, daut Gott Himmel un  Ieed met siene groote Macht jemoakt haft, aulsoo daut gaunze Weltaul met aule Stierns.

Woo nuzt Gott siene Macht ons? Ons Läwen henjt von Gott siene Schepfunk auf, biejlikj von de Sonn un von aul daut aundre, waut oppe Ieed es. Gott brukt siene Macht uk toom de Menschen eenselwies halpen. Woo? Aus Jesus oppe Ieed wia, jeef Jehova am de Macht, Wunda to doonen. Daut sajcht: “De blinje kjennen wada seenen, de lome kjennen gonen, de Leprakranke woaren rein, de doowe kjennen wada hieren, Doodes stonen opp” (Matäus 11:5). Woo es daut vondoag dän Dach? De Schreft sajcht: “Hee moakt de schwake stoakj” un “dee waut sikj opp däm HARN veloten, kjrieen fresche Krauft” (Jesaja 40:29, 31). Gott kaun ons “butajeweenlije Krauft” jäwen, daut wie kjennen met Schwierichkjeiten un Proowen foadich woaren ooda dee uthoolen (2. Korinta 4:7, Reimerbibel). West du soonen Gott nich noda komen, waut siene Macht, waut onen Enj es, leeftolich brukt toom ons halpen?

“Oo HAR, woo sent diene Woakjen doch soo väl un soo groot! En diene Weisheit hast du daut aula jemoakt” (PSALM 104:24).

Je mea wie doaräwa lieren, waut Gott aules jemoakt haft, je dolla bewunda wie siene Weisheit. Eenje Forscha studieren mau rajcht Jehova siene Schepfunk; dee kjikjen sikj Sachen von de Natua auf un proowen dee notomoaken toom äare Sachen vebätren. Aus daut een eefacha Baka es ooda daut Moddel von Zhets, daut es aules nojemoakt von de Natua.

Daut jratste Biespel von Jehova siene Weisheit es dän Mensch sien Kjarpa. Denkj mol äwa no, woo een Bäbe aunfangt to waussen. Daut fangt met eene befruchte Zell aun (daut kjlanste Stekjskje en onsen Kjarpa), wua aules bennen es, woo daut Bäbe woaren saul. Dise Zell deelt sikj en väl Zellen, waut äwareen loten. Oba krakjt en de rajchte Tiet fangen de Zellen aun sikj to veendren un daut jeft dan hundade veschiedne Sorten doavon, biejlikj Blootzellen, Narfenzellen un Knoakenzellen. Un boolt fangt daut bennaschte von daut Bäbe aun to waussen un to oabeiden. Mau näajen Moonat lota haft daut von de befruchte Zell een gaunz foadjet Bäbe jejäft, waut von dusende Millionen Zellen jemoakt es. Väle, waut dise Weisheit seenen, stemmen met dän Bibelschriewa met, waut säd: “Ekj dank die, daut ekj wundaboa jemoakt sie” (Psalm 139:14).

Woo nuzt Gott siene Weisheit ons? De Schepfa weet, waut ons fält toom schaftich sennen. Wiels hee sea väl Erkjantnis un Vestentnis haft, kaun hee ons en sien Wuat, de Bibel, weisen Rot jäwen. Biejlikj rot ons sien Wuat too: “Vejäft junt unjarenaunda” (Kolossa 3:13). Es daut nich een weisa Rot? Secha. Doktasch haben rutjefungen, daut eena bäta schlopen kaun un daut een huaga Blootdruck läaja woat, wan eena aundre vejeft. Daut kaun uk de Narfenkrankheit un aundre Krankheiten väabieejen. Gott es soo aus een gooda Frint, waut ons gooden un nizeljen Rot jeft (2. Timotäus 3:16-17). Wurscht du nich wellen soonen Frint haben?

“De HAR räakjent jerajcht sennen sea väl” (PSALM 37:28).

Gott deit emma daut rajchte. “Wiet auf es Gott von Jesatzloosijchtjeit, en de Aulmajchtja vom Onnrajcht!” (Hiob 34:10, Friesenbibel). Jehova deit rajcht rechten – krakjt soo aus de Psalmenschriewa to Jehova säd: “Du [deist] de Menschen jerajcht rechten” (Psalm 67:5). Daut es, wiels Jehova “kjikjt no daut Hoat”; am kaun kjeena hinjaret Licht fieren, wiels hee kaun emma krakjt seenen, woo de Sach steit, un kaun soo fa Jerajchtichkjeit sorjen (1. Samuel 16:7). Gott weet om aule Ojjerajchtichkjeit un Onopprechtichkjeit oppe Welt om, un hee haft vesproaken, daut de “Beese . . . fonn dee Ead aufjeschnäde woare” (Spricha 2:22, Reimerbibel).

