Kònkòmber di laman ta un bestia ku ta biba den fondo di laman i riba ref di koral. E superfisie di su kurpa por ta tur na bulto, tur na pipita òf asta tur na spiña. E kurpa di kònkòmber di laman ta masha fleksibel: E por bira suave manera waks òf duru manera un pida palu den apénas algun minüt òf asta sekònde. E fleksibilidat akí ta permití kònkòmber di laman primi drenta skref pèrtá i bira asina duru ei den ku niun bestia enemigu no por trèk e saka afó. E sekreto ta sinta den e kueru asombroso di e kònkòmber di laman.

 Pensa riba esaki: Kònkòmber di laman por hasi su kueru steif, medio òf suave. Pa e por hasi su kueru steif, medio òf suave, e ta konektá òf deskonektá sierto fibra ku e tin den su kueru. E por hasi esei usando sierto proteina ku ta hasi su kueru steif òf otro proteina ku ta hasi su kueru suave.

 E proteinanan ku ta hasi e kueru steif ta konektá e fibranan na otro pa hasi e kueru mas duru. E proteinanan ku ta hasi e kueru suave ta deskonektá òf lòs e fibranan for di otro, i e kueru ta bira suave. E kueru di kònkòmber di laman por bira asina suave ku ta parse manera ta smèlt e ta smèlt.

 E sientífikonan ta trahando riba algun material pa purba di imitá e fleksibilidat di e kueru di kònkòmber di laman. Un di nan metanan ta pa traha un sorto di konekshon eléktriko pa usa den operashon di selebro: un konekshon ku ta sufisiente steif pa pone na un lugá spesífiko den e selebro, pero ku despues por bira suave bèk. E kambionan den e konekshonnan eléktriko ei lo evitá ku e kurpa ta rechasá nan.

 Kiko abo ta pensa? E kueru di kònkòmber di laman ta kasualidat òf diseño?