Nò. Beibel ta mustra ku ta na Dios so nos mester resa, anto den nòmber di Hesus. Hesus a bisa su disipelnan: “Boso mester hasi orashon asin’akí: ‘Nos Tata ku ta den shelu, bo nòmber sea santifiká.’” (Mateo 6:9) Nunka el a manda su disipelnan resa na santu, angel òf kualke otro persona ku no ta Dios.

 Ademas, Hesus a bisa su disipelnan: “Ami ta e kaminda, e bèrdat i e bida. Ningun hende no ta yega serka e Tata si no ta pa medio di mi.” (Huan 14:6) Ta Hesus so ta outorisá pa boga pa nos serka Dios.—Hebreonan 7:25.

Nos por resa na Dios i na santu tambe?

 Dios a bisa den e Dies Mandamentu: “Ami, Yehova bo Dios, ta un Dios ku ta eksigí deboshon eksklusivo.” (Éksodo 20:5, Tradukshon di Mundu Nobo vershon ingles revisá) Esei ta nifiká ku Dios ke pa nos ta deboto na e so, esta, pa nos no duna gloria òf adorashon na niun otro dios. P’esei, nos tin ku resa únikamente na dje.—Isaías 48:11.

 Nos ta ofendé Dios si nos resa na kualke otro persona, asta santu òf angel. Ora apòstel Huan kier a adorá un angel, e angel no a aseptá esei i a bis’é: “No hasi e kos ei! Mi ta un simpel esklabo meskos ku bo i meskos ku bo rumannan ku tin e trabou di duna testimonio di Hesus. Adorá Dios!”—Revelashon 19:10.