“E BUS por bay, pero e Chines ey si mester keda!” Esey ta loke Alexandra a tende nan bisa ora e tabata sinta den bus ta warda pa e crusa e frontera entre dos pais di Sur America. El a baha for di e bus pa wak ta kico tabata pasando y a haya un yoncuman Chines ta papia Spaño tur kibra pa splica su situacion na e guardia di frontera. Como cu Alexandra tabata forma parti di un congregacion di testigonan di Jehova di habla Chines, el a ofrece su mes pa para como interprete.

E yoncuman a bisa cu e tabata un residente legal di e pais pero cu nan a horta su documentonan y su placa. Na prome instante, e guardia no a acepta e splicacion ey y hasta a pensa cu Alexandra tabata envolvi den traficacion di hende. Finalmente, e guardia a acepta e splicacion, pero e yoncuman desafortuna aki mester a paga un boet como cu e no tabatin su documentonan. Como cu e no tabatin cen hunto cu ne, Alexandra a ofrece pa fi’e 20 dollar. E yoncuman a keda masha contento y a bis’e cu lo e dun’e mas cu 20 dollar bek. Alexandra a bis’e cu no ta un recompensa e tabata busca, mas bien, e tabata contento di por a yuda pasobra esey tabata e cos corecto pa haci. El a duna e yoncuman algun literatura biblico y a anim’e pa tuma un curso di Bijbel cerca testigonan di Jehova.

Ta masha animante pa tende tocante hende cu ta mustra generosidad na personanan cu nan no conoce mes. Ademas, tanto hende religioso como esnan cu no ta religioso ta mustra generosidad na un manera similar. Abo lo tabata dispuesto pa ta asina generoso, sin spera nada bek? E pregunta ey mester interesa nos pasobra Hesus a bisa: “Tin mas felicidad den duna cu den ricibi.” (Echonan 20:35) E pregunta ey ta di interes pa cientificonan tambe pasobra nan a haya sa cu generosidad ta bon pa bo. Ban wak den ki manera.

Experencia ta mustra cu generosidad y felicidad hopi biaha ta conecta cu otro. Apostel Pablo a skirbi cu “Dios ta stima hende cu ta duna cu alegria.” E tabata papia di cristiannan cu a duna regalo generoso pa yuda nan rumannan cu tabata pasa den duro. (2 Corintionan 8:4; 9:7) Pablo no a bisa cu nan a mustra generosidad pasobra nan tabata feliz. Al contrario, nan tabata feliz pasobra nan a mustra generosidad.

Si, segun un estudio, generosidad “ta activa e partinan di bo celebro cu ta relaciona cu placer, conexion cu hende y confianza, y eseynan ta laga hende sinti nan mes satisfecho debi cu nan a mustra generosidad.” Un otro estudio a conclui cu  “hende cu ta duna otro hende placa ta sinti nan mes mas feliz cu ora nan gast’e riba nan mes.”

Bo a yega di sinti cu debi na bo circunstancianan bo no por haci hopi? E realidad ta cu tur hende por experencia e felicidad di “hende cu ta duna cu alegria.” Si bo ta duna cu un motivacion corecto, bo no tin nodi duna hopi cen. Un testigo di Jehova a manda un contribucion pa e editornan di e revista aki hunto cu e mensahe: “Tur e añanan cu a pasa, mi por a duna solamente un cantidad chikito di cen na Salon di Reino.” Anto el a agrega: “Jehova Dios a duna mi mucho mas tanto cu ami a duna ... Danki pa permiti mi duna e regalo aki; e ta laga mi sinti mi bon.”

Claro cu no ta placa so nos por duna. Tin hopi otro manera mas cu nos por mustra generosidad.

Bijbel ta bisa: “E hende misericordioso [of, “bondadoso”, NW] ta haci bon na su mes alma, ma e hende cruel ta tormenta su mes carni.” (Proverbionan 11:17) Hende bondadoso ta generoso y ta dispuesto pa duna di nan mes, esta, di nan tempo, energia, atencion y hopi mas. E tipo di bida aki ta beneficia hende na varios manera, y un di e beneficionan di mas grandi ta cu e ta bon pa nos salud.

Algun estudio ta indica cu hende cu ta yuda como boluntario ta sinti menos depresion y menos dolor fisico. Por lo general, nan tin mihor salud tambe. Generosidad ta hasta mehora e salud di hende cu ta sufri di malezanan cronico, manera multiple sclerosis of HIV. Ademas, estudionan ta indica cu ora alcoholiconan cu ta venciendo nan bicio yuda otro hende, nan ta sinti nan hopi menos deprimi y esey por baha nan chens di haya recaida.

