Siopa ray Onlad Tawen?

I-PLAY

Say ebat na Biblia

Nampili so Dios na pigaran matoor a Kristiano ya no ompatey ira et bilayen to ra lamet diad tawen. (1 Pedro 1:3, 4) No apili ira, nepeg ya itultuloy dan pabiskegen so pananisia ra tan nepeg ya malinis so kabibilay da pian mansiansia ran karapatdapat ya mangawat ed tawir da diad tawen.—Efeso 5:5; Filipos 3:12-14.

Antoy gawaen diman ed tawen na saramay onlad man?

Kaiba ira nen Jesus ya manlingkor bilang arari tan saserdote diad loob na 1,000 ya taon. (Apocalipsis 5:9, 10; 20:6) Magmaliw iran kabiangan na “balon tawen,” odino gobierno ed tawen, ya manuley diad “balon dalin,” odino totoo diad dalin. Sarayan arari ed tawen et ontulong pian magmaliw ya perpekto so pisikal, mental, tan espiritual ya kipapasen na totoo, ya satan so gagala na Dios diad gapo.—Isaias 65:17; 2 Pedro 3:13.

Pigara so bilayen lamet ya onlad tawen?

Ibabaga na Biblia ya 144,000 ya totoo so bilayen lamet ya onlad tawen. (Apocalipsis 7:4) Diad pasingawey o vision ya nabasad Apocalipsis 14:1-3, anengneng nen apostol Juan so “Kordero ya akaalagey diad Palandey Sion, tan kaiba to so 144,000.” Say “Kordero” et mangirerepresenta ed binilay lamet ya si Jesus. (Juan 1:29; 1 Pedro 1:19) Say “Palandey Sion” et mangirerepresenta ed niyatagey ya posisyon nen Jesus tan say 144,000 ya kaiba ton manuley diad tawen.—Salmo 2:6; Hebreo 12:22.

Saramay “tinawag tan pinili” ya manuley a kaiba nen Kristo diad Panarian et tinukoy ya “melag a pulok.” (Apocalipsis 17:14; Lucas 12:32) Labay ton ibaga, daiset labat ira no ikompara ed bilang na amin ya karnero nen Jesus.—Juan 10:16.

Lingon pakatalos tungkol ed no siopa ray onlad tawen

Lingon pakatalos: Onlad tawen so amin ya maong a totoo.

Katuaan: Impromisa na Dios ya ikdan toy bilay ya anggapoy anggaan diad dalin so dakel ed saray maong ya totoo.—Salmo 37:11, 29, 34.

Imbaga nen Jesus: “Anggapoy toon sinmegep ed tawen.” (Juan 3:13) Labay ton ibaga sirin, saray maong a totoon inatey antis ya linmay Jesus diad dalin, ya singa si Abraham, Moises, Job, tan David, et ag-ira linmad tawen. (Gawa 2:29, 34) Imbes, inilaloan da ya bilayen lamet ira na Dios diad dalin.—Job 14:13-15.
Say ibilay lamet ed tawen et tinawag ya “unonan kioli.” (Apocalipsis 20:6) Labay ton ibaga, wala ni sananey ya kioli. Nagawa itan diad dalin.
Ibabangat na Biblia ya no manuley lay Panarian na Dios, “anggapo lay patey.” (Apocalipsis 21:3, 4) Seguradon sayan promisa et nagawa diad dalin, ta anggapoy ompapatey diad tawen.

Lingon pakatalos: Wala lad too ’tan no diad tawen o diad dalin so pilien ton panayaman.

Katuaan: Say Dios so manpipili no siopa ed saray matoor ya Kristiano so ikdan to na ‘premyo ya natawag ed tawen,’ odino say pag-asa ya manbilay ed tawen. (Filipos 3:14) Ag-ibase na Dios so pampili to ed no antoy labay o pangarap na sakey a too.—Mateo 20:20-23.

Lingon pakatalos: Say bilay ya anggapoy anggaan diad dalin et mas abeban klase na bilay. Para labat itan ed saramay aliwan karapatdapat ya onlad tawen.

Katuaan: Saramay makaawat na bilay ya anggapoy anggaan diad dalin et tinawag na Dios ya “totook,” “saray pinilik,” tan “benendisyonan nen Jehova.” (Isaias 65:21-23) Ontulong ira pian nasumpal so gagala na Dios diad gapo ya saray totoo et nawalaan na perpekton bilay ya anggapoy anggaan diad paraison dalin.—Genesis 1:28; Salmo 115:16; Isaias 45:18.

Lingon pakatalos: Say bilang ya 144,000 ya nabasad Apocalipsis et simbolo labat, aliwan literal.

Katuaan: Tua ya wala ray bilang o numero diad Apocalipsis ya simbolo labat, balet say arum a bilang ya nabasa ditan et literal. Alimbawa, nabasa ditan so “12 ngaran na 12 apostol na Kordero.” (Apocalipsis 21:14) Amtaen so ebidensya no akin ya nibagan literal so bilang ya 144,000.

Nabasa ed Apocalipsis 7:4 so “bilang na saramay tinatakan, [o segurado lan manbilay ed tawen], 144,000.” Diad saray ontumbok ya bersikulo, walay abitla ya komaduan grupo ya duma ed 144,000: “sakey a baleg ya ulop, ya agnayarian a bilangen na too.” Sayan “baleg ya ulop” et iligtas met na Dios. (Apocalipsis 7:9, 10) Sirin, no say bilang ya 144,000 et simbolo labat tan ontutukoy ed sakey a grupo ya ag-amta so bilang to, anggapo lanlamang so kana ya impandumaan iyan duaran grupo. a

Sakey ni, nabasad Biblia ya say 144,000 et ‘sinaliw ed limog na katooan bilang unona iran bunga.’ (Apocalipsis 14:4) Saray salitan “unona iran bunga” et ontutukoy ed pigara labat ya pinili. Dugaruga itan ya deskripsion ed saramay nakaiba nen Kristo ed tawen ya manuley ed saray totoo diad dalin ya anggapoy espisipikon bilang da.—Apocalipsis 5:10.

a Onia met so insulat nen Professor Robert L. Thomas tungkol ed bilang ya 144,000 ya nabasad Apocalipsis 7:4: “Espisipiko itan ya bilang, balet samay walad 7:9 et aliwan espisipiko. No isipen tayon simbolo labat itan, anggapo la sirin so literal a bilang ed libro [na Apocalipsis].”—Revelation 1-7: An Exegetical Commentary, pahina 474.