“Ag-itayo ontutundan manggawa na maabig, ta diad manepeg a panaon et manani itayo no ag-itayo onkesaw.”​—Galacia 6:9, Balon Mundo a Patalos.

 “Ag-itayo sirin komon nakesawan a manggawa na maabig: pian dia ed panaon to manani itayo, noag itayo pinmakil.”​—Galacia 6:9, Say Biblia.

 Papasesegen nen apostol Pablo iray Kristiano ya itultuloy day manggawa na maabig, odino maong, diad pakanengneng na Dios. Ta no ontan so gawaen da, seguradon bendisyonan ira na Dios.

 ‘Ag-itayo ontutunda.’ Nayari met itan ya ipatalos ya “ag-itayo komon onkekesaw.” Say Griegon termino ya inusar parad satan et ontutukoy met ed ag-ikapuy na liknaan odino agnabawasan so seseg. Nen impila nen apostol Pablo so sarili to, inamin to ya wala ray panaon ya sikatoy nadidismaya met.​—Roma 7:21-24.

 Kaiba ed panggawa na “maabig,” odino maong, so amin ya gagawaen na sakey ya Kristiano pian napaliket to so Dios. Kaiba met ed satan iray gagawaen to pian natulongan iray kapananisiaan to tan arum nin totoo.​—Galacia 6:10.

 “Diad manepeg a panaon et manani itayo no ag-itayo onkesaw.” Ipapanonot nen Pablo ed saray manbabasa ya kaukolan so panaon antis tayon nanengneng iray maong ya resulta na panggagawa tayoy maabig. Di ba kaukolan met so panaon antis ya ombaleg iray tanem na dumaralos? Nen inkonekta nen Pablo ed panag-ani iyan bersikulo, ipapaimano to so importantin katuaan ya walad bersikulo 7: “Antokaman so itatanem na sakey a too, saya met so anien to.” Labay ton ibaga, no say sakey ya Kristiano et manggagaway maong ed pakanengneng na Dios, sikatoy manani o mangawat na dakel ya bendisyon, kaiba lay bilay ya andi-anggaan.​—Roma 2:6, 7; Galacia 6:8.

 Insulat iya nen apostol Pablo parad saray Kristiano ya manaayam ed Galacia nen manga 50-52 C.E. Labay to ran protektaan ed saramay mangibabagan Kristiano ira balet pipikeweten day katuaan tungkol ed si Jesus. (Galacia 1:6, 7) Ipipilit na sarayan peken managbangat ya kaukolan kunon unoren na saray Kristiano imay ganggan ya inter na Dios ed si Moises ya parad saray Israelita. (Galacia 2:15, 16) Impaliwawa nen apostol Pablo ya asumpal lay gagala na Ganggan tan agla obligado iray Kristiano ya unoren itan.​—Roma 10:4; Galacia 3:23-25.

 Nen pinaseseg nen Pablo iray Kristiano ya itultuloy day “manggawa na maabig,” aliwan say pangunor ed Mosaikon Ganggan so tutukoyen to. Imbes, papasesegen to ra ya ‘sumpalen [odino unoren da] so ganggan na Kristo.’ Kaibad satan so amin ya imbangat nen Jesus tungkol ed panggawa na maabig ed arum.​—Galacia 6:2; Mateo 7:12; Juan 13:34.

 Bantayan iyan antikey ya video pian nawalaan kay ideya ed libro na Galacia.