KIKO presis apòstel Pablo tabata ke men ora el a bisa ku Beibel ta “inspirá pa Dios”? (2 Timoteo 3:16) E palabra griego ku Pablo a usa aki ta nifiká literalmente “mediante rosea di Dios.” Loke Pablo tabata ke men ta ku Dios a usa su spiritu santu pa guia eskritornan di Beibel pa skirbi solamente loke E tabata ke pa nan skirbi.

Apòstel Pedro a bisa ku e eskritornan di Beibel akí, kende a ser ‘guiá pa spiritu santu a papia e mensahe  ku tabata bini di Dios.’ (2 Pedro 1:21, BPK) P’esei, apòstel Pablo por a deskribí e bukinan di Beibel komo “skrituranan santu, kualnan por duna bo e sabiduria ku ta hiba na salbashon pa medio di fe, ku ta den Kristu Hesus.”​—2 Timoteo 3:15.

Hopi hende tin problema pa aseptá ku Dios ta outor di Beibel. Krítikonan ta kuestioná eksaktitut di Beibel severamente—i segun arkeólogo Sir Charles Marston, nan ta hasi esei hopi bes ku “despresio total pa relato bíbliko.” I tambe tin hende ta konsider’é simplemente komo “un kolekshon bieu di mito i kuenta.”

Awor, ta lanta e pregunta: Bo por konfia Beibel? Ta importante pa bo ta sigur di esei. Dikon? Pasobra si Beibel ta e medio ku Dios ta usa pa komuniká ku nos, lo ta bobo—asta fatal—si nos no hasi kaso di dje. Si bo ta konsiderá Beibel simplemente komo palabra di hende i no di Dios, e ora ei lo e tin masha poko influensia riba bo akshonnan i bo kreensianan.​—1 Tesalonisensenan 2:13.

Kon bo por haña sa si Beibel ta konfiabel òf nò? Wèl, kon bo por haña sa si bo por konfia un hende òf nò? Un kos ta sigur: Ta masha difísil pa bo realmente konfia un hende ku bo sa masha tiki di dje. Ta solamente ku tempu bo por siña konosé un hende bon, i lo bo haña sa si di bèrdat e ta onesto i konfiabel. Ta asina bo por siña konosé Beibel tambe. No sea muchu lihé pa aseptá e teorianan spekulativo òf asta yen di prehuisio ku ta pone hende pèrdè konfiansa den Beibel. Tuma tempu pa konsiderá e evidensia ku ta apoyá loke Beibel mes ta bisa, esta, ku e ta “inspirá pa Dios.”

No laga e echo ku algun hende ku ta yama nan mes “amigunan” di Beibel pero ta kuestioná su outentisidat i konfiabilidat afektá  bo. Awendia mayoria di komentarista bíbliko ta afirmá di ta kristian. Tòg, nan “ta bisa ku e Skritura ta un obra humano,” segun e New Dictionary of Theology.

Hopi teólogo ta kuestioná ken realmente a skirbi e bukinan di Beibel. Por ehèmpel, algun di nan ta bisa ku no ta profeta Isaias a skirbi e buki di Isaias. Nan ta bisa ku e persona ku a skirbi e buki bíbliko akí a skirbié hopi tempu despues di e dianan di Isaias. E Concise Bible Commentary, skirbí pa Lowther Clarke, ta bin ku e argumento ku “ta hopi hende a skirbié atraves di hopi generashon.” Pero bo ta mira ku nan ta pasa por haltu di e echo ku Hesukristu i su disipelnan repetidamente a indiká ku ta Isaias a skirbi e buki ku ta karga su nòmber.​—Mateo 3:3; 15:7; Lukas 4:17; Juan 12:​38-41; Romanonan 9:​27, 29.

Pió ainda, krítikonan di Beibel, manera e komentarista J. R. Dummelow, ta bisa ku e profesianan den e buki di Daniel “ta susesonan históriko ku a tuma lugá kaba, pero ku ta e outor ta presentá nan komo profesia.” Pues, ku e palabranan ei, un biaha mas nan ta pasa por haltu di loke Hesus mes a bisa. Hesus a spièrta hende di loke el a yama “e kos repugnante ku ta trese destrukshon, ku profeta Daniel a papia di dje, poné den e lugá santu.” (Lèter skùin ta di nos; Mateo 24:15, BPK) Ta rasonabel pa un kristian kere ku Hesukristu mes lo a apoyá e mentira di ku e profesianan ta simplemente historia? Klaru ku nò.