Con bin esey ta asina? Ta parce cu “compasion, bondad y generosidad ta laga menos espacio pa sintimentonan negativo.” Generosidad por yuda tambe pa baha stress y presion halto. Es mas, hende cu nan casa a fayece a recupera mas lihe di e sintomanan di depresion ora nan a ofrece pa yuda otro hende.

No tin duda cu generosidad ta bon pa bo.

Hesus a urgi su siguidornan: “Custumbra duna, y hende lo duna boso. Nan lo basha den boso scochi un midi completo, bon primi, bon sacudi y cu ta basha over. Pasobra cu e midi cu boso ta midi, nan lo midi pa boso.” (Lucas 6:38) Ora bo ta generoso, tin mas chens cu hende lo ta agradecido, y nan mes lo por bira generoso tambe. Pues generosidad ta fomenta cooperacion y amistad.

Cientificonan cu ta studia relacion entre hende a bisa cu “hende cu constantemente ta mustra interes den otro hende ta anima nan pa haci mescos.” De echo, “djis lesa tocante muestranan extraordinario di generosidad ta haci hende bira mas generoso.” Segun un estudio, “cada persona por tin un influencia riba decenas of hasta cientos di hende cu kisas e no conoce mes ni a yega di topa.”  Cu otro palabra, djis un muestra di generosidad por pone generosidad pasa di un hende pa otro den henter un comunidad. Lo bo no kier biba na un luga asina? Si, nos tur lo beneficia si mas hende mustra generosidad como custumber.

Un experencia na Florida, Merca, ta mustra e efecto positivo di generosidad. Despues di un horcan feroz, un grupo di testigo di Jehova a bay traha como boluntario pa yuda e victimanan. Mientras cu nan tabata warda riba material na e cas cu nan mester a drecha, nan a ripara cu e cura di un bisiña a haya daño y nan a ofrece pa drech’e. Algun tempo despues, e bisiña a manda un carta na e sede mundial di testigonan di Jehova, y a bisa: “Semper lo mi ta agradecido na nan. Nan ta e hendenan di mas bondadoso cu mi a yega di conoce.” Su gratitud a motiv’e pa manda un contribucion generoso pa loke el a yama “e trabou extraordinario cu Testigonan ta haci.”

Un estudio cientifico a revela algo remarcabel: “Parce cu di naturaleza hende tin e tendencia di yuda su prohimo.” E estudio ta indica cu “mucha ta comporta nan na un manera generoso hasta prome cu nan cuminsa papia.” Dicon? Bijbel ta duna e contesta; e ta bisa cu hende a ser crea “segun e imagen di Dios”, pues nan tin e mesun cualidadnan basico cu Dios.—Genesis 1:27.

Generosidad ta un di e maraviyoso cualidadnan di nos Creador, Jehova Dios. El a duna nos bida y tur loke nos tin mester pa nos ta feliz. (Echonan 14:17; 17:26-28) Pa nos siña mas di nos Tata celestial y di su proposito, nos mester studia su Palabra, Bijbel. E buki ey ta revela tambe cu Dios a percura loke ta necesario pa nos por tin un futuro feliz. * (1 Juan 4:9, 10) Ya cu generosidad ta bin di Jehova y nos ta traha den su imagen, si nos imit’e y mustra generosidad, esey lo ta bon pa nos mes y nos lo haya su aprobacion.—Hebreonan 13:16.

Bo ta corda Alexandra, menciona na comienso di e articulo aki? Con a para cu ne? Maske un pasahero den bus a bis’e cu el a tira su placa afo, e yoncuman cu el a yuda a tuma contacto cu algun amigo den un stad caminda e bus a para despues y Alexandra a haya su 20 dollar bek. Ademas, e yoncuman a acepta e sugerencia di Alexandra y a tuma un curso di Bijbel. Alexandra a keda masha contento ora cu tres luna despues na Peru, el a topa e yoncuman na un congreso na Chines di testigonan di Jehova. Pa mustra gratitud pa tur loke Alexandra a haci p’e, el a invita Alexandra y e hendenan cu a biaha cu Alexandra pa bay e congreso pa come na su restaurant.

Bo generosidad y esfuersonan pa yuda otro hende ta haci bo feliz, mas ainda ora bo yuda hende siña conoce e Fuente di tur bon regalo, Jehova Dios. (Santiago 1:17) Abo ta disfrutando di e beneficionan di ser generoso?