Es Gott emma aulawäajen?
Waut de Schreft doatoo sajcht
Gott kaun aulawäajen aules seenen un aules tostaund brinjen, waut hee well (Spricha 15:3; Hebräa 4:13). Oba de Schreft lieet nich, daut Gott emma aulawäajen un en aules es. De Schreft wiest, daut hee eene Persoon es un daut siene Woninj opp eene jewesse Städ es.
Woo Gott es: Gott es een Jeist (Johanes 4:24). Hee es fa de Menschen nich to seenen (Johanes 1:18). De Visionen enne Schreft, waut von Gott räden, wiesen emma, daut hee opp eene jewesse Städ es. Kjeenmol woat jesajcht, daut hee aulawäajen es (Jesaja 6:1-2; Openboarunk 4:2-3, 8).
Gott siene Woninj: Gott haft siene “Woninj en däm Himmel”. Daut es eene Städ, waut wie nich seenen kjennen, wäajen daut butakaunt de Schepfunk es, waut wie seenen kjennen (1. Kjennichs 8:30, PB). De Schreft rät von eemol, “aus de HAR [“Jehova”, NW] a sikj met siene himlische Deena vesaumeld,” un daut wiest, daut Gott opp eene jewesse Städ eene Woninj haft (Hiob 1:6, PB).
Wan Gott nich emma aulawäajen es, kaun hee dan werkjlich om mie bekjemmat sennen?
Jo. Gott es sea om jieda eenem bekjemmat. Gott kaun de Menschen oppe Ieed seenen, waut am werkjlich jefaulen wellen un hee halpt dee, wan hee uk em Himmel es (1. Kjennichs 8:39; 2. Chronik 16:9). Well wie mol seenen, woo Jehova wiest, daut hee werkjlich om siene Deena bekjemmat es:
Wan du bätst: Jehova hieet daut fuaz, wan du bätst (2. Chronik 18:31).
Wan du doljeschloagen best: “De HAR es aul dee no aun, dee een jebroaknet Hoat haben, un halpt dee, dee een bedrekjten Jeist haben” (Psalm 34:19, PB).
Wan die Rot fält: Jehova deit “die unjarechten un die dän Wajch wiesen”. Hee deit daut derch sien Wuat, de Schreft (Psalm 32:8, PB).
Waut eenje orrajcht jleewen äwa Gott
Waut eenje jleewen: Gott es en aules, waut hee jemoakt haft.
Woo daut es: Gott es noanich wua oppe Ieed, uk nich irjentwua en dän Stiernhimmel (1. Kjennichs 8:27). Oba de Stierns un aundre Sachen, waut hee jemoakt haft, “räden kloa von Gott siene Harlichkjeit” (Psalm 19:2, PB). Daut meent nich, daut Gott en daut es, waut hee jemoakt haft, krakjt soo aus een Mola nich en siene Bilda es. Oba een Bilt kaun eenem väl äwa dän Mola sajen. Krakjt soo kjenn wie von daut, waut wie rom ons seenen, väl äwa dänjanjen lieren, waut daut jemoakt haft, biejlikj “siene eewje Krauft un Gottheit, dee verhäa nich to seenen wia” (Reema 1:20, PB). Wie kjennen seenen, daut hee väl Macht haft uk Weisheit un Leew.
Waut eenje jleewen: Gott mott emma aulawäajen sennen, om daut hee aules weeten kaun un aule Macht haft.
Woo daut es: Gott sien heilja Jeist es siene wirkjende Krauft, met dee hee aules doonen kaun. Derch sienen heiljen Jeist kaun Gott to aulentiet un aulawäajen aules enwoaren un aules doonen, waut hee well, onen daut hee doa perseenlich es (Psalm 139:7).
Waut eenje jleewen: Psalm 139:8 (PB) lieet, daut Gott emma aulawäajen es, wiels daut sajcht: “Wan ekj sull nom Himmel foaren, du best doa! Wan ekj mien Bad em Doodenrikj oppmuak, du best uk doa.”
Woo daut es: Dis Varsch rät nich doavon, daut Gott aulawäajen es. Dee wiest met scheene Wieed, daut Gott ons halpen kaun, endoont wua wie sent.
a Jehova es no de Schreft no Gott sien Nomen.
Veleicht jleichst du uk dit
WICHTJE BIBLISCHE LIEREN
Jeft daut eenen Gott?
Unjasto die waut Bewies, daut daut eenen Senn haft, aun Gott to jleewen.
WAUT SAJCHT DE SCHREFT ÄWA ...?
Waut es de heilja Jeist?
De Schreft rät von Gott sienen heiljen Jeist, soo aus wan daut siene “Henj” sent.
MEA ÄWA ONS
West du met ons räden?
Räd äwa eene biblische Froag ooda lia mea äwa Jehova siene Zeijen.