Reencarnacion Ta un Siñansa di Bijbel?
E contesta cu Bijbel ta duna
No, Bijbel no ta siña reencarnacion. Ni e palabra “reencarnacion” ni e idea mes ta aparece den Bijbel. Reencarnacion ta basa riba e siñansa di cu alma ta inmortal. a Sinembargo, Bijbel ta siña nos cu alma ta e persona mes y cu e por muri. (Genesis 2:7; Ezekiel 18:4) Ora un hende muri, e ta stop di existi.—Genesis 3:19; Eclesiastes 9:5, 6.
Kico ta e diferencia entre reencarnacion y resureccion?
E siñansa biblico di resureccion no ta basa riba alma cu no ta muri nunca. Den e resureccion, hende cu a muri lo lanta bek mediante e poder di Dios. (Mateo 22:23, 29; Echonan 24:15) E resureccion ta ofrece e speransa positivo di biba riba un Tera nobo sin cu mester muri nunca mas.—2 Pedro 3:13; Revelacion 21:3, 4.
Ideanan robes tocante reencarnacion y Bijbel
Idea robes: Bijbel ta bisa cu profeta Elias a reencarna como Juan Bautista.
E berdad: Dios a profetisa: “Mi ta bay manda profeta Elias cerca boso”, y Hesus a mustra cu Juan Bautista a cumpli cu e profecia aki. (Malakias 4:5, 6; Mateo 11:13, 14) Sinembargo, esey no kiermen cu Elias a reencarna como Juan Bautista. Juan mes a bisa cu e no ta Elias. (Juan 1:21) Mas bien, e trabou cu Juan a haci tabata mescos cu esun di Elias, esta, proclama e mensahe di Dios animando hende pa arepenti. (1 Reynan 18:36, 37; Mateo 3:1) Tambe, Juan tabatin e mesun “actitud y poder di profeta Elias.”—Lucas 1:13-17, Beibel na papiamentu koriente.
Idea robes: Bijbel ta uza un otro palabra pa reencarnacion: “nace di nobo.”
E berdad: Bijbel ta mustra cu nace di nobo ta un experencia spiritual cu ta tuma luga ora e persona ta na bida ainda. (Juan 1:12, 13) Nace di nobo no ta un consecuencia inevitabel di e cosnan cu nos a haci den pasado. Mas bien, e ta un bendicion di Dios cu ta duna e persona un speransa unico pa futuro.—Juan 3:3; 1 Pedro 1:3, 4.
a E creencia di cu alma no ta muri nunca y reencarnacion tin nan origen te den Babilonia di antiguedad. Despues, filosofonan di India a bin cu e doctrina di karma. Segun Britannica Encyclopedia of World Religions, karma ta “e ley di causa y efecto cu ta bisa cu loke un hende haci den su bida awor lo tin efecto den su siguiente bida.”—Pagina 913.