Podisé bo ta puntra: “Pero ta hasi un diferensia ta ken a skirbi e bukinan di Beibel?” Sí, e ta hasi un gran diferensia. Lo bo konfia un tèstamènt ku ta parse di ta di un amigu si bo haña sa ku no ta e a skirbié? Suponé ku ekspertonan bisa bo ku un hende a falsifiká e tèstamènt i ku ta konosínan ku bon intenshon a skirbi loke nan ta kere tabata e deseo di bo amigu. Lo bo konsiderá e dokumento ei komo válido? Lo bo tin konfiansa ku e tèstamènt ei realmente ta kontené deseonan di bo amigu?

Den kaso di Beibel ta meskos. No ta nada straño ku hopi hende—asta esnan ku ta bisa ku nan ta kristian—no ta hasi kaso di loke Beibel ta bisa tokante tópikonan manera onestidat, moralidat seksual, etcetera. Kuantu biaha bo no ta tende hende duna komentarionan degradante manera, “Ahan, pero ta den Tèstamènt Bieu esei ta pará skirbí!”—komo si fuera e no ta dje balioso ei. Anto esei ta apesar di e echo ku apòstel Pablo a deskribí e asina yamá Tèstamènt Bieu komo “e skrituranan santu” ku tabata “inspirá pa Dios.”

Awor, kisas bo ta argumentá: “Sigur bo no por djis pasa por haltu di evidensia ku tur e ekspertonan i eruditonan a trese padilanti.” Klaru ku nò! Por ehèmpel, nos ta gradisidu na e ekspertonan onesto ku a hasi investigashon pa yuda establesé e teksto original di Beibel. Ta bèrdat ku hende a hasi foutnan chikitu den e teksto bíbliko ora nan tabata kopi’é bes tras bes atraves di siglonan. Pero  kòrda sí ku tin un diferensia grandi entre rekonosé ku hende a hasi foutnan chikitu di ortografia den e teksto bíbliko ora nan tabata kopia Beibel i rechasá henter e Beibel komo un obra humano.

Promé ku Pablo a bisa ku Beibel ta inspirá pa Dios, el a splika Timoteo dikon un registro inspirá ta asina importante. “Den e último dianan,” el a bisa, “hendenan malbado i gañadónan lo bai di malu pa peor, gañando i siendo gañá.” (2 Timoteo 3:​1, 13) Ya den Pablo su dia kaba, hende ku tabata parse ‘sabí i inteligente’ tabata usa “argumento ku ta zona bunita” pa engañá hende i debilitá nan fe den Hesukristu. (1 Korintionan 1:​18, 19; Kolosensenan 2:​4, 8) Komo protekshon, apòstel Pablo a urgi Timoteo pa ‘kontinuá den e kosnan ku el a siña for di infansia mediante e skrituranan santu’ ku Dios a proveé.​—2 Timoteo 3:​14, 15.

Durante e “último dianan” akí ta mes importante pa hasi esei. No pensa ku hende sabí ku ta bini ku nan ‘argumentonan ku ta zona bunita’ no por engañá bo. Mas bien, meskos ku kristiannan di promé siglo, konfia kompletamente den loke bo ta siña for di Beibel—e Palabra inspirá di Dios—pa bo protehá bo mes.

Testigunan di Yehova gustosamente lo kier yuda bo kultivá fe den Beibel. Por ehèmpel, nan por mustra bo kon prinsipionan di Beibel a resultá kompletamente konfiabel atraves di historia; kon Beibel ta na armonia ku siensia ora e ta papia di asuntunan sientífiko; kon henter e Beibel ta na armonia ku otro for di prinsipio te final; kon su profesianan a kumpli al pie de la letra—i hopi, hopi kos mas. Si bo ta deseá, sinti bo liber pa skirbi e editornan di e revista akí pa bo haña informashon ku a yuda miónes di hende sinsero mira ku Beibel realmente ta e Palabra di Dios.