Si. Aunke cu Bijbel no ta un buki di ciencia, e ta exacto den asuntonan cientifico. Laga nos wak un par di ehempel cu ta mustra cu Bijbel ta cuadra cu ciencia y cu Bijbel tin pruebanan cientifico cu ta hopi diferente for di loke hopi hende tabata kere den e tempo cu a skirbi Bijbel.

•   Universo tabatin un cuminsamento. (Genesis 1:1) Di otro banda, hopi mito di antes ta bisa cu e universo no a ser crea, sino a origina di un caos cu tabata existi caba. E Babilonionan a kere cu universo a nace di algun dios cu a bin di dos ocean. Otro leyenda ta bisa cu universo a sali for di un webo gigante.

•   Ta ley di naturaleza ta dirigi universo y no algun dios caprichoso. (Job 38:33; Jeremias 33:25) Mitonan rond mundo ta siña cu hende no por haci nada contra e actonan impredecibel y cruel di e diosnan aki.

•   Tera ta colga na nada. (Job 26:7) Hopi hende di antes a kere cu Tera tabata plat y cu un gigante of un bestia, manera un bufalo of un turtuga, tabatin e riba su lomba.

•   Riu y otro fuentenan di awa ta existi pasobra awa ta evapora for di lama y despues ta bin abou bek como awasero, sneeuw of hagel. (Job 36:27, 28; Eclesiastes 1:7; Isaias 55:10; Amos 9:6) E Griegonan di antiguedad a kere cu ta un ocean bou di tera ta yena e riunan cu awa. Hende a keda cu e pensamento aki te den siglo 18.

•   Seronan ta subi y bay bek bou di awa; un tempo e seronan cu tin aworaki tabata bou di lama. (Salmo 104:6, 8) Na contraste, segun diferente mito, ta diosnan a crea e seronan manera nan ta awe.

•   Normanan di limpieza ta proteha nos salud. E Ley cu Dios a duna e nacion di Israel ta bisa cu nan mester a laba nan curpa despues cu nan a mishi cu un cadaver, nan mester a pone hende cu maleza contagioso den cuarentena y nan mester a deshaci di sushi di hende na un manera safe. (Levitico 11:28; 13:1-5; Deuteronomio 23:13) Na contraste, den e tempo cu e ley ey a ser duna, e Egipcionan tabata uza un remedi cu tabata consisti di un mescla di sushi di hende pa pone riba herida.

 Un investigacion imparcial di Bijbel ta mustra cu e contesta ta no. Laga nos wak algun idea robes cu hende tin tocante e exactitud di ciencia den Bijbel:

 Mito: Bijbel ta bisa cu universo a ser crea den 6 dia di 24 ora.

 Echo: Bijbel no ta bisa na ki tempo Dios a crea universo. (Genesis 1:1) Ademas, e dianan di creacion describi den capitulo 1 di Genesis tabata un periodo di tempo cu no ta ser specifica. Eigenlijk, Genesis 2:4 ta yama henter e periodo cu Dios a crea cielo y Tera un “dia.”

 Mito: Bijbel ta bisa cu palo y mata a ser crea prome cu solo a existi pa sostene e proceso di fotosintesis.—Genesis 1:11, 16.

 Echo: Bijbel ta bisa cu solo, un di e streanan cu ta forma parti di “e cielonan”, a ser crea prome cu palo y mata. (Genesis 1:1, Beibel Santu) Durante e prome “dia” of periodo di creacion, tabatin luz di solo riba Tera si, pero e tabata dof. Segun cu e atmosfera a bira mas y mas cla, riba e di tres “dia” di creacion, e luz di solo tabata suficiente fuerte pa sostene e proceso di fotosintesis. (Genesis 1:3-5, 12, 13, Beibel Santu) Ta mas despues solo a bira claramente visibel for di e superficie di Tera.—Genesis 1:16.

 Mito: Bijbel ta bisa cu solo ta draai rond di Tera.

 Echo: Eclesiastes 1:5 ta bisa: “Solo ta sali y solo ta drenta, y ta pura bay bek na e luga for di unda e ta sali.” (Beibel Santu) Sinembargo, esaki ta simplemente describi e manera cu nos for di aki riba Tera ta mira con solo ta parce di move. Te awe hende sa bisa cu “solo ta subi” y “solo ta baha”, maske nan sa cu ta Tera ta draai rond di solo.

 Mito: Bijbel ta bisa cu Tera ta plat.

 Echo: Bijbel ta uza e frase “te na e parti mas leu di Tera”, pero esaki no ta nifica cu Tera ta plat of cu e tin un rand. (Echonan 1:8) Mescos tambe, e expresion “e cuater skinanan di Tera” ta den sentido figurativo y ta referi na henter e superficie di Tera. Awendia tambe hende por uza e cuater puntanan di un compas como comparacion pa transmiti e mesun idea.—Isaias 11:12, Beibel Santu; Lucas 13:29.

 Mito: Bijbel ta bisa cu e omtrek di un circulo ta ekivalente na exactamente tres biaha su diameter, pero e midi corecto ta pi (π), of mas o menos 3,1416.

 Echo: Prome Reynan 7:23 y 2 Cronicanan 4:2 ta bisa cu “e lama di metal basha” tabatin un diameter di 10 codo y cu “un liña-di-midi di trinta codo por a pasa rond di dje.” (Beibel Santu) Pero, kisas e midinan aki tabata cifranan afgerond. Tambe ta posibel cu e midi di e omtrek tabata basa riba e rand parti paden di e baki y cu e midi di e diameter tabata basa riba e rand parti pafo di e baki.