Es Gott sien Kjennichrikj en dien Hoat?

AUFSPÄLEN

Waut de Schreft doatoo sajcht

Nä, Gott sien Kjennichrikj es nich waut en eenen Christ sien Hoat. a De Schreft moakt daut gaunz kloa, wua dit Rikj es, wiels daut sajcht, daut et een “Himmelrikj” es (Matäus 4:17, PB). Unjasto wie ons daut mol, woo de Schreft daut kloa moakt, daut dit Rikj eene Rejierunk es, waut vom Himmel rejieet.

Gott sien Kjennichrikj haft Harscha un uk soone, wuaräwa dee rejieren, un daut haft Jesazen. Daut Kjennichrikj haft uk de Oppgow, doano to seenen, daut Gott sien Wellen em Himmel un oppe Ieed jedonen woat (Matäus 6:10; Openboarunk 5:10).
Gott sien Kjennichrikj woat äwa “de Menschen von aule Velkja, Lenda, un Sproaken” rejieren, waut oppe Ieed sent (Daniel 7:13-14, PB). Dee, waut en dit Kjennichrikj rejieren, haben äare Macht von Gott selfst jekjräajen, nich von dee, waut an unjadon sent (Psalm 2:4-6; Jesaja 9:6).
Jesus säd to siene true Apostel, daut dee met am toop wudden em Himmel rejieren un “opp een Troon setten” (Lukas 22:28, 30, PB).
Dit Kjennichrikj haft uk Jäajna un Fiend un dee woaren von dit Kjennichrikj venicht woaren (Psalm 2:1-2, 8-9; 110:1-2; 1. Korinta 15:25-26).

Eenje lieren, daut Gott sien Kjennichrikj en ons Hoat es, wan wie no Gott horchen, oba soont lieet de Schreft nich. Waut de Schreft oba sajcht es, daut “daut Wuat vom Gottesrikj” ooda “daut Evangelium von Gott sien Rikj” waut aun ons Hoat doonen kaun (Matäus 13:19, PB; 24:14, PB).

Waut meend Jesus, aus hee säd, daut “daut Gottesrikj en junt es”?

Eenje Menschen es daut nich kloa, wua Gott sien Kjennichrikj es, wäajen daut en eenje Biblen en Lukas 17:21 (PB) sajcht, daut “daut Gottesrikj en junt es”. Toom disen Varsch rajcht vestonen, mott wie weeten, to wäm Jesus doa räd.

Gott sien Kjennichrikj wia nich en Jesus siene schlajchte Jäajna äa Hoat, waut am plonden doottomoaken

Jesus räd doa to de Farisäa. Daut wia eene Grupp Gloowesleidasch, waut jäajen Jesus wieren un dän plonden doottomoaken (Matäus 12:14; Lukas 17:20). Wudd eena dan noch sellen jleewen, daut daut Kjennichrikj waut en dee äa schlajchtet Hoat wia? Jesus säd je to dee: “Von bennen sent jie jesazloose Heichla” (Matäus 23:27-28, PB).

En eenje Bibeläwasatungen sent Jesus siene Wieed en Lukas 17:21 dietelja to vestonen. Eene Bibel sajcht biejlikj: “Gott sien Kjennichrikj es hia bie junt” (Contemporary English Version, von ons dunkel jemoakt). Un eene aundre Bibel sajcht: “Gott sien Kjennichrikj es mank junt” (New World Translation, Footnoot). Daut Kjennichrikj vom Himmel wia bie ooda mank de Farisäa, wiels Jesus wia von Gott aunjestalt toom en daut Kjennichrikj de Kjennich sennen, un Jesus wia je doa nu ver dee (Lukas 1:32-33).

a Väl christelje Jemeenten lieren, daut Gott sien Kjennichrikj waut en eenen Mensch bennen es, ooda en eenen Mensch sien Hoat. Biejlikj wort enne Stäts een Toopkomen aufjehoolen von de Baptisten-Kjoakj (Southern Baptist Convention). Doa wort jesajcht, daut bie Gott sien Kjennichrikj met en es, “woo Gott eenen Mensch em Hoat un uk em Läwen rejieet”. Een bät soo säd de Popst Benedict XVI. daut uk en sien Buak Jesus of Nazareth. Hee schreef, daut Gott sien Kjennichrikj kjemt, wan wie met ons Hoat no Gott horchen.