Wuarom sent doa soon deel veschiedne christelje Jemeenten?

AUFSPÄLEN

Waut de Schreft doatoo sajcht

De Menschen haben een deel Kjoakjen oppjestalt, waut sikj aula “christlich” nanen un sajen, daut see sikj opp daut stetten, waut Jesus Christus lieed. Oba no de Schreft no jeft daut mau bloos eene eensje woare Christenheit. Wuarom kaun eena daut sajen? Well wie doatoo mol dreeatlei seenen.

Jesus säd, daut hee “de Woarheit” lieed. Un de ieeschte Christen nanden äaren Gloowen dän “Woarheitswajch” (Johanes 8:32, PB; 2. Petrus 2:2, PB; 2. Johanes 4; 3. Johanes 3). Soo, daut wiest ons, daut wan doa wäa Lieren vebreet, waut nich met daut stemt, waut Jesus lieed, dan es daut nich de woara Christengloowen.
De Schreft sajcht, Christen sellen sikj “unjarenaunda eenich” sennen (1. Korinta 1:10, PB). Oba väl christelje Jemeenten sent sikj äwa de eefachste Lieren oneenich. Dee strieden mau rajcht doaräwa, waut daut meent, een Christ to sennen. Doawäajen kjennen dise veschiedne Jemeenten nich aula em rajchten sennen (1. Petrus 2:21).
Jesus säd verut, daut doa väle von sikj sajen wudden, daut see Christen wieren, oba dee wudden daut nich nokomen, waut hee lieed. Un hee säd, hee wudd soone nich aunnämen (Matäus 7:21-23; Lukas 6:46). Hee säd uk, eenje Menschen wudden von soone Prädjasch veleit woaren, waut dän woaren Gloowen vedreien toom fa sikj selfst strieden (Matäus 7:15). Oba aundre wada wudden väl von soone Kjoakjen hoolen, wiels see doa soont to hieren kjrieen, waut see selfst jleichen un nich soont, waut de Woarheit von ut de Schreft es (2. Timotäus 4:3-4).

En daut Jlikjnis von dän Weit un daut Onkrut säd Jesus verut, daut väle wudden von dän woaren Christengloowen auffaulen un sikj jäajen dän stalen (Matäus 13:24-30, 36-43). Äwa eene lange Tiet wudden de woare Christen nich von de faulsche to unjascheeden sennen. No dän Doot von de Apostel funk daut sea doamet aun, daut väle vom woaren Gloowen auffollen, krakjt soo aus Jesus daut verutjesajcht haud (Aposteljeschicht 20:29-30). De Lieren von dise Jäajna kjennen veschieden sennen, oba aul dise Kjoakjen, waut sikj christlich nanen, sent “von de Woarheit aufjeerrt” (2. Timotäus 2:18, JHF).

Jesus säd oba uk verut, daut de Unjascheet tweschen de woare un de faulsche Christen sachelkjes wudd kloara woaren. Soo aus Jesus säd, sull sikj daut erfellen, “wan dise Tiet to Enj kjemt” (Matäus 13:30; 13:39, PB). Un daut haft sikj en onse Tiet krakjt soo romjenomen.