Dios Ta Omnipresente?

TOKA NA

E kontesta ku Beibel ta duna

Dios por mira tur kos i e por usa su poder unda ku e ta deseá. (Proverbionan 15:3; Hebreonan 4:13) Sinembargo, Beibel no ta bisa ku e ta omnipresente sí, esta, ku e ta presente tur kaminda, den tur kos. Mas bien, Beibel ta mustra ku e ta un persona i ku e tin su lugá di biba.

E tipo di kurpa ku Dios tin: Dios ta un persona spiritual. (Huan 4:24) E ta invisibel pa wowo humano. (Huan 1:18) Den Beibel, hende ku a mira Dios den vishon semper a splika ku e ta biba den un lugá fiho. Nunka Beibel ta deskribié komo omnipresente.—Isaías 6:1, 2; Revelashon 4:2, 3, 8.
Dios su lugá di biba: Dios ta biba den e region spiritual, lokual ta diferente for di kreashon visibel. Dios su “lugá di biba” ta den e region spiritual ei. (1 Reinan 8:30) Beibel ta menshoná un okashon ora ku kriaturanan spiritual “a drenta pa tuma nan puesto dilanti Yehova.” a Den un sentido, esei ta mustra ku Dios ta biba den un lugá spesífiko.—Yòb 1:6.

Si Dios no ta omnipresente, e por ta interesá den mi personalmente?

Sí. Dios ta profundamente interesá den kada hende, individualmente. Maske Dios ta biba den e region spiritual, e ta wak esnan ku ke agrad’é i e ta aktua na nan fabor. (1 Reinan 8:39; 2 Krónikanan 16:9) Ban wak kon Yehova ta demostrá interes den su adoradónan sinsero:

Ora bo hasi orashon: Na momento ku bo resa na Yehova, e por skucha bo.—2 Krónikanan 18:31.
Ora bo ta deprimí: “SEÑOR ta serka di e hende di kurason kibrá, i ta salba esnan di spiritu abatí.”—Salmo 34:18, Beibel Santu.
Ora bo mester di guia: Yehova lo “instruí bo i siña bo” pa medio di su Palabra, Beibel.—Salmo 32:8, Beibel Santu.

Ideanan robes

Idea robes: Dios ta tur kaminda den kreashon.

Echo ta ku Dios no ta biba ni riba tera ni niun kaminda den nos universo. (1 Reinan 8:27) Ta bèrdat ku e streanan i otro obranan di Su man “ta konta di e gloria di Dios.” (Salmo 19:1, Beibel Santu) Sinembargo, Dios no ta biba den su kreashon, meskos ku un pintor no ta biba den su pintura. Pero tòg un pintura ta bisa nos algu di e pintor ku a trah’é. Di igual manera, nos mundu ta bisa algun kos tokante e “kualidatnan invisibel” di su Kreador manera su poder, sabiduria i amor.—Romanonan 1:20.

Idea robes: Pa Dios por sa tur kos i ser omnipotente, e mester ta omnipresente.

Echo ta ku Dios su spiritu santu, òf forsa aktivo, ta Dios su poder den akshon. Via su spiritu santu, Dios por sa tur kos ku ta pasa i hasi tur kos unda ku ta sin ku e mester t’ei presente personalmente.—Salmo 139:7.

Idea robes: Salmo 139:8 ta siña nos ku Dios t’ei tur kaminda pasobra e ta bisa: “Si mi subi na shelu, bo ta einan; si mi habri mi kama den Sheol, mira, einan tambe bo ta!” (Beibel Santu)

Echo ta ku e teksto ei no ta papia tokante e kaminda ku Dios ta. Den un manera poétiko e ta siña nos ku no tin niun lugá ku ta muchu leu pa stroba Dios di aktua na nos fabor.

a Beibel ta bisa ku Dios su nòmber ta Yehova.