Oba Gott es nich een strenja Rechta, waut bloos doano ut es, aundre to strofen. Hee wiest Metleet, wua daut paussent es. En de Schreft sajcht daut: “De HAR es voll Jnod un Metleet,” mau rajcht to de Schlajchte, wan dee opp iernst een Leetsennen haben. Es daut nich opp iernst Jerajchtichkjeit? (Psalm 103:8; 2. Petrus 3:9).

Woo nuzt Gott siene Jerajchtichkjeit ons? De Apostel Petrus säd, “daut Gott manke Menschen kjeen Unjascheet moakt; oba ut aule Velkja, dee aunnemt, dee am ferchten un doonen waut rajcht es” (Aposteljeschicht 10:34-35). Wie haben eenen Nutzen von Gott siene Jerajchtichkjeit, wiels hee moakt kjeenen Unjascheet un trakjt uk kjeenem väa. Hee nemt ons aun un wie kjennen siene Aunbäda sennen, endoont, waut fa eene Rauss Menschen ooda Volkj wie sent, waut wie jelieet haben ooda woo väl wie em tieteljen haben.

Gott well, daut wie siene Jerajchtichkjeit vestonen un doa eenen Nutzen von haben; doawäajen haft hee ons een Jewessen jejäft. En de Schreft woat daut Jewessen aus een Jesaz jetalt, waut en ons “Hoat jeschräwen es,” un ons sajcht, aus ons Benämen rajcht ooda orrajcht es (Reema 2:15).  Woo nuzt ons daut? Een belieedet Jewessen kaun ons halpen, nich mea soont to doonen, waut toom Schoden un ojjerajcht es. Un wan wie eenen Fäla moaken, dan kaun ons daut halpen, daut ons daut leet es, un wie de Sach oppem kloaren brinjen. Gott siene Jerajchtichkjeit to vestonen halpt ons, un wie komen am noda.

“Gott es Leew” (1. JOHANES 4:8, Friesenbibel).

De Schreft sajcht nich, daut Gott Macht, Weisheit ooda Jerajchtichkjeit es. Gott haft Macht, Weisheit un Jerajchtichkjeit. Oba daut sajcht, Gott es Leew. Wuarom? Wiels eena kaun sajen, derch siene Macht kaun Gott haundlen un siene Jerajchtichkjeit un Weisheit wiesen am, woo to haundlen. Oba Jehova siene Leew brinjt am bat doa, daut hee haundelt. Hee deit aules ut Leew.

Wan Jehova daut uk aun nuscht fält, brocht siene Leew am oba bat doa, Enjel un Menschen to moaken, dee siene Leew un Schutz togood kjemt. Gott haft de Ieed soo reedjemoakt, daut dee fa de Menschen een scheenet Tus es. Un hee wiest fa wieda aule Menschen Leew, “wiels hee lat siene Sonn oppgonen äwa de goode un schlajchte, un lat daut räajnen äwa jerajchte un ojjerajchte” (Matäus 5:45).

Un buta daut es Jehova sea “metliedent un erboarmt sikj” (Jakobus 5:11). Hee wiest deejanje Metleet, waut werkjlich waut doonen toom am kjanen lieren un noda komen. Gott intressieet sikj fa jieda eenen von soone Menschen. “Hee sorcht fa junt” (1. Petrus 5:7).

Woo nuzt Gott siene Leew ons? Wie jleichen biejlikj eenen wundascheenen Sonnenunjagank to seenen. Daut es eene Freid to hieren, wan een Bäbe lacht. Wie räakjnen daut väl, wan wäa vonne Famielje ons leeft. Dit sent veleicht nich de needichste Dinj, oba daut moakt ons Läwen väl scheena.

Doa es noch een aundra Nutzen, waut Gott siene Leew ons jeft: Daut Jebäd. En de Schreft woat ons toojerot: “Sorcht junt om nuscht. Lot Gott met bäden un prachren un dankscheen sajen aules weeten waut junt fält!” Soo aus een leeftolja Voda well Jehova, daut wie met onse deepste Sorjen no am komen un am no Help froagen. Dan vesprakjt hee ons derch siene groote Leew “sien Fräd, dee wiet äwa aules jeit waut Menschen vestonen kjennen” (Filippa 4:6-7).

Haben die Gott siene wichtichste Ieejenschoften, von dee wie nu kort jerät haben, soo aus Macht, Weisheit, Jerajchtichkjeit un Leew, jeholpen bäta to vestonen, woo Gott es? Daut du Gott noch mea räakjnen kaust, lod wie die en, noch mea doaräwa to lieren, waut hee aul aules fa die jedonen haft un waut hee noch fa die doonen woat.