Mi a nase i krese den un bario pober di Roma kaminda hende di e klase trahadó tabata biba. Bida tabata duru. Nunka mi no a konosé mi mama biológiko i mi no tabata sali muchu bon ku mi tata. Mi a krese den un ambiente violento i mi mester a siña kon pa sobrebibí.

Tempu mi tabatin dies aña, mi a kuminsá hòrta. Ku mi 12 aña mi a bai for di kas pa promé biaha. Na diferente okashon mi tata mester a bai buska mi na warda di polis i hiba mi kas bèk. Mi tabata pleita konstantemente ku otro hende pasobra mi tabata violento i rabiá ku tur hende. Tempu mi tabatin 14 aña mi a bai for di kas sin bini bèk nunka mas. Mi a kuminsá usa droga i mi tabata biba riba kaya. Komo ku mi no tabatin niun kaminda pa drumi, mi tabata kibra outo di hende pa drumi aden te den oranan di mainta. Despues mi tabata buska un fòntein pa hawa kurpa.

Mi a bira eksperto den hòrtamentu. Tur kos mi tabata hasi: for di ranka tas for di man di hende te na bula den apartamento i kas parti anochi. Mi a haña asina un mal reputashon te ku un gang notorio a buska mi pa mi djòin nan; asina mi a bai den grandi i awor ta banko mi tabata asaltá. Debí na mi karakter agresivo, mi a bira un miembro respetá di e gang. Semper mi tabata kana armá; de echo, mi tabata asta drumi ku mi revòlver bou di mi kusinchi. Violensia, droga, hòrtamentu, palabra malu i inmoralidat a bira mi estilo di bida. Semper polis tabata buska mi. Nan a arestá mi vários biaha i mi a kai será diferente biaha.

Un di e biahanan ku mi a sali for di prizòn, mi a bai bishitá un di mi tantanan. Sin ku mi tabata sa, mi tanta i dos di mi primunan a bira Testigu di Yehova. Nan a invitá mi pa asistí na un reunion di e Testigunan. Pa kuriosidat mi a disidí di bai ku nan. Ora nos a  yega na e Salòn di Reino, mi a insistí pa sinta serka di e porta pa mi por tabatin bista riba ken tabata drenta i sali. Di mes mi tabata armá.

E reunion ei a kambia mi bida. Mi ta kòrdá kon mi tabata pensa ku mi mester ta riba un otro planeta. E hendenan presente a kumindá mi amablemente i ku un sonrisa riba nan kara. Te ainda mi ta kòrda kla kla e mirada kariñoso i franko di e Testigunan. Esaki sigur tabata kompletamente diferente for di e mundu ku ami a kustumbrá kuné!

Mi a kuminsá studia Beibel ku e Testigunan di Yehova. Mas mi a siña, mas mi a bin komprondé ku mi mester a kambia mi estilo di bida kompletamente. E palabranan di Proverbionan 13:20 a dal mi duru: “Esun ku anda ku hende sabí lo ta sabí, ma un kompañero di hende bobo lo sufri daño.” Mi a realisá ku mi mester a hala pia for di e gang. No tabata fásil, pero ku yudansa di Yehova mi a logra.

Tambe mi a drecha mi aspekto físiko. Ku hopi esfuerso mi a stòp di huma sigaria i usa droga. Mi a kòrta mi kabei largu, mi a deshasí di mi renchi di orea i mi a stòp di papia palabra malu. Pa promé biaha den mi bida, mi por a kontrolá mi akshonnan.

Nunka mi no tabata gusta lesa i studia; p’esei tabata un gran desafio pa mi konsentrá i dediká mi mes na estudio di Beibel. Pero, segun ku mi tabata hasi mi esfuerso, tiki tiki mi a kuminsá stima Yehova. Algu a kuminsá kambia den mi; mi konsenshi a kuminsá remordé. Kontinuamente mi tabatin pensamentunan negativo di mi mes, i mi tabata duda ku Yehova lo por a pordoná mi un dia pa tur e kosnan malu ku mi a hasi. Den e momentonan ei mi a haña hopi konsuelo ora mi tabata lesa tokante kon Yehova a pordoná Rei David despues ku el a kometé pikánan grave.—2 Samuel 11:1–12:13.

Un otro reto pa mi tabata di kompartí mi fe ku otro hende den e trabou di kas pa kas. (Mateo 28:19, 20) Mi tabatin miedu di topa un hende ku mi a yega di hasi daño na dje den pasado. Pero tiki tiki mi a logra vense mi miedu. Mi a kuminsá haña un gran satisfakshon den yuda otro hende siña tokante nos maravioso Tata selestial, kende ta pordoná den un gran manera.

E echo ku mi a konosé Yehova a salba mi bida! Mayoria di mi amigunan di ántes ta morto òf den prizòn. Pero, ami sí tin un bida yen di satisfakshon i un futuro briante mi dilanti. Mi a siña pa ta humilde, obediente i pa kontrolá mi karakter violento. Komo resultado, mi tin un mihó relashon ku e hendenan rònt di mi. Mi ta felismente kasá ku un bunita muhé ku yama Carmen. Huntu nos tin e goso grandi di yuda otro hende siña tokante Beibel.

Ahn! Anto awor mi ta gana mi pan di kada dia na un manera onrado. En bes di hòrta banko, mi ta limpia nan!