Say salitan “born again,” odino ‘niyanak lamet,’ et say balon gapoan na relasyon na Dios tan samay toon niyanak lamet. (Juan 3:3, 7) Tinagibi odino inampon na Dios iramay niyanak lamet bilang ananak to. (Roma 8:15, 16; Galacia 4:5; 1 Juan 3:1) Mipara ed saray inampon ed legal ya paraan, nauman so kipapasen da tan nagmaliw iran kabiangan na pamilya na Dios.​—2 Corinto 6:18.

Akin et kaukolan ya niyanak lamet so sakey a too?

 Imbaga nen Jesus: “Ibagak ed sikay tua, no say sakey et agniyanak lamet, agto nanengneng so Panarian na Dios.” (Juan 3:3) Kanian kaukolan ya niyanak lamet so sakey pian niparaan ya manuley a kaiba nen Kristo diad Panarian na Dios. Say Panarian na Dios et manuuley ed tawen, kanian deneskribe na Biblia so ‘kiyanak lamet’ bilang tawir ya ‘niparaan ed tawen.’ (1 Pedro 1:3, 4) Saray niyanak lamet et inikdan na kaseguroan ya sikaray “manuley bilang arari” a kaiba nen Kristo.​—2 Timoteo 2:12; 2 Corinto 1:21, 22.

Panon ya niyanak lamet so sakey?

 Nen ipapaliwawa iya nen Jesus, imbaga to ya kaukolan a say sakey et ‘niyanak ed danum tan espiritu.’ (Juan 3:5) Ontutukoy iya ed bautismo ed danum insan kayari to et bautismo ed panamegley na masanton espiritu.​—Gawa 1:5; 2:1-4.

 Si Jesus so sankaunaan ya niyanak lamet. Sikatoy binautismoan ed Ilog Jordan, insan kayari na satan et sikatoy nilanaan (odino, binautismoan) na Dios ed panamegley na masanton espiritu. Kanian si Jesus et niyanak lamet bilang espiritual ya anak na Dios ya walaay ilalon ompawil tan manbilay lamet ed tawen. (Marcos 1:9-11) Tinoor iya na Dios nen binilay to lamet si Jesus bilang espiritu.​—Gawa 13:33.

 Saray arum ya niyanak lamet et abautismoan met ed danum antis dan inawat so masanton espiritu. a (Gawa 2:38, 41) Kanian walaan ira na seguradon ilalo ya manbilay ed tawen, a satan et tooren na Dios diad kioli.​—1 Corinto 15:42-49.

Lingon pakatalos nipaakar ed pagmaliw ya born again

 Lingon pakatalos: Say too so manpili no labay toy magmaliw ya born again.

 Katuaan: Say pakawalaan na relasyon ed Dios tan kiliktar et lukas parad amin. (1 Timoteo 2:3, 4; Santiago 4:8) Pero, say Dios so mamipili no siopa ray magmaliw ya born again, o niyanak lamet, odino saray nilanaan na masanton espiritu. Diad Biblia, say kiyanak lamet et ‘akadepende ed Dios, aliwan diad panlabayan na too odino diad sagpot to.’ (Roma 9:16) Say salitan ‘niyanak lamet’ et nayari met ya i-translate ya ‘niyanak manlapud tawen.’ Ipapanengneng na saya ya say pampili ed saray niyanak lamet et “manlapud tawen,” odino manlapud Dios.“​—Juan 3:3, footnote.