Hopi hende, asta hende ku ta bisa ku nan ta kristian, ta sinti ku Beibel su normanan moral tokante sèks i matrimonio no ta konta mas pa den nos tempu. Algun religion a kambia nan siñansanan di loke ta bon i malu pa adaptá nan mes na nos tempu. Loke Beibel ta siña tokante normanan moral ta konta pa den nos tempu? Sí. E artíkulo akí ta splika dikon nos sa esaki.

 Dios a krea hende pa dependé riba dje pa guia. Beibel ta bisa: “No ta keda na hende pa dirigí su pasonan.” (Yeremías 10:23) Ta bèrdat ku Yehova a Dios a krea nos ku e kapasidat pa tuma desishon, pero e no a duna nos e outoridat òf abilidat pa determiná pa nos mes kiko ta bon i kiko ta malu. Pa e motibu ei, e ke pa nos dependé riba dje.—Proverbionan 3:5.

 Den Beibel nos ta haña Dios su normanan moral ku por guia nos. Laga nos wak dos motibu dikon e normanan moral akí tin asina tantu balor.

•   Ta Dios a krea nos. (Salmo 100:3) Komo ku ta Yehova Dios a krea nos, e sa presis kiko nos tin mester pa nos ta kontentu, i pa nos ta bon físikamente, mentalmente i emoshonalmente. E sa tambe e konsekuensianan ku nos lo haña nos kuné si nos ignorá su guia moral. (Galationan 6:7) Ademas, Yehova ke pa nos tin e mihó bida posibel. P’esei, Beibel ta bisa ku Dios ta esun “kende ta siña bo, pa bo prosperá, kende ta guia bo den e kaminda ku bo mester kana.”—Isaías 48:17.

•   Nos deseonan por gaña nos. Hopi hende ta sinti ku nan por determiná pa nan mes loke ta bon i loke ta malu dor di sigui nan kurason, esta, nan deseonan. Pero di otro banda, Beibel ta bisa: “E kurason ta mas engañoso ku tur kos i ta totalmente korupto.” (Yeremías 17:9) Si nos kurason no ser guiá pa e sabiduria di Dios, lo e por pone nos hasi algu ku despues nos ta lamentá.—Proverbionan 28:26; Eklesiástes 10:2.

 Nò! Beibel ta siña nos e bèrdat tokante Dios i kon e ke pa nos komportá nos mes. (1 Korintionan 6:9-11;Galationan 5:19-23) Dios su boluntat ta pa hende haña sa e bèrdat akí. (1 Timoteo 2:3, 4) P’esei, lider religioso ku ta kristian mester siña hende loke Dios su palabra ta bisa.—Tito 1:7-9.

 Hopi hende ku no ke sigui Beibel su normanan moral ta buska lider religioso ku ta “konta nan loke nan tin gana di tende.” (2 Timoteo 4:3) Pero Dios su palabra ta duna e spièrtamentu serio akí: “Ai di esnan ku ta yama loke ta malu, bon, i loke ta bon, malu.” (Isaías 5:20) Ta bisto ku Dios lo kastigá e lidernan religioso ku no ta siña hende eksaktamente loke Dios ta bisa tokante loke ta bon i loke ta malu.

 Nò. Hende ku ke agradá Dios ta sigui Hesukristu su ehèmpel i siñansanan. El a siña su siguidónan pa no husga otro hende, pero en bes di esei pa mustra amor i rèspèt na tur hende.—Mateo 5:43, 44; 7:1.

 Hesus a siña su siguidónan pa apliká Dios su normanan moral den nan bida. Sinembargo, el a siña nan pa aseptá e echo ku otro hende por skohe pa sigui otro tipo di norma. (Mateo 10:14) Hesus no a duna su siguidónan outoridat pa usa ningun método pa fòrsa hende pa obedesé Dios su normanan.—Huan 17:14, 16; 18:36.

 Hende ku ta purba sigui Dios su normanan di loke ta bon i loke ta malu lo benefisiá tantu awor komo den futuro. (Salmo 19:8, 11) E benefisionan akí ta inkluí:

•   Mas goso.—Proverbionan 29:6.

•   Un amistat será ku Dios.—Proverbionan 3:32.

•   Dios su yudansa durante tempu difísil.—Proverbionan 11:8.

•   E speransa di bida eterno riba tera.—Salmo 37:29.