Si, Dios lo pordona bo picanan si bo dal e pasonan corecto. Bijbel ta bisa cu Dios ta “cla pa pordona” y cu “e lo pordona abundantemente.” (Nehemias 9:17; Salmo 86:5, Beibel Santu; Isaias 55:7, Beibel Santu) Ora e pordona nos, e ta haci esey completamente. Nos picanan ta ser “pordona”, of kita. (Echonan 3:19) Dios ta pordona permanentemente pasobra el a bisa: “Nan pica lo mi no corda mas.” (Jeremias 31:34, Beibel Santu) Unabes e pordona e no ta bay bek pa corda nos picanan y asina straf nos atrobe.

 Pero, Dios su pordon no ta un señal di debilidad of sentimentalismo. Nunca e ta cambia su normanan husto. Pa e motibo aki, tin algun pica cu e no ta pordona.​—Josue 24:19, 20.

E pasonan cu bo mester dal pa haya pordon di Dios

1.   Reconoce cu bo a peca contra Dios su normanan. Aunke kisas bo a hurt otro hende, bo tin cu reconoce prome cu bo a ofende Dios.​—Salmo 51:1, 4; Echonan 24:16.

2.   Confesa bo pica na Dios den oracion.​—Salmo 32:5; 1 Juan 1:9.

3.   Sinti un tristeza profundo pa loke bo a haci. E “tristeza cu ta segun e boluntad di Dios” ta hiba na arepentimento of cambio di actitud. (2 Corintionan 7:10) E ta inclui cu bo ta sinti duele di a comete e fayonan cu a hiba na e pica.​—Mateo 5:27, 28.

4.   Cambia bo rumbo y “bira bek.” (Echonan 3:19) Esaki por nifica cu bo ta evita di ripiti e accion of e practica, of e por nifica cu bo tin cu cambia bo manera di pensa y haci completamente.​—Efesionan 4:23, 24.

5.   Dal paso pa bo drecha e daño haci. (Mateo 5:23, 24; 2 Corintionan 7:11) Bo mester pidi despensa na esnan cu a sufri pa loke a pasa y haci bo maximo esfuerso pa drecha e daño.​—Lucas 19:7-10.

6.   Pidi Dios den oracion p’e pordona bo a base di e rescate di Hesus. (Efesionan 1:7) Pa Dios por contesta bo oracion, bo mester pordona esnan cu a peca contra bo.​—Mateo 6:14, 15.

7.   Si bo pica ta serio, papia cu un persona cu ta cualifica pa duna bo e yudansa spiritual cu bo mester y cu por haci oracion pa bo.​—Santiago 5:14-16.

Ideanan robes tocante haya pordon di Dios

 “Si mi confesa mi picanan na un pastoor of sacerdote, mi picanan lo ser pordona.”

 Niun hende no ta autorisa pa pordona un otro hende pa e picanan cu el a comete contra Dios. Aunke confesa picanan na un hende por yuda e persona bira mihor, ta Dios so por pordona pica.​—Efesionan 4:32; 1 Juan 1:7, 9.

 Si ta asina, kico Hesus tabata kiermen ora el a bisa su apostelnan: “Si boso pordona e picanan di un hende, nan ta haya pordon; si boso no pordona e picanan di un hende, nan no ta haya pordon”? (Juan 20:23) E tabata describi un autoridad unico cu lo el a duna su apostelnan ora nan lo a ricibi spirito santo.​—Juan 20:22.

 Manera el a priminti, e apostelnan a ricibi e regalo ey ora nan a yena cu spirito santo na aña 33. (Echonan 2:1-4) Apostel Pedro a uza e autoridad aki ora di husga e discipelnan Ananias cu Safira. Milagrosamente Pedro tabata sa tocante nan plan engañoso y su huicio a mustra cu nan pica lo no a ser pordona.​—Echonan 5:1-11.

 E poder milagroso di spirito santo, mescos cu otro poder manera por ehempel e don di cura hende y e don di papia diferente idioma, a stop despues di morto di e apostelnan. (1 Corintionan 13:8-10) Pues, niun hende awe por kita un otro hende su pica.