LEKSION 7
Anto so Panarian na Dios?
1. Anto so Panarian na Dios?
Akin et sankamaongan ya Ari si Jesus?—MARCOS 1:40-42.
Say Panarian na Dios et gobierno ya walad tawen. Saya so onsalat ed amin ya gobierno tan manggawa ed linawa na Dios ed tawen ontan met diad dalin. Maong itan a balita. Atan so ebat ed aanapen tayon maong ya gobierno. Pankakasakeyen na sayan gobierno so amin ya manbibilay diad dalin.—Basaen so Daniel 2:44; Mateo 6:9, 10; 24:14.
Diad sakey ya panarian et kaukolan ya walay ari. Say pinili nen Jehova ya Ari ed Panarian to et say Anak to, si Jesu-Kristo.—Basaen so Apocalipsis 11:15.
Bantayan so video ya Anto so Panarian na Dios?
2. Akin et sankamaongan ya Ari si Jesus?
Say Anak na Dios so sankamaongan ya Ari ta mapangasi tan talagan gagawaen to no antoy duga. (Mateo 11:28-30) Makapanyari si Jesus kanian sarasarag ton tulongan iray totoo legan ya manuuley ed tawen. Kayari na imbilay to, sikatoy pinmawil ed tawen tan nanalagar ni diad nikawanan nen Jehova. (Hebreo 10:12, 13) Asabi panaon, si Jesus et inikdan na Dios na autoridad pian onggapon manuley.—Basaen so Daniel 7:13, 14.
3. Siopa ray nakaiba nen Jesus a manuley?
Sakey ya grupo ya tatawagen ya “masanton totoo” so nakaiba nen Jesus ed tawen ya manuley. (Daniel 7:27) Say inmunan pinili ya masanto et saramay matoor ya apostol nen Jesus. Anggad natan et manpipili ni si Jehova na matoor a lalaki tan bibii pian nakompleto so bilang da. Singa si Jesus, bilayen ira bilang espiritu.—Basaen so Juan 14:1-3; 1 Corinto 15:42-44.
Pigara so onlad tawen? Tinawag ira nen Jesus ya “melag a pulok.” (Lucas 12:32) Say bilang da et 144,000. Kaiba ira nen Jesus pian uleyan so dalin.—Basaen so Apocalipsis 14:1.
4. Antoy agawa nen ginmapon nanuley si Jesus?
Ginmapo so uley na Panarian na Dios nen 1914. * Say unonan ginawa nen Jesus bilang Ari et imbantak toy Satanas tan saray demonyo to diad dalin. Agaylay pasnok nen Satanas kanian ginulo toy interon mundo. (Apocalipsis 12:7-10, 12) Manlapu lad saman, mas grabe lay problema na totoo. Saray guerra, eras, salot, tan yegyeg et kaiba ed “tanda” ya say Panarian et magano to lan solusyonan so amin ya problema ed dalin.—Basaen so Lucas 21:7, 10, 11, 31.
5. Antoy gagawaen na Panarian na Dios natan, tan diad arapen?
Lapud panagpulong ya kimey ed interon mundo, pankakasakeyen la natan na Panarian na Dios so baleg ya ulop na totoo ya nanlapud amin ya bansa. Minilyon ya mapaabeban totoo so manpapasakop la ed si Jesus. Sikaray protektaan na Panarian na Dios no deralen to la iyan mauges ya sistema na mundo. Kanian amin ya labay dan naawat so bendisyon na Panarian na Dios et kaukolan dan unoren si Jesus.—Basaen so Apocalipsis 7:9, 14, 16, 17.
Diad loob na 1,000 ya taon, gawaen na Panarian so orihinal ya gagala na Dios parad totoo. Magmaliw lan paraiso so interon dalin. Insan la ipawil nen Jesus so Panarian ed Ama to. (1 Corinto 15:24-26) Siopa so kabat mo ya labay mon naamtaan to met so Panarian na Dios?—Basaen so Salmo 37:10, 11, 29.
^ par. 6 Parad detalyadon impormasyon no panon ya impasakbay na Biblia so taon 1914, nengnengen so pahina 215-218 na libron Anto so Peteg ya Ibabangat na Biblia?
