“Si realmente bo ke siña mas tokante Dios, keda huntu ku e Testigunan di Yehova.” M’a keda asombrá ora mi a tende e komentario ei. Na e momento ei, mi tabatin un poko tempu ta studia ku e Testigunan di Yehova. Pero pa yuda bo komprondé mi reakshon, mi ta bai konta bo un tiki di mi bida.

 Mi a nase na Quezaltepeque, un stat na El Salvador. Mi tabata e di seis di 15 yu. Mi mayornan a kria mi i a siña mi pa ta onesto i obediente na lei. Ademas, Leonardo i otro Testigunan di Yehova tabata bini pa siña nos tokante Beibel. Pero mi no a hasi kaso di loke mi tabata siña i a tuma hopi desishon robes. Ora mi tabatin 14 aña, mi a kuminsá bebe alkohòl i usa droga ku mi amigunan di skol. Un pa un, nan tabata kita for di skol pa djòin un gang i mi a sigui nan mal ehèmpel. Nos a pasa nos dianan riba kaya, a preshoná hende pa duna nos sèn i a hòrtá pa por a sigui kumpra droga.

 E gang a bira mi famia. Mi tabata pensa ku mi a debe nan lealtat. Por ehèmpel, un dia un miembro di gang ku tabata bou di influensia pisá di droga a ataká un di mi bisiñanan. Durante e pelea ei, mi bisiña a logra dominá mi amigu i a yama polis. Mi a bira furioso i a kuminsá bati e outo di mi bisiña ku klòp pa oblig’é laga mi amigu bai. Mi bisiña a roga mi pa stòp segun ku mi tabata kibra un bentana tras di otro i bati e outo kibra, pero mi no kier a tende.

 Tempu mi tabatin 18 aña, nos gang tabatin un konfrontashon ku polis. Mi tabata kla pa tira un bòm trahá na kas, ma e bòm a eksplotá den mi man. Kon bini, mi no sa. Mi ta kòrda solamente ku mi a mira mi man tur destrosá, i despues mi a bai flou. Ora mi a bini bei den hospital, mi a realisá ku mi a pèrdè mi man drechi i mi oido na banda drechi i ku mi a bira kasi siegu na mi wowo drechi.

 Apesar di mi heridanan, tòg mi a bolbe na mi gang ora mi a sali hospital. Pero djis despues di esei, polis a arestá mi i sera mi den prizòn. Den prizòn mi relashon ku e gang a bira mas fuerte. Nos a pasa nos tempu ta hasi tur kos huntu, for di desayuno, ora nos a dal nos promé sigaria di mariwana, te ora ku nos bai drumi.

 Ora mi tabata den prizòn, Leonardo a bishitá mi. Segun ku nos tabata kòmbersá, el a mustra riba e tatú ku mi tin riba mi man drechi. El a puntra mi: “Bo sa kiko e tres puntonan di e tatú ei ta nifiká?” Mi di: “Konpolaga, sèks, droga i rock and roll.” Pero Leonardo a kontestá: “Ami lo bisa bo ku nan ta nifiká hospital, prizòn i morto. Bo tabata den hospital, pero awor bo ta den prizòn, i bo sa kiko ta bini despues.”

 Loke Leonardo a bisa a shòk mi. E tabatin rason. Ku mi manera di biba, mi tabata kobando mi mes graf. Leonardo a ofresé mi un estudio di Beibel i mi a aseptá. Loke mi a siña for di Beibel a konvensé mi pa kambia mi bida. Por ehèmpel, Beibel ta bisa ku “mal kompania ta daña bon kustumber”. (1 Korintionan 15:33) Pues, un di e promé kosnan ku mi tabatin ku hasi ta buska amigu nobo. Pa logra esei, mi a stòp di bai e reunionnan di gang i na lugá di esei mi a kuminsá bai e reunionnan ku e Testigunan di Yehova tabata tene den prizòn. Na e reunion akí, mi a topa un prezu ku yama Andrés, ku a batisá komo Testigu di Yehova den prizòn. El a invitá mi pa desayuná huntu kuné. Djei padilanti, mi no a kuminsá mi dia mas ku sigaria di mariwana. Na lugá di esei, nos tabata trata un versíkulo di Beibel tur mainta.

 E miembronan di gang a kuminsá ripará ku mi a kambia. P’esei un di e lidernan di e gang kier a papiá ku mi. Mi a spanta. Mi no tabata sa kiko lo e hasi ku mi ora e haña sa ki intenshon mi tabatin, pasobra ta kasi imposibel pa sali for di un gang. El a bisa mi: “Nos a ripará ku bo no ta bini nos reunionnan mas i en bes di esei bo ta bai e reunionnan di e Testigunan di Yehova. Ki intenshon bo tin?” Mi a bis’é ku mi ke sigui studia Beibel i ku mi ke kambia mi bida. Pa mi sorpresa, el a bisa mi ku e gang lo respetá mi desishon basta mi demostrá ku di bèrdat mi ke bira un Testigu di Yehova. Despues el a bisa: “Si di bèrdat bo ke siña tokante Dios, keda huntu ku e Testigunan di Yehova. Nos ta ferwagt ku bo ta stòp di hasi kos malu. Mi ta felisitá bo. Bo ta riba e bon kaminda. E Testigunan di bèrdat por yuda bo. Mi a studia ku nan na Merka i algun di mi famianan ta Testigu di Yehova. No tene miedu. Sigui asina.” Mi tabatin miedu ainda, pero na e mesun momento, mi tabata masha kontentu. Mi a gradisí Yehova di kurason. Mi a sinti mi manera un para ku a sali liber for di kouchi. Mi a komprondé e palabranan di Hesus ora el a bisa: “Boso lo konosé e bèrdat, i e bèrdat lo hasi boso liber.”​—Huan 8:​32.

 Algun di mi amigunan di ántes tabata purba di tèst mi i tabata ofresé mi droga. Mi tin ku atmití ku tabatin bes ku mi a entregá na e preshon i a aseptá. Pero ku tempu, despues di hopi orashon ferviente, finalmente mi a logra vense mi bisionan.​—Salmo 51:10, 11

 Despues ku mi a sali for di prizòn, hopi hende a pensa ku lo mi a bai bèk na mi manera di biba di ántes, pero nò. Al kontrario, vários biaha mi a bai bèk na e prizòn sí, pero pa kompartí loke mi a siña for di Beibel. Finalmente, mi amigunan di ántes a mira ku di bèrdat mi a kambia. Lamentablemente, esei no tabata e kaso ku mi enemigunan di pasado.

 Un dia mi a sali pa bai prediká, i diripiente algun miembro armá di un gang rival di ántes a rondoná ami i mi kompañero den sirbishi, i nan kier a mata mi. E ruman ku tabata huntu ku mi ku kurashi a splika nan na un manera trankil ku mi no ta un miembro di gang mas. Mientrastantu, ami a purba di keda trankil. Nan a bati mi i a menasá mi pa no drenta e bario ei mas. Despues, nan a baha nan arma i a laga nos bai. Beibel realmente a kambia mi bida. Den pasado lo mi a purba di buska vengansa. Pero awor, mi ta apliká e konseho di 1 Tesalonisensenan 5:​15, ku ta bisa: “Sòru pa ningun di boso no paga malu ku malu, ma semper sigui tras di loke ta bon pa otro i pa tur sobrá hende.”

 For di dia ku mi a bira Testigu di Yehova mi ta hasi esfuerso pa ta un hende onesto. Esei no tabata fásil. Pero ku yudansa di Yehova, e konsehonan di Beibel i e yudansa di mi amigunan nobo, mi a logra. Nunka mas lo mi ke bolbe na mi aktonan di pasado.​—2 Pedro 2:​22

 Mi tabata un hende violento i ku hopi rabia. Mi tin sigur ku lo mi no tabata na bida si mi a sigui hiba e bida violento ei. Loke mi a siña for di Beibel a kambia mi. Mi a stòp ku mi mal kustumbernan. Mi a siña pa ta na pas ku e enemigunan ku mi tabatin. (Lukas 6:​27) I awor mi ta disfrutá di amistat ku ta yuda mi kultivá bon kualidat. (Proverbionan 13:20) Mi ta felis i mi bida tin propósito, sirbiendo un Dios ku tabata dispuesto pa lubidá tur e kosnan malu ku mi a hasi.​—Isaías 1:​18.

 Na aña 2006, mi a bai e skol di entrenamentu spesial pa predikadó kristian soltero. Algun aña despues, mi a kasa ku mi esposa stimá, i huntu nos ta lanta nos yu muhé. Awor mi ta usa mayoria di mi tempu pa siña otro hende e prinsipionan di Beibel ku a yuda mi. Ademas, mi ta sirbi komo ansiano den e kongregashon lokal i mi ta purba di yuda e hóbennan evitá di kometé e mesun fayonan ku ami a kometé tempu mi tabatin nan edat. En bes di koba mi mes graf, mi ta traha awor pa e bida eterno den futuro ku Dios ta primintí den Beibel